wafa ke nam pe rakkhi hain tohmaten kya kya

By

wafa ke nam pe rakkhi hain tohmaten kya kya
bigad di hain zamane ne suraten kya kya
hamin pe dosh hai un ki qaza namazon ka
janab-e-shaikh ne dhundin wazahaten kya kya
bade khulus se ek shahr-e-gul ujad liya
hui hain ahl-e-nazar se himaqaten kya kya
fareb-e-sim-o-jawahar hue hain nam-o-numud
khayal-e-yar se uljhi hain zulmaten kya kya
wo mehrban to na tha par khulus bhi na raha
padi hain ghair ki sohbat mein aadaten kya kya
zaban-e-qatil-o-maqtul par hai ek hi nam
khuda ke nam pe guzrin qayamaten kya kya
badha ke halqa-e-rindan ki ranjishen 'khalid'
sitamgaron ne nikali hain hasraten kya kya

uqab dil ho to sara jahan ek sa hai

By

uqab dil ho to sara jahan ek sa hai
zamin koi bhi ho aasman ek sa hai
koi thikana watan ka badal nahin hota
muhajiron ke liye har makan ek sa hai
tayyunat-e-ilaqa briadri firqe
sipah-e-jahl kahin ho nishan ek sa hai
wo koi sahab-e-jagir ho ki mulla ho
magar hamare liye qahrman ek sa hai
nigah masnad-e-ala pe roz-e-awwal se
dayar-e-yar ka har pasban ek sa hai
panah daman-e-qanun mein na masjid mein
hamare shahr mein har saeban ek sa hai
hamari aankh ka tara wo ho nahin sakta
tamam bazm pe jo mehrban ek sa hai
faluja-o-najaf-o-karbala se pahle wo
samajh rahe the ki har be-zaban ek sa hai
hazar bar bhi lut kar sabaq nahin sikha
wafa ke shahr mein har khush-guman ek sa hai
jihad-e-saif ho 'khalid' ki ho jihad-e-qalam
kisi zaban mein ho imtihan ek sa hai

har sher ko gulab kiya kya ghalat kiya

By

har sher ko gulab kiya kya ghalat kiya
han tera intikhab kiya kya ghalat kiya
raunda nahin kabhi kisi jugnu ko zer-e-pa
zarre ko aaftab kiya kya ghalat kiya
lab par har ek shakhs ke thi maslahat ki mohr
hum ne hi kuchh khitab kiya kya ghalat kiya
jo mawara-e-zehn-e-faqihan tha wo gunah
us ka bhi irtikab kiya kya ghalat kiya
kab tak pisenge zulm ki chakki mein mere log
elan-e-inqalab kiya kya ghalat kiya
jo dushman-e-awam the nafrat unhin se ki
aur ishq be-hisab kiya kya ghalat kiya
is aas mein ki sab ko mayassar ho sukh ki nind
qurban har ek khwab kiya kya ghalat kiya
aaya adab bara-e-adab ka khayal jab
likhne ka band bab kiya kya ghalat kiya
'khalid' rahe na sab ki tarah bas qalam quli
zulmat ko be-naqab kiya kya ghalat kiya

dekhiye usko to har baat gul-e-tar ki tarah

By

dekhiye us ko to har baat gul-e-tar ki tarah
baat kije to wahi shakhs hai patthar ki tarah
aql hairan hai kin alfaz mein tarif karun
husn aur wo bhi chhalakte hue saghar ki tarah
barq-e-guftar sahi shoala wo talwar sahi
hum magar zarf bhi rakhte hain samundar ki tarah
aazmaoge to hum jaan se guzar jaenge
kaghzi sher nahin hain kisi afsar ki tarah
dil ko bahlate hain afsana-e-azadi se
hum ne ek tauq pahan rakkha hai zewar ki tarah
raj karte hain wahi log dilon par 'khalid'
bakhsh dete hain jo dushman ko sikandar ki tarah

charagh zabt-e-tamanna se jal na jaen kahin

By

charagh zabt-e-tamanna se jal na jaen kahin
gulon ke ashk sitaron mein dhal na jaen kahin
isi liye hain garan-pa ki hum jo tez chale
dayar-e-yar se aage nikal na jaen kahin
bichha rahe hain meri rah mein jo angare
wo hath phul hain darta hun jal na jaen kahin
qadam qadam pe bichhao bisat-e-kaif-o-nishat
sharab aur pilao sambhal na jaen kahin
har ek gam pe ashkon ke garm chashme hain
dilon ke sang sambhaalo pighal na jaen kahin
chale chalo ki bharosa nahin hawaon ka
abhi hain sath abhi rukh badal na jaen kahin
dar-e-habib ho ya kucha-e-adu 'khalid'
ye aarzu hai ki ab sar ke bal na jaen kahin

bane jo shams-o-qamar nang-e-asman nikle

By

bane jo shams-o-qamar nang-e-asman nikle
jinhen charagh samajhte rahe dhuan nikle
zara si der mein ek rind ho gaya momin
yaqin use bhi na tha hum bhi khush-guman nikle
na hum mein jauhar-e-'ghaalib' na un mein shan-e-'zafar'
to kis qusur mein koi qasida-khwan nikle
kisi ki chah mein jab jaan bhi hum ganwa aae
to lutf-e-yar ke qisse kahan kahan nikle
main sochta hun ki tarikh kya kahegi hamein
sahar ba-dosh chale shab ke pasban nikle
hadaf hamin ko banana ki mo'atabar thahro
is anjuman mein agar zikr-e-dostan nikle
jo sang-e-mil the be-abru hue 'khalid'
jo gard-e-pa bhi na the mir-e-karwan nikle