yun dawat-e-shabab na do main nashe mein hun

yun dawat-e-shabab na do main nashe mein hun
ye dusri sharab na do main nashe mein hun
aisa na ho ki nashshe mein kat jae zindagi
aankhon ko koi khwab na do main nashe mein hun
itna bahut hai tum se nigahen mili rahen
ab bas karo sharab na do main nashe mein hun
yaro dil-o-dimagh mein kafi hai fasla
uljhe hue jawab na do main nashe mein hun
aisa na ho ki raaz tumhaara main khol dun
dekho mujhe jawab na do main nashe mein hun
daman ka hosh hai na gareban ka hosh hai
kanton bhara gulab na do main nashe mein hun
khud ko sambhaalna yahan mushkil hai dosto
chhalki hui sharab na do main nashe mein hun
jo lamhe 'nur' hosh mein rah kar guzar gae
un ka abhi hisab na do main nashe mein hun

ye lamha zist ka hai bas aaKHiri hai aur main hun

ye lamha zist ka hai bas aakhiri hai aur main hun
har ek samt se ab wapsi hai aur main hun
hayat jaise thahar si gai ho ye hi nahin
tamam biti hui zindagi hai aur main hun
main apne jism se bahar hun aur hosh bhi hai
zamin pe samne ek ajnabi hai aur main hun
wo koi khwab ho chahe khayal ya sach ho
faza mein udti hui chandni hai aur main hun
kisi maqam pe rukne ko ji nahin karta
ajib pyas ajab tishnagi hai aur main hun
akela ishq hai hijr-o-visal kuchh bhi nahin
bas ek aalam-e-diwangi hai aur main hun
na lafz hai na sada phir bhi kya nahin wazeh
kalam karti hui khamushi hai aur main hun
surur-o-kaif ka aalam hadon ko chhuta hua
khudi ka nashsha hai kuchh aagahi hai aur main hun
muqabil apne koi hai zarur kaun hai wo
bisat-e-dahr hai bazi bichhi hai aur main hun
jahan na sukh ka ehsas aur na dukh ki kasak
usi maqam pe ab shairi hai aur main hun
mere wajud ko apne mein jazb karti hui
nai nai si koi raushni hai aur main hun
jo chand lamhon mein guzra bata diya sab kuchh
phir us ke baad wahi zindagi hai aur main hun

yaro ghar aai sham chalo mai-kade chalen

yaro ghar aai sham chalo mai-kade chalen
yaad aa rahe hain jam chalo mai-kade chalen
dair-o-haram pe khul ke jahan baat ho sake
hai ek hi makan chalo mai-kade chalen
achchha nahin piyenge jo pina haram hai
jina na ho haram chalo mai-kade chalen
yaro jo hoga dekhenge gham se to ho najat
le kar khuda ka nam chalo mai-kade chalen
saqi bhi hai sharab bhi aazadiyan bhi hain
sab kuchh hai intizam chalo mai-kade chalen
aisi faza mein lutf-e-ibaadat na aaega
lena hai us ka nam chalo mai-kade chalen
fursat ghamon se pana agar hai to aao 'nur'
sab ko karen salam chalo mai-kade chalen

uski dhun mein har taraf bhaga kiya dauDa kiya

us ki dhun mein har taraf bhaga kiya dauda kiya
ek bund amrit ki khatir main samundar pi gaya
ek taraf qanun hai aur ek taraf insan hai
khatm hota hi nahin jurm-o-saza ka silsila
awwal-o-akhir ke kuchh auraq milte hi nahin
hai kitab-e-zindagi be-ibtida be-intiha
phul mein rangat bhi thi khushbu bhi thi aur husn bhi
us ne aawazen to din lekin kahan main sun saka
main to chhota hun jhuka dunga kabhi bhi apna sar
sab bade ye tai to kar len kaun hai sab se bada
jaise an-dekhe ujale ki koi diwar ho
band ho jata hai kuchh duri pe har ek rasta
husn-o-ulfat donon hain ab ek sath par magar
aaina-dar-aina bas aaina-dar-aina
jab na mujh se ban saki us tak rasai ki sabil
ek din main khud hi apne raste se hat gaya
zindabaad ai dil mere main bhi hun tujh se muttafiq
pyar sachcha hai to phir kaisi wafa kaisi jafa
han magar tasdiq mein umren guzar jati hain 'nur'
kuchh na kuchh rahta hai sab ko apni manzil ka pata

ruk gaya aankh se bahta hua dariya kaise

ruk gaya aankh se bahta hua dariya kaise
gham ka tufan to bahut tez tha thahra kaise
har ghadi tere khayalon mein ghira rahta hun
milna chahun to milun khud se main tanha kaise
mujh se jab tark-e-talluq ka kiya ahd to phir
mud ke meri hi taraf aap ne dekha kaise
mujh ko khud par bhi bharosa nahin hone pata
log kar lete hain ghairon pe bharosa kaise
doston shukr karo mujh se mulaqat hui
ye na puchho ki luti hai meri duniya kaise
dekhi honton ki hansi zakhm na dekhe dil ke
aap duniya ki taraf kha gae dhoka kaise
aap bhi ahl-e-khirad ahl-e-junun the maujud
lut gae hum bhi teri bazm mein tanha kaise
is janam mein to kabhi main na udhar se guzra
teri rahon mein mere naqsh-e-kaf-e-pa kaise
aankh jis ja pe bhi padti hai thahar jati hai
likhna chahun to likhun tera sarapa kaise
zulfen chehre se hata lo ki hata dun main khud
'nur' ke hote hue itna andhera kaise

palkon ki oT mein wo chhupa le gaya mujhe

palkon ki ot mein wo chhupa le gaya mujhe
yani nazar nazar se bacha le gaya mujhe
ab us ko apni haar kahun ya kahun main jit
rutha hua tha main wo mana le gaya mujhe
muddat se ek raat bhi apni nahin hui
har sham koi aaya utha le gaya mujhe
ho wapsi agar to inhen raston se ho
jin raston se pyar tera le gaya mujhe
ek jaan-dar lash samajhiye mera wajud
ab kya dhara hai koi chura le gaya mujhe
aawagaman ki qaid se kya chhutta kabhi
bas tera pyar tha jo chhuda le gaya mujhe
dharti ka ye safar mera jis din hua tamam
jhonka hawa ka aaya uda le gaya mujhe
tufan ke baad main bhi bahut tut sa gaya
dariya phir apne rukh pe baha le gaya mujhe
muddat ke baad 'nur' hansi lab pe aai hai
wo apna ham-khayal bana le gaya mujhe