mukalima nazr-e-asmat

By

tum aisi subhon tum aisi shamon mein
apne ghar se kabhi na niklo
ki jab hawaen supurdagi se nihaal ho kar
tumhaare pahlu mein dolti hon
tumhaare aanchal se khelti hon
tum aisi subhon tum aisi shamon mein
apne ghar se kabhi na niklo
ki hawaen udas lahje mein tum se puchhen
tumhaare aankhon ko kya hua hai
tumhaare chehre pe kya likha hai
tumhaare uthte hue qadam par
ye ladkhadahat si kis liye hai
tum aisi subhon tum aisi shamon mein
apne ghar se kabhi na niklo
ki jab hawaen
badalte mausam ki sazishen mein sharik ho kar
tumhaare ji mein ghalat-bayani ka zahr gholen
suno ai pyari-si sanwli-si sajili ladki
yahi hawaen to aate-jate
musafiran-e-rah-e-wafa par
ghubar-e-tohmat uchhaalti hai
mohabbaton par yaqin na ho to
dilon mein paiham
hazar wahmon ko dalti hai
tum aisi subhon tum aisi shamon mein
apne ghar se kabhi na niklo kabhi na niklo kabhi na niklo

visal-e-mausam

By

visal-e-mausam
tumhaare abru ke ek ishaare ka muntazir hai
nazar uthao
aur apne raste pe khilne wale gulab dekho
samaaton se kaho khamoshi
nigah aur aaine ke mabain
sukhan ka aaghaz kar rahi hai
hawa se puchho
wo kis badan ki mahak se paiham ulajh rahi hai
suno ye mausam visal ka hai
so us ko yun raegan na jaano
agar tum izn-e-safar na doge
to phir ye mausam
gulab rut mein bhi zard patton ka bhes badle
tumhaare aangan se ja malega
aur aainon se gila karega

tishna-lab aawargi

By

khwab kuchh bikhre hue se khwab hain
kuchh adhuri khwahishen
tishna-lab aawargi ke roz-o-shab
ek sahra chaar su bikhra hua
aur qadmon se thakan lipti hui
ek gahri be-yaqini ke nuqush
jaane kab se do dilon par sabt hain
raat hai aur waswason ki yurishen
ye achanak
taq pe jalte diye ko kya hua
subh hone mein to khasi der hai
aaine aur aks mein duri hai kyun
ruh pyasi hai azal se
darmiyan takhir ka ek dasht hai
na-gahan phir na-gahan
ye wahi dastak wahi aahat to hai
han magar in duriyon majburiyon ke darmiyan
kaun aaega chalo phir bhi chalen
shayad us ko yaad aae koi bhuli-bisri baat
wo daricha band hai to kya hua
chand hai us baam par jaga hua

pahli dastak

By

tum ne pahli dastak di
aur laut gae
hum ye soch ke dil-darwaza wa kar baithe
shayad phir tum laut ke aao
lekin tum to qarya qarya ghumne wali
shokh hawa ka jhonka nikle
tum kya jaano
pahli dastak kya hoti hai
dil-darwaza kab khulta hai
tum kya jaano
dhimi dhimi aag mein jalna kya hota hai
aap hi apni lau mein pighalna kya hota hai
tum ne pahli dastak di
aur laut gae

DugDugi wale

By

tum ho dugdugi wale
dugdugi bajate ho
aur chahte ho ye
dugdugi ke bajte hi
khalaq-e-shahr-e-be-parwa
nachne mein lag jae
tum ho dugdugi wale
par ye log jin ko tum
dugdugi ke parde mein
nachna sikhate ho
aankh bhi to rakhte hain
soch bhi to sakte hain
tum ho dugdugi wale
koi aane wala din
is tarah bhi aaega
dugdugi ke bajte hi
khalaq-e-shahr-e-be-parwa
ghaflaton se jagegi
aur tumhaare hathon mein
dugdugi ke badle ek
aaina thama degi
tum ho dugdugi wale
dugdugi bajate ho

be-KHwab masafat

By

ek do pal to zara aur ruko
aisi jaldi bhi bhala kya hai chale jaana tum
sham mahki hai abhi aur na palkon pe sitare jage
hum sar-e-rah achanak hi sahi
muddaton baad mile hain to na milne ki shikayat kaisi
fursaten kis ko mayassar hain yahan
aao do-chaar qadam aur zara sath chalen
shahr-e-afsurda ke mathe pe bujhi sham ki rakh
zard patton mein simatti dekhen
phir usi khak-ba-daman pal se
apne guzre hue kal ki khush-bu
lamha-e-haal mein shamil kar ke
apni be-khwab masafat ka izala kar len
apne hone ka yaqin
aur na hone ka tamasha kar len
aaj ki sham sitara kar len