zindagi KHatm bhi hone pe kasak baqi hai

zindagi khatm bhi hone pe kasak baqi hai
ujde ghar mein teri sanson ki mahak baqi hai
mere hamdam mujhe bedad se mahrum na kar
daman-e-ruh mein zakhmon ki tapak baqi hai
mujh ko do chaar ghadi aur bhi jine dije
siskiyon ki abhi zakhmon mein sanak baqi hai
aas ki shama pighalne ko hai ab to aa ja
raat baqi hai sitaron mein chamak baqi hai
main kisi wada-faramosh ka aaina hun
meri aankhon mein abhi us ki jhalak baqi hai
dil-e-zakhmi liye baitha hun azizan-e-kiram
aao kuchh aur chhidak do jo namak baqi hai

shoKH-o-gustaKH jab andaz-e-saba hota hai

shokh-o-gustakh jab andaz-e-saba hota hai
tab kahin ja ke hasin rang-e-qaba hota hai
rang bharne ki hain baaten sabhi afsane mein
ishq mein kaun bhala kis se juda hota hai
jab dahakte hue honton ka tasawwur ubhre
dil mein soya hua har zakhm hara hota hai
us se kya kahiye sar-e-rah koi baat kabhi
gar main mil jaun mujhe dhund raha hota hai
ilm walo ye zara padh ke batao mujh ko
kya rukh-e-gul pe ye shabnam se likha hota hai
phir khata puchh li tum ne to saza se pahle
aisi baaton se hi 'khalid' wo khafa hota hai

na wo dard hai na wo ranj hai na hujum zulmat-e-sham hai

na wo dard hai na wo ranj hai na hujum zulmat-e-sham hai
mere khushk honton pe yak-ba-yak jo chamak utha tera nam hai
kabhi kahkashan se guzar gae kabhi bazm-e-gul mein utar gae
jo samajh gae to thahar gae tera dar hi apna maqam hai
mere gham hain kitne ajib se wo mila kahan hai nasib se
yahan qurb ki mujhe aarzu wahan dur hi se salam hai
jo chhupa ke pyason se main piyun jo kisi ke hath se chhin lun
to wo pyas mujh se gunah hai to wo jam mujh pe haram hai
suno sar-phiro mere hasido meri zindagi ka hai raaz kya
mera sar kahin bhi jhuke to kyun mera dil kisi ka ghulam hai
hamein thi khabar ye to peshtar ki hai aastin mein chhupi chhuri
mile phir gale yahi soch kar chalo lab pe is ke to ram hai
main wahi hun 'khalid'-na-rasa mujhe jaanta hai ye mai-kada
mera jam jam mein aks hai mera bund bund mein nam hai

na kami koi tere naz mein na kami hai zauq-e-niyaz mein

na kami koi tere naz mein na kami hai zauq-e-niyaz mein
to wafaen meri hi pesh kar mere khun-e-dil ke jawaz mein
meri khak mein teri sans hai teri raushni mere pas hai
mujhe dil diya sanam-ashna mera sar jhuka hai namaz mein
kabhi khat ko tere chhupa liya kabhi ashk aae to pi liye
meri zindagi to guzar gai isi parda-dari-e-raaz mein
kisi ghaznawi ke nasib mein kahan wo uruj-e-niyaz tha
kai ghaznawi the jude hue isi ek libas-e-ayaz mein
hain tere siwa bhi bahut hasin mujhe to nazar se gira nahin
usi aasman ke sae mein usi khak-dan-e-majaz mein
na yun fakhr kar na yun sar utha ki ye sach hai 'khalid'-e-be-nawa
tu ye soch le tu ye jaan le ki nasheb bhi hain faraaz mein

mujhko yun mujhse mila de koi

mujh ko yun mujh se mila de koi
main sada dun to sada de koi
main ne puchha to hai anjam-e-wafa
ab ye dar hai na bata de koi
aarzu ye hai ki khushbu apni
meri sanson mein basa de koi
us ke rukhsar-e-shafaq-gun ki chamak
mere honton pe saja de koi
jo jafa pyar se tu ne ki hai
us ko kyun kar na bhala de koi
khun-e-dil se jo likha hai main ne
kash ashkon se mita de koi
nazren phir us ko utha bhi na saken
khud ko itna na gira de koi
ishq mein bandh ke paiman-e-wafa
mujh ko jine ki dua de koi
samjhen hum zahr-e-tamanna us ko
apni aankhon se pila de koi
aas hi tut na jae khalid
jab dawa de na dua de koi

mohabbat ki alamat ho gai hai

mohabbat ki alamat ho gai hai
ye kis be-kas ki rehlat ho gai hai
koi maqsad nahin hai zindagi ka
hamein jine ki aadat ho gai hai
abhi tak kyun ye patte tutte hain
hawa to kab ki rukhsat ho gai hai
koi taqat daba sakti nahin ab
ki zehnon mein baghawat ho gai hai
jise main qatl kar ke khush hua tha
har aaina wo surat ho gai hai
gareban mein abas kyun jhankte ho
tumhein kaisi ye wahshat ho gai hai
ibaadat ek zarurat se thi pahle
zarurat ab ibaadat ho gai hai
nahin hai dhyan apni zindagi ka
ki ab bachchon se ulfat ho gai hai
hamari zindagi hi kya hai 'khalid'
azizon ki amanat ho gai hai