waqt ne dil ki tabiat mein wafa rakkhi hai

waqt ne dil ki tabiat mein wafa rakkhi hai
kulfat-e-agahi phir us ki saza rakhi hai
dil ho pazhmurda to hai khanda-e-gul be-mani
har khushi aur ghami dil ne chhupa rakkhi hai
chaak karti hai saba subh ko ghunchon ke jigar
ye kahani mujhe shabnam ne suna rakkhi hai
ghunche ghunche mein hai poshida salib-e-gham-e-dost
kis ne phulon mein ye qatil ki ada rakkhi hai
kis ke chhup jaane se hairan hui hai duniya
kis ke jalwon ne ye diwani bana rakkhi hai
zindagi ho gai kis tarah tu itni sasti
kis liye tu ne bhari duniya sata rakkhi hai
ilm se jis ke mujhe mil sake manzil ka nishan
waqt ne mujh se wahi baat chhupa rakkhi hai
hum ne har mod pe chahat ke jalae hain charagh
hum ne har gam pe ulfat ki bina rakkhi hai
tafraqon ka nahin aapas mein kahin koi jawaz
sab ne auham ki diwar utha rakkhi hai
dard-e-hijran ke tasalsul se na ghabra dil-e-zar
ishq ne dard ke andar hi dawa rakkhi hai
waqt le aaya hai khud had mein use der sawer
jis ne bhi qad se siwa apni ana rakkhi hai
us sitamgar ka mein ai 'raaz' karun kya shikwa
har bala mere liye jis ne rawa rakkhi hai

sach hai gham-e-firaq mein hum ro nahin sake

sach hai gham-e-firaq mein hum ro nahin sake
wo bhi tamam raat magar so nahin sake
be-faeda hai chahna asnam se wafa
ye sang-dil kisi ke kabhi ho nahin sake
patthar ke log hain jahan shishe ke baam-o-dar
hum us zamin mein dard-e-wafa bo nahin sake
sine mein ek dagh laga aur umr-bhar
dhote rahe wo dagh magar dho nahin sake
aadab-e-parda-dari-e-zabt-e-fughan na puchh
tufan dil mein uthte rahe ro nahin sake
ranginiyon ke ahd mein khushiyon ke daur mein
chaha ghamon ko khona magar kho nahin sake
taskhir-e-mahtab mukammal to ho gai
daman mein us ke ek bhi pal so nahin sake
ayyari-e-siyasat-e-ahbab dekhiye
chaha kisi ke ho ke rahen ho nahin sake

ruh-e-aman makan mile raaz-e-ayan nihan mile

ruh-e-aman makan mile raaz-e-ayan nihan mile
kab se hun garm-e-justuju manzil-e-kun-fakan mile
nadira-e-zaman mile nabigha-e-jahan mile
jis ko main dhundhta hun wo nazish-e-mah-washan mile
nala-e-arghawan mile shoala-e-arghawan mile
saiqa-e-tapan mile jalwa-e-be-aman mile
kakul-e-kahkashan khule aariz-e-la-makan mile
dil-bar-e-hast-o-bud ka kash kahin nishan mile
yun to hamein hazar-ha jalwe jahan-tahan mile
jis ki magar talash hai dekhiye kab kahan mile
dhund rahe hain aaj tak jin ko wahi kahan mile
warna rah-e-hayat mein sainkadon karwan mile
shoala-fishan zamin par sainkadon aasman mile
dil ko jahan sakun mile kash wo aastan mile
meri nazar mein kam nahin wo bhi kisi se khush-nasib
jis ko gham-e-firaq ki daulat-e-be-karan mile
wajh-e-nashat-e-shauq hai kitna hasin wo ek gham
yun to yahan hazar-ha roz-e-gham nihan mile
soch rahe hain aaj hum apni bhi qadr kya hai kam
wo hamein gar na mil sake hum bhi unhen kahan mile
un ke liye gul-o-bahaar aur hamein khizan-o-khar
un ko bhi gulsitan mile hum ko bhi gulsitan mile
soz-o-gudaz-o-dard-o-gham hasrat-o-dil-shikastagi
zist mein kitne qimti hum ko ye armughan mile
qarya-ba-qarya shahr shahr tut raha hai aaj qahr
chikh uthi hai ruh-e-dahr kash kahin aman mile
sham-e-junun liye hue dhund raha hai shahr shahr
ahd-e-khirad mein 'raaz' ko koi to raazdan mile

na nazar ki dida-wari rahi na jigar ki be-jigari rahi

na nazar ki dida-wari rahi na jigar ki be-jigari rahi
magar ahl-e-dawa-e-shauq se teri barham-e-naz bhari rahi
kabhi jag utha kabhi so gaya kabhi khil utha kabhi kho gaya
dil-mast jam-e-jamal ko na khabar na be-khabari rahi
ye ajab hawas ka dayar hai yahan aam ana ka khumar hai
mujhe apne sahra se pyar hai mujhe ras dar-ba-dari rahi
na dil-o-dimagh ko hai sukun na zaman makan ko qarar hai
main safar mein hun ki hazar mein hun meri zindagi safari rahi
kahin chand jugnu parinda rut kahin rang dhup dhanak nirt
mere daur mein dil-e-muztarib ye ghazal ki shishagari rahi
yahan makr bhi hai jadal bhi hai yahan bal ke sath mein chhal bhi hai
fan-e-tesha-gar ke kamal se zan-e-hila-gar hi khari rahi
ye tabassum-e-sar-e-anjuman wo adawaton ke dilon mein phan
nae daur mein nai nasl ki yahi shan-e-dida-wari rahi
jo khuda-shanas nahin hua kabhi khud-shanas na ho saka
wo jo munkirin-e-khuda hue unhen khud se be-khabari rahi
mere fan ke zauq-e-latif ko sanad ahl-e-zauq ki chahiye
magar aaj tak sar-e-anjuman ye talab dhari ki dhari rahi
jo the taliban-e-ilaj-e-gham unhen gahri nind sula diya
na maraz raha na mariz hi ye ghazab ki chaaragari rahi

mehrbani ko teri aariz-e-taban samjhe

mehrbani ko teri aariz-e-taban samjhe
ruth jaane ko kham-e-kakul-e-pechan samjhe
subh-e-khandan ko maal-e-shab-e-hijran samjhe
shab ko tanwir ka ek aks-e-pareshan samjhe
zist aashuftagi-e-gor-e-ghariban samjhe
maut ko silsila-e-umr-e-gurezan samjhe
shokh kirnon ko dil-e-sina-figaran samjhe
kahkashaon ko hasin shahr-e-nigaran samjhe
haram-o-dair na jalwa-gah-e-jaanan samjhe
kuchh na samjhe yahi ai gardish-e-dauran samjhe
kuchh samajh pae na ahbab ke samjhane se
waqt ne puchha ki samjhe to kahan han samjhe
saf dil sada mizaj aisi tabiat pai
hum to waiz ko bhi ek banda-e-yazdan samjhe
jis ko kahte hain nasim aaj wo hai baad-e-sumum
aur kabhi fasl-e-khizan ko bhi bahaaran samjhe
phut kar bahne lage aankh se nale shab-e-hijr
aur ham-sae use neamat-e-baran samjhe
rang laya hai gulistan ki tamannaon ka khun
hum badi der mein mafhum-e-bahaaran samjhe

har shai mein numayan hai jalwa aankhon se magar mastur bhi hai

har shai mein numayan hai jalwa aankhon se magar mastur bhi hai
shah-e-rag se qarin hai husn-e-azal shahpar se nazar ke dur bhi hai
hai parda-andar-parda wo aur arz-o-sama ka nur bhi hai
jab yaad karo nazdik hai wo jab dhundo us ko dur bhi hai
mahdud bhi la-mahdud bhi hai aazad bhi hai majbur bhi hai
faizan-e-nazar se har zarra hoshiyar bhi hai makhmur bhi hai
hai zarra zarra bhi sahra hai qatra qatra bhi dariya
samjho na to aiman hai patthar patthar ko jo samjho tur bhi hai
phir jabr-o-sitam ke sae mein kuchh log khuda ban baithe hain
musa hi nahin hain ab warna firaun bhi hai aur tur bhi hai
jaise ghunche khil uthte hain tar ho kar ashk-e-shabnam se
dil shab-bhar hijr mein ro ro kar har subh yunhi masrur bhi hai
kamzor hi se taqsiren hain majburi par taziren hain
ye dagar dagar mashhur bhi hai ye nagar nagar dastur bhi hai