hum to aasan samajhte the ki rasta kam tha

hum to aasan samajhte the ki rasta kam tha
is masafat mein mohabbat ka ilaqa kam tha
yun to diwar ke pahlu mein khade the hum bhi
dhup aisi thi ki diwar ka saya kam tha
kaisa lamha tha ki hum tark-e-safar kar baithe
khwab kam the na tere gham ka asasa kam tha
qamat-e-husn mein sani hi nahin tha us ka
shar-e-be-faiz tera zauq-e-tamasha kam tha
ek talluq tha jo tuta hai ki hum tute hain
phir bhi lagta hai ki hum ne use chaha kam tha

guzri hui wo rut kabhi aani to hai nahin

guzri hui wo rut kabhi aani to hai nahin
dil ne magar ye baat bhi mani to hai nahin
ai qissa-go ye lahja tera yun kabhi na tha
kuchh to bata ye kya hai kahani to hai nahin
kuchh us ke muskurane se andaza ho to ho
andar ki chot hai nazar aani to hai nahin
phir us gali na jaane pe raazi hua to hai
ab ke bhi dil ne baat nibhani to hai nahin
wo baat ab kahan ki dilon ko kare ghulam
bas ek chamak hai aankh mein pani to hai nahin
duniya tere liye jo guzari guzar di
ab ye jo rah gai hai ganwani to hai nahin

ek paikar hai ki imsal mein aata hi nahin

ek paikar hai ki imsal mein aata hi nahin
jaise aaina khad-o-khal mein aata hi nahin
aasman ka ye qafas qaid kare bhi kaise
dil wo panchhi ki par-o-baal mein aata hi nahin
hum jise dekhte hain us ke alawa bhi hai
ek zamana jo mah-o-sal mein aata hi nahin
apne rahne ko bhi kiya shahr mila hai jis ka
haal ye hai ki kisi haal mein aata hi nahin
manta kab hai kisi sud-o-ziyan ko ye dil
aisa wahshi hai kisi chaal mein aata hi nahin

bana bana ke aks KHadd-o-Khaal rakh diye gae

bana bana ke aks khadd-o-khal rakh diye gae
ki aaine hata diye khayal rakh diye gae
jo baat qatl ki gai wahi to ek baat thi
sukhan-sara-e-waqt mein malal rakh diye gae
koi na khud ko pa sake ye aur baat hai magar
kami kaji ke rang mein kamal rakh diye gae
kabhi jo ek shahr tha qafas bana diya gaya
jahan bhi rakkhe ja sake the jal rakh diye gae
darakht kat kat kar kushadgi to ki gai
saron pe jalti dhup ke wabaal rakh diye gae
kabhi jo haq diya gaya to is tarah diya gaya
ki faisle ke darmiyan sal rakh diye gae
dilon ko chhu gai thi jo wo tazgi nahin rahi
bhale se ab sukhan mein sau kamal rakh diye gae
mohabbaton mein chahiye thi pukhtagi so is liye
firaq rakh diye gae visal rakh diye gae
wo shahr be-misal tha wo shahr la-zawal tha
phir us ki int int mein zawal rakh diye gae

ashkon se dhul ke aaina-KHana badal gaya

ashkon se dhul ke aaina-khana badal gaya
barish hui to mausam-e-rafta badal gaya
jab bhi sambhaala chand ne barbaad shahr ko
diwar-o-dar wahi rahe naqsha badal gaya
ek dasht-e-be-aman mein safar kar rahe the hum
sansen ukhad gain kabhi rasta badal gaya
utri nazar se gard to manzar kuchh aur tha
yun lag raha tha jaise wo chehra badal gaya
har bar pahunche hum tere mear tak magar
har bar tera hum se taqaza badal gaya
pahle to intiqam ne shal kar diye hawas
phir jaane kya hua ki irada badal gaya
is bar tere harf-e-tasalli na bin sake
is bar teri baat ka lahja badal gaya
kam kam raha tha din ke samay dil mein tera aks
shab aa gai to jaise ye shisha badal gaya

ajab ek baat uski baat mein thi

ajab ek baat us ki baat mein thi
ki khushbu ped ke har pat mein thi
tumhein hum se mohabbat ka gila tha
mohabbat kab hamare hath mein thi
ye aise the ki khush aate bahut the
koi khushbu inhi din raat mein thi
ajab mausam tumhaare baad aae
ajab be-raunaqi barsat mein thi
andhere mein nazar aane laga tha
koi to raushni zulmat mein thi
gae waqton mein aisa to nahin tha
yahi duniya thi aur auqat mein thi
kahin to waqt jaise ruk gaya tha
kahin par umr bhi lamhat mein thi
hua tha waqia kuchh aur lekin
khabar kuchh aur akhbaraat mein thi
bahut thi dhup mein shiddat bhi 'khalid'
magar talkhi jo ehsasat mein thi