etiraf

By

baat kahna nahin aati mujhe likhna nahin aata
satr kahne ka hunar nazm banane ka saliqa
baat karne ka qarina mujhe kuchh bhi nahin aata
koi surat fan-e-arz-e-hunar aa jae mujhe bhi
sham ko sham kahun aur nigahon pe andhere utar aaen
subh ko subh likhun aur pas-e-satr-e-tapan dhup-bhara din nikal aae
kal bhi tasir-e-tahi tha mera daman-e-sukhan aaj bhi tasir-e-tahi hai
mera daman-e-dua sar-e-darbar-e-ata aaj bhi faizan-e-talab hai
mere maula tera banda tere ikram ke laeq nahin lekin
mera bachpan tere inam ka shaeq hai abhi tak
kya kahun koi bhi shai asl pe qaem nahin rahti
baat pairae ke sahra mein nikal jae to ghar laut na pae
istiare ki zaban chatne aa jae mere ijz ki shokhi mere jazbon ki hararat mere lafzon ki basarat
har kinaya mere tapte hue jazbaat-e-tapan rakh ki jhilli ki tarah ot mein le le
saf-shaffaf tapan rakh ki chadar
haule haule mere jazbaat ke sar tak sarak aae
mere maula mera fan bhi meri be-jaan mohabbat ki tarah nam se tahi hai
phir bhi ai malik-e-izzat
jaane kyun mere gul-andam murabbi mujhe chhune pe raza-mand nahin hain
jaane kyun mere gul-andam ko dar hai
rakh ke dher mein shayad koi jazba abhi zinda ho aur is dast
hina-rang ki poren na jhulas de
lafz bhobhal ki tahen hain
aatish-e-jazb kahin sarw-e-falak-bos ka daman na jala de
mere maula mujhe kuchh bhi nahin aata
baat karne ka hunar sher sunane ka saliqa
mere waris mera sina tera ghar hai
mere mohsin tera ghar bab-e-kusha hai
koi aae mera dil bab-e-kusha hai
lafz bhobhal ki tahen hain
sach to ye hai meri bhobhal meri be-jaan mohabbat ki tarah gham se tahi hai

haal hawa jab puchhne aai hum majburon se

By

haal hawa jab puchhne aai hum majburon se
koi baat kahan ban pai hum majburon se
aaj sabhi dukh aansu ban kar aankh mein tair gae
khel rahi thi khel khudai hum majburon se
wo be-parda wo be-parwa wo yak-sur yak-tal
baat kare ya wo harjai hum majburon se
panw tod ke baith rahe hain rah ke patthar bhi
chah rahe the rahh-numai hum majburon se
kis aahat ki bahaar se pag pag dhul ke phul khile
kis mausam ne thokar khai hum majburon se
kis ke lams ke aks-numa hain khushbu ke jhonke
puchh na baithe gul-e-sahrai hum majburon se
baal nichod ke jhatke kis ne dukh ke dal-baadal
puchh rahi hai ye purwai hum majburon se
dard ke rukh darwaze rakhen chand ke rukh khidki
kash kirae wo chunwai hum majburon se
kar-e-numu aaghaz rahega gor ho ya gulshan
rut ne sikhi gul-arai hum majburon se
aankhen honton ke tale bhi khulte dekhengi
duniya chhin to le goyai hum majburon se
rah dikhane wale kis din kis pal aa pahunchen
kab chhin jae ye binai hum majburon se
nur-e-charagh taq-e-taghaful dil tarik na kar
bol kuchh ai mah-e-yaktai hum majburon se
zahr-piyala pi lo 'khalid' sulag utho 'khalid'
kya kya kahti thi shahnai hum majburon se

gham faraham hain magar unki farawani nahin

By

gham faraham hain magar un ki farawani nahin
ai giran-jaani yahan koi bhi aasani nahin
chaar-su ek barf-basta ahd-e-nam ka raj hai
dhup mein hiddat nahin dariyaon mein pani nahin
yaad hai kya kaam hai is shahr ka kya nam hai
sab kuchh us jaisa hai lekin aasman dhani nahin
zindagi ke dukh azal se zindagi ke sath hain
log fani hain magar logon ke dukh fani nahin
zindagi bhar sirf use puja magar ghar baith kar
pasdaran-e-wafa ka kaam darbani nahin
ek shajar ke koi do patte bhi ek jaise na the
meri duniya mein kisi shai ka koi sani nahin