nafsiyati maraz

By

mir to nahin hun main
jaane phir bhi aisa kyun
roz roz hota hai
raat ke samundar mein
chand jo ki machhli hai
motiyan ugalta hai
aur ek moti se
jal-pari nikalti hai
aur mujh se kahti hai
kyun udas rahte hun
nind kyun nahin aati
kaun yaad aata hai
kis ka gham satata hai
ulfaton ke mare ho
chahaton ke pyase ho
raat ek samundar hai
jis ki mauj-e-zulmat mein
aashiqon ke nalon ka
an-kahe sawalon ka
zahr khub hota hai
sair ho ke pi lena
phir gale laga lena
maut ki dulhan ko tum
dafatan ye hota hai
aarzu ki chaukhat par
dil ke tut jaane se
dard chikh uthta hai
ishq! teri tauba hai

main ki ek bani-adam

By

main ki ek bani-adam
aalam-e-anasir ka
ek khamir-e-taza-dam
ek hayat mujh mein hai
kaenat mujh mein hai
meri saltanat hai sab
mujh se hai jahan qaem
main hun gardish-e-paiham
rau mein hai lahu har dam
kya khabar lahu kya hai
ek shorish-e-hasti
ek dakhli tufan
ek mahshar-e-dauran
kya khabar lahu kya hai
gardishen sitaron ki
gardish aasmanon ki
gardishen zaminon ki
gardishen zamanon ki
kya khabar lahu kya hai
ye nizam-e-kul jari
yani harkaten sari
sab lahu ki harakat hai
hai lahu ke dam se hi
amn bhi, mohabbat bhi
jang bhi, adawat bhi
shorish o baghawat bhi
kya khabar lahu kya hai
gardishen lahu ki jab
mujh mein shor karti hain
be-khudi ke nashshe mein
jism ka har ek khaliya
raqs karne lagta hai
aur phir ye hota hai
khushkiyon ka har zarra
paniyon ka har qatra
ek be-badan jazba
raqs karne lagta hai
is jinnon ke aalam mein
zakhm jag jate hain
dard chikh uthta hai
aur phir ye hota hai
ruh-o-dil ki wadi mein
naghme gunj uthte hain
naghma-ha-e-sehr-angez
be-karan fazaon mein
la-makan khalaon mein
soz aur fughan ban kar
mithi lai mein dhal dhal kar
jab bikharne lagte hain
aise sehr-alam mein
ek kaif-o-masti ka
nashsha chhane lagta hai
aur phir ye hota hai
kaenat ki har shai
gungunane lagti hai
aur phir wahi naghme
ruh-o-dil ke chhaalon ko
tar, tar zakhmon ko
nim-jaan karahon ko
lala-zar daghon ko
jagte phaphulon ko
mast loriyan de kar
khwab ke gulistan mein
lapata zamane tak
yun hi chhod dete hain
asl mein wahi naghme
dard ka mudawa hain!!

aaina aur main

By

zamane bhar mein aaina sadaqat ki alamat hai
magar mein is ka munkir hun
bahut jhuta hai aaina
kabhi wo dew-qamat hastiyon ko ek dam bauna dikhata hai
tilasmati hai aaina
kabhi pasta-qadon ka qad bahut uncha dikhata hai
bahut bahrupiya hai wo
koi farba ho to us ko bahut dubla dikhata hai
bahut hi maskhara hai wo
chalo jaane bhi do ki aaina insan ki fitrat mein shayad dhal gaya hoga
magar kuchh shoabda-bazi ki had bhi hai
ye aaina to mujh se bhi hamesha makr karta hai
jo mera hath ho sidha to wo ulta dikhata hai
agar ulta dikhata hun to phir sidha dikhata hai
bahut jhuta hai aaina
magar aaina-e-ayyam mein takzib-e-aina ki haisiyyat bhala kya hai
khuda jaane
magar tarikh kahti hai
yahi takzib-e-aina, zamane bhar ke shishagar qabile ke liye khatraat ka tasdiq-nama hai
meri tazrib-e-paiham se ye aainon ke saudagar shikasta hain
shikasta kaifiyat mein mujh se ye daryaft karte hain
ki aakhir kaun ho tum ji
tumhein in aainon se dushmani kyun hai
hamesha aainon ka munh chidhate ho, sada tazhik karte ho
tum aakhir chahte kya ho
to lo main aaj ye elan karta hun
mere is ahd ke shishagaro, saudagaro sun lo!
suno, aagah ho jao
main shaer hun
main aaine ko aaina dikhata hun!