KHwab tabir mein Dhalte hain yahan se aage

khwab tabir mein dhalte hain yahan se aage
aa nikal jaen shab-e-wahm-o-guman se aage
rang pairahan-e-khaki ka badalne ke liye
mujh ko jaana hai abhi reg-e-rawan se aage
ek qadam aur sahi shahr-e-tanaffus se udhar
ek safar aur sahi kucha-e-jaan se aage
is safar se koi lauta nahin kis se puchhen
kaisi manzil hai jahan-e-guzaran se aage
main bahut tez hawaon ki guzargah mein hun
ek basti hai kahin mere makan se aage
meri aawargi yun hi to nahin hai 'asim'
koi khushbu hai meri umr-e-rawan se aage

kahin aisa na ho daman jala lo

kahin aisa na ho daman jala lo
hamare aansuon par khak dalo
manana hi zaruri hai to phir tum
hamein sab se khafa ho kar mana lo
bahut roi hui lagti hain aankhen
meri khatir zara kajal laga lo
akele-pan se khauf aata hai mujh ko
kahan ho ai mere khwabo khayalo
bahut mayus baitha hun main tum se
kabhi aa kar mujhe hairat mein dalo

mile to kash mera hath tham kar le jae

mile to kash mera hath tham kar le jae
wo apne ghar na sahi mujh ko mere ghar le jae
butan-e-shahr tumhaare larazte hathon mein
koi to sang ho aisa ki mera sar le jae
diya karunga yunhi tere nam ki dastak
mera nasib mujhe lakh dar-ba-dar le jae
wo aadmi ho ki khushbu bahut hi ruswa hai
hawa-e-shahr jise apne dosh par le jae
mere qarib se guzre to ahl-e-dil bole
utha ke kaun parinda lahu mein tar le jae
palat ke aae to shayad na kuchh dikhai de
wo ja raha hai to 'asim' meri nazar le jae