aali-ji ki gum-shuda bayaz

By

bayaz chori hui hai janab-e-'ali' ki
bayaz-chor ne chori badi misali ki
zarur chor koi sariq-e-adab hoga
use bayaz churane ka khas dhab hoga
main aise chor ki danish-wari pe hun hairan
jo ek raat mein ban baitha sahab-e-diwan
janab-e-'ali' ke column the jitne matbua
samajh ke chhod gaya un ko nasr-e-mamnua
ajib chor tha nasri kalam chhod gaya
bayaz le gaya column tamam chhod gaya
ghazal ke sath gai masnawi bhi doha bhi
tamam shahr ne mana tha jis ka loha bhi
chhupa hua tha jo shair nikal raha hoga
wo is bayaz ke maqte badal raha hoga
janab-e-'ali' ki fikr-e-jamil thi ye bayaz
rubaiyon mein badi khud-kafil thi ye bayaz
jis anjuman mein ye jati thi hashr karti thi
adab ke sath siyasat bhi nashr karti thi
mushaeron mein ba-sad ehtiram aati thi
yahi bayaz musibat mein kaam aati thi
isi bayaz se dohon ko aazmana tha
wo shakh hi na rahi jis pe aashiyana tha

planning

By

walime kar liya tha dusron ka mal kha ke
so ab rishwat se bachchon ki musalmani karunga
guzishta sal to haj kar liya tha sud le kar
credit-card se is sal qurbani karunga

nisbat

By

urdu mushaere mein mila ek nau-jawan
bola ki dollaron ka sambhaala hua hun main
ab madari zaban se nisbat nahin mujhe
baby-sitter ki god ka pala hua main

masala pani ka

By

masala pani ka hai chhe sat din se barqarar
aap pi kar dekh lije ya naha kar dekh len
raat din nal se hawa aati hai pani ki jagah
aap is tonti mein ghubbara laga kar dekh len

kirae ka ghar

By

main ek bhi makan ka malik na ban saka
barish ki zad mein hun kabhi lu ke asar mein hun
itni na tez chal ki ukhad jaen baam-o-dar
ai sar-sar-e-hawa main kirae ke ghar mein hun