warud

By

jawan raaton mein kala dasht
qalib mein utarta hai
ki mere jism o jaan ke margh-zaron ki mahak
hawa ke dosh par raqs karti hai
pyasi ret sahraon ki dhansti hai
rag o pai mein
udhadte hain masamon se
lahu-zaron ke chashme
barf kohsar ke sare parinde
git gate hain
habab uthta hai
gahre nil-gun zinda samundar ka
himala sans mein dhal kar
glacier sa pighalta hai
jawan raaten
regzaron ki pyasi ret
samundar ka habab
barf kohsar ke sare parinde
himala aur glacier
jawan raaton mein
meri kaenaton mein
nae sayyare aur taza jahan daryaft karte hain
ki mujh par lafz barish se utarte hain

uljhan

By

wywastha bhi bahut ziyaada nahin hai
jatan jokham bahut hain
aage jo jangal hai wo
us se bhi ziyaada gunjalak hai
tapassya ke thikane
gyan ke mantar
dhyan ki har ek sidhi par
wahi murakh
ajab sa jal tane baitha hai yugon se
na jaane kyun
mere rawan se us ko
paraje ka khatra hai
to yun karta hun
ab ke khud ko khud se tyag deta hun

rawan zindabaad

By

jala raha hun
kai yugon se
main us ko khud hi jala raha hun
jala raha hun ki us ke jalne mein
jit meri hai mat us ki
jala raha hun bade se pindal mein saja kar
jala raha hun
mita raha hun
magar wo
mere hi man ki andher nagri mein ji raha hun
wo meri lanka mein apne panw pasare baitha
kai yugon se
mujhe musalsal chida raha hai

no mans land

By

mujhe bata kar
ki meri samt-e-safar kahan hai
kai khazanon ke
be-nishan naqshe
mujhe thama kar
kaha tha us ne ki satwen dar se aur aage
tumhaari khatir
mera wo bab-e-baqa khula hai
magar
wahan par tamam dar wa the meri khatir
wo satwan dar khula nahin tha
magar wahan par
koi bhi raaz-e-baqa nahin tha
tamam ajsam the salamat
koi bhi zinda bacha nahin tha
koi bhi mere siwa nahin tha
wahan bhi koi khuda nahin tha

lahu ko zoom karte hain

By

dariche se jahan tak bhi nazar aata hai
musalsal khamushi hai
sadak ki pili lakir
sar pitti hai
dur tak foot-path par raunde hue sae
poll par bijli ke khambe se latakti ek chamgadad
subh ka zard chehra raat ke andoh ka ahwal ek chaupaya
aur nukkad par khade ho tum
musalsal khamushi hai
dariche se jahan tak bhi nazar aata hai
musalsal khamushi hai
mere kamre ke andar
han magar tarikh raushan hai
hazaron sal ke tajrabe banhen pasare aise baithe hain
ki jaise shahr bhar ki khamoshi se mutmain hun
mere computer ki desktop
kal ki ek taswir apni kahani bolti hai
na jaane kyun ye manzar dekhte hi
sadak par phir shor o girya jag uthta hai
saron ki bhid ugti hai
rawan rahte hain sae
ba-juz is ke musalsal khamoshi hai
magar dil chahta hai khamoshi ko aise todun
tumhaare pas jaun
aur kahun banduq ko niche karo
aao na meri desktop par kal ka photo tum bhi dekho
tum bhi dekho
main lahu ko zoom karta hun

koi aane ka nahin ab

By

go hamein malum tha
ki ab wo silsila baqi nahin hai
go hamein malum tha ki
nuh aane ke nahin ab
han magar jab shahr mein pani dar aaya
hum ne kuchh mauhum ummidon ko pala
aur ek bade pindal pe yakja hue hum
aur ba-yak aawaz hum ne nuh ko phir se pukara
go hamein malum tha ki
nuh aane ke nahin ab
go hamein ehsas ye bhi tha ki hum ne
khud hi wo sara samundar kat kar
us ka rukh moda tha apne shahr ki jaanib
magar hum mutmain the
mauhum ummidon ko aae din jawan karte hue hum sab
ki phir se nuh aaenge
bulaenge
jilau mein apne taza kashtiyan
makhluq-e-khuda ke taza jode laenge
aur hum phir se
nuh ki kashti mein pani se nikal jaenge ek din
ki ab pani fasilen tod kar
shahr ko dariya banane pe tula hai
ab nahin malum ki hum kis jagah hain kaun hain hum
hum abhi tak muntazir hain
ab hamein kaamil yaqin hai
ibn-e-maryam laut aaenge
hamein zinda uthaenge