zindagi chaak hui kya ho rafu ki surat

By

zindagi chaak hui kya ho rafu ki surat
mil gai khak mein ab zauq-e-numu ki surat
hausle kya hue chadhte hue dariyaon ke
regzaron mein kahan kho gai ju ki surat
khwahish-e-sim-badan se hua wahshat ka nuzul
nashsha-e-jism ne kya kar di lahu ki surat
dukh-bhari sham ke neze pe sisakte hue log
zarre zarre se tapakti man-o-tu ki surat
zaiqe talkh hue aankh se wahshat tapki
kaun yaad aaya 'jamal' aaj adu ki surat

zauq-e-nazzara liye hum bhi KHabar tak aae

By

zauq-e-nazzara liye hum bhi khabar tak aae
shab ke pahlu se uthe aur sahar tak aae
bu-e-gul baad-e-saba raqs-e-sharar tak aae
rang hona tha hamein khun-e-jigar tak aae
abr-e-rahmat hai to shabnam ki tarah se utre
rang-e-khushbu ki hawa arz-e-hunar tak aae
is se pahle hi baras jata hai ek abr-e-karam
panw ki dhul uthe aur mere sar tak aae
kyun pareshan hai tu ai mere gum-karda-e-rah
rah dushwar hai lekin mere ghar tak aae
pesh-khema tha yahi fath-o-zafar ka shayad
zer hote hue lashkar jo zabar tak aae

ye zamin meri bhi hai ye aasman mera bhi hai

By

ye zamin meri bhi hai ye aasman mera bhi hai
roz-o-shab ke khel mein sud-o-ziyan mera bhi hai
na-muradi ke bhanwar mein ek tu hi to nahin
sahil-e-imkan pe aakhir imtihan mera bhi hai
mah-e-nau bas ek tu hi to nahin tere siwa
qarya-e-shab mein charagh-e-jaan-fishan mera bhi hai
gunj utthi hai zamin-ta-asman imroz-o-shab
is sada-e-hu mein ek harf-e-fughan mera bhi hai

wo aks-e-KHwab hai paikar nahin hai

By

wo aks-e-khwab hai paikar nahin hai
shuur-e-zat se bahar nahin hai
agarche aasman sar par nahin hai
zamin bhi to mera bistar nahin hai
faza masmum hoti ja rahi hai
meri khatir mera hi ghar nahin hai
ufuq ke rang hain chehre pe us ke
shikast-e-khwab ka manzar nahin hai
faqat main hun tere madd-e-muqabil
mere pichhe mera lashkar nahin hai

safar tamam hua gard-e-justuju bhi gai

By

safar tamam hua gard-e-justuju bhi gai
teri talash mein nikli to aarzu bhi gai
ek intizar sa tha barf ke pighalne ka
phir us ke baad to ummid-e-abju bhi gai
talab ki rah mein aise bhi mod aae hain
ki harf-o-saut gaya shokhi-e-gulu bhi gai
ye barg-o-bar kahan jazib-nazar thahre
tumhaare baad to phulon se rang-o-bu bhi gai
kuchh aise khak udai hai dasht-e-hu mein 'jamal'
ki jazb-e-shauq bhi tafriq-e-ma-o-tu bhi gai

kisi but ke shikam se gar koi aazar nikal aae

By

kisi but ke shikam se gar koi aazar nikal aae
khirad ka band tute aur ek patthar nikal aae
taqaze jab badan ke ruh mein dhal kar nikal aae
qaba ke band tute aur hasin bistar nikal aae
zamana na-shanasi ka murawwat be-khayali ki
na jaane kis gali kis mod par khanjar nikal aae
uge hain khwab-zaron mein manazir sar-tarashi ke
suhani wadiyon mein bawle lashkar nikal aae
thakan ka bojh le kar koi kitni dur chalta hai
magar jab rah mein ek mil ka patthar nikal aae
chhupa kar jin charaghon ko nihan-khane mein rakkha tha
fasil-e-jaan pe jalne ke liye kyun kar nikal aae