jahan-dar pe war chalne laga

By

jahan-dar pe war chalne laga
ghulamon ka darbar chalne laga
azal se kisi shai mein gardish na thi
chala main to sansar chalne laga
khuda rakkhe america-o-rus ko
miyan apna akhbar chalne laga
tabassum takallum jawan ho gae
mubarak ho ghar-bar chalne laga
abhi dhup 'khalid' pe aai na thi
ki diwar diwar chalne laga

har ek faisla usne behtar kiya

By

har ek faisla us ne behtar kiya
mujhe aankh di tum ko manzar kiya
dil-e-khun-chakida munawwar kiya
to aankhon ka sahra samundar kiya
lakiron ko raushan sitare diye
sitaron ko apna muqaddar kiya
wahin dubne ka yaqin aa gaya
jahan us ne hum ko shanawar kiya
ujala nafi hai jab us ne kaha
andhere mein the hum ne bawar kiya

fikr-e-sud-o-ziyan mein rahna hai

By

fikr-e-sud-o-ziyan mein rahna hai
bas yahi is jahan mein rahna hai
ek kashakash si jaan mein rahna hai
jab talak dastan mein rahna hai
har taraf aasman phaila hai
sab ko ek saeban mein rahna hai
kal kyun girta hai aaj gir jae
kaun sa is makan mein rahta hai
kitni aasaniyan mayassar hain
kitna mushkil jahan mein rahna hai
kamra-e-imtihan hai duniya
har ghadi imtihan mein rahna hai
phir lagai sabil aankhon ne
phir se aab-e-rawan mein rahna hai
aab o gil aatish o hawa hain hum
aur isi khandan mein rahna hai
zindagi puchhte ho kya mujh se
qahqahon ka fughan mein rahna hai
fikr har kas ba-qadar-e-himmat-e-ust
hum ko hindostan mein rahna hai
sansen maghmum ho gain sun kar
'khalid'-e-khasta-jaan mein rahna hai

barae tishna-lab pani nahin hai

By

barae tishna-lab pani nahin hai
samundar ka koi sani nahin hai
hamara ghar bhi sahra ho gaya hai
magar 'ghaalib' si virani nahin hai
ragon mein khun shokhi kar raha hai
sitara si wo peshani nahin hai
main apne ghar ke andar chain se hun
kisi shai ki farawani nahin hai
nizam-e-jism jamhuri hai 'khalid'
kisi jazbe ki sultani nahin hai

aankhon mein dhup dil mein hararat lahu ki thi

By

aankhon mein dhup dil mein hararat lahu ki thi
aatish jawan tha to qayamat lahu ki thi
zakhmi hua badan to watan yaad aa gaya
apni girah mein ek riwayat lahu ki thi
khanjar chala ke mujh pe bahut gham-zada hua
bhai ke har suluk mein shiddat lahu ki thi
koh-e-giran ke samne shishe ki kya bisat
ahd-e-junun mein sari shararat lahu ki thi
rukhsar o chashm-o-lab gul o sahba shafaq hina
duniya-e-rang-o-bu mein tijarat lahu ki thi
'khalid' har ek gham mein barabar sharik tha
sare jahan ke bich rifaqat lahu ki thi