main der se dhup mein khaDa hun

main der se dhup mein khada hun
saya saya pukarta hun
sona hun kured kar to dekho
mitti mein daba hua pada hun
le mujh ko sambhaal gardish-e-waqt
tuta hua tera aaina hun
yun rabt to hai nashat se bhi
dar-asal main gham se aashna hun
sohbat mein gulon ki main bhi rah kar
kanton ki zaban samajh gaya hun
dushman ho koi ki dost mera
har ek ke haq mein main dua hun
kyun aab-e-hayat ko main tarsun
main zahr-e-hayat pi chuka hun
taqdir-e-junun pe chup raha main
tabir-e-junun pe ro raha hun
har ahd ke log mujh se na-khush
har ahd mein khwab dekhta hun

har har sans nai KHushbu ki ek aahaT si pata hai

har har sans nai khushbu ki ek aahat si pata hai
ek ek lamha apne hath se jaise nikla jata hai
din dhalne par nas nas mein jab gard si jamne lagti hai
koi aa kar mere lahu mein phir mujh ko nahlata hai
sari sari raat jale hain jo apni tanhai mein
un ki aag se subh ka suraj apna diya jalata hai
main to ghar mein apne-ap se baaten karne baitha tha
an-dekha sa ek chehra diwar pe ubhra aata hai
kitne sawal hain ab bhi aise jin ka koi jawab nahin
puchhne wala puchh ke un ko apna dil bahlata hai
kis ko saza-e-maut milegi ye kaisi hai bhid lagi
aur kya us ne jurm kiya tha koi nahin batlata hai

zatiyat

jo mujh pe biti hai us ki tafsil main kisi se na kah sakunga
jo dukh uthae hain, jin gunahon ka bojh sine mein le ke phirta hun, un ko kahne ka mujh ko yara nahin hai,
main dusron ki likhi hui kitabon mein, dastan apni dhundhta hun
jahan jahan sarguzisht meri hai
aisi satron ko main mitata hun
raushnai se kat deta hun
mujh ko lagta hai, log un ko agar padhenge
to rah chalte mein tok kar mujh se jaane kya puchhne lagenge!

yaad

ab bhi darwaza roz khulta hai
rasta mera tak raha hai koi
mere ghar ke udas manzar par
koi shai ab bhi muskuraati hai
meri man ke safed aanchal ki
thandi thandi hawaen roti hain
fasla aur kitni tanhai
aaj katti nahin hain ye raaten
aasman mujh pe tanz karta hai
chand taron mein hoti hain baaten
ai watan tere murgh-zaron mein
mere bachpan ke khwab raqsan hain
mujh se chhut kar bhi wadiyan teri
kya usi tarah se ghazal-khwan hain

sauda-gar

lo gajar baj gaya
subh hone ko hai
din nikalte hi ab main chala jaunga
ajnabi shah-rahon pe phir
kasa-e-chashm le le ke ek ek chehra takunga
daftaron kar-khanon mein talim-gahon mein ja kar
apni qimat lagane ki koshish karunga
meri aaram-e-jaan
mujh ko ek bar phir dekh lo
aaj ki sham lautunga jab
bech kar apne shaffaf dil ka lahu
apni jholi mein chandi ke tukde liye
tum bhi mujh ko na pahchan pain to phir
main kahan jaunga
kis se ja kar kahunga ki main kaun tha
kis se ja kar kahunga ki main kaun hun

saya-e-diwar

kaisa sunsan hai dasht-e-awargi
har taraf dhup hai har taraf tishnagi
kaisi be-jaan hai mai-kade ki faza
jism ki sansani ruh ki khastagi
is do-rahe pe khoe gae hausle
is andhere mein gum ho gai zindagi
ai gham-e-arzu main bahut thak gaya
mujh ko de de wahi meri apni gali
chhota-mota magar khub-surat sa ghar
ghar ke aangan mein khushbu si phaili hui
munh dhulati sawere ki pahli kiran
saeban par amar-bel mahki hui
khidkiyon par hawaon ki atkheliyan
rauzan-e-dar se chhanti hui raushni
sham ko halka halka uthta dhuan
pas chulhe ke baithi hui lakshmi
ek angithi mein koele dahakte hue
bartanon ki suhani madhur ragni
ras-bhare git masum se qahqahe
raat ko chhat pe chhitki hui chandni
subh ko apne school jate hue
mere nanhe ke chehre pe ek tazgi
rishte-nate mulaqaten mehmaniyan
dawaten jashn tyauhaar shadi ghami
ji mein hai apni aazadiyan bech kar
aaj le lun ye pabandiyon ki khushi