nind

By

nind mithi nind aankhon mein bhari hai
dhund mein har chiz dubi ja rahi hai
paniyon par jaise bahta ja raha hun
sahilon se dur hota ja raha hun
dekha an-dekha sa kuchh rang-e-khala hai
ek be aawaz aawaz hua hai
rishta-e-rang-o-sada se kat gaya hun
dhund gahri aur gahri ho gai hai
ek purani gunj dil mein gunjti hai
dur ki ek shakl ab pas aa rahi hai

KHwahish ka jurm

By

us ne khwahish ki to wo zahir hua
rang tariki se nikle aur sada dene lage
saya saya ho gai kali gupha ki tirgi
aur har manzar numayan ho gaya
main bhi tha ek raushni aur tirgi ke darmiyan
mujh ko bhi zalim hawa ne das liya
aur main bhi zindagi ki aag mein jalte laga
khak-o-khun ke rang mein dhalne laga
us ne khwahish ki to us ko maut ke sae mile
main ne khwahish ki to mujh ko jism ka maqtal mila

ye sach hai ki main is tamashe mein shamil nahin

By

ye sach hai ki main is tamashe mein shamil nahin
phir ye kaisi saza mil rahi hai mujhe
ye main kis daere mein khada hun jahan
aaj koi nahin
ek mere siwa
wo hawa jo kabhi mujh se wabasta thi
aaj mujh se juda ho gai
meri aawaz ke sath jaane kahan kho gai
ye main kis daere mein khada hun jahan
ek siyahi hai gahri ghani har taraf
khamushi qabr ki khamushi har taraf
mere mazi ka suraj siyah-paniyon mein gira bujh gaya
mere sare ujale andhere hue
aaj tanha hun main
haal ke is siyah daere mein khada
ek tamasha hun main

main DhunDhta hun jise aaj bhi hawa ki tarah

By

main dhundhta hun jise aaj bhi hawa ki tarah
wo kho gaya hai khala mein meri sada ki tarah
na puchh mujh se mera qissa-e-zawal-e-junun
main paniyon pe barasta raha ghata ki tarah
tamam umr raha hun main jism mein mahsur
tamam umr kati hai meri saza ki tarah
utar de koi mujh par se ye badan ki rida
ki mar dale mujhe bhi mere khuda ki tarah
nikharta jae yunhi rang-e-sham ai 'pashi'
bikharta jaun yun hi main gul-e-nawa ki tarah