zindagi naqs-e-zindagi to nahin

zindagi naqs-e-zindagi to nahin
bandagi mein koi kami to nahin
aap ki dosti se darta hun
aap se koi dushmani to nahin
be-usuli usul ho jae
aap par aisi be-khudi to nahin
aaj zulmat ke chehre par hai nur
un ka gham bais-e-khushi to nahin
main gunahon mein gharq hun lekin
us ki rahmat mein kuchh kami to nahin
mere sine mein saikdon bal hain
un ki zulfon mein barhami to nahin
aam hai zikr-e-khas ai 'maikash'
ab koi baat raaz ki to nahin

zindagi ki saKHt zanjiron mein jakDa dekh kar

zindagi ki sakht zanjiron mein jakda dekh kar
aaj tum bhi hans rahe ho mujh ko tanha dekh kar
ab to wo bhi mujh se katra kar guzar jaane lage
mere mahaul-e-pareshani ka naqsha dekh kar
hausla kis mein tha jo deta barabar ka jawab
sabr karna hi pada un ka rawayya dekh kar
aaj tujh ko bhi hansi aane lagi ai baghban
naujawan phulon ke armanon ko pyasa dekh kar
ahl-e-sahil ro rahe hain qatre qatre ke liye
zarf-e-dariya ro raha hai zarf-e-dariya dekh kar
meri aankhon se bhi 'maikash' gir pade ashk-e-alam
pir-e-mai-khana ko tanhai mein rota dekh kar

zamin ke chand-sitaron ko nind aati hai

zamin ke chand-sitaron ko nind aati hai
hayat-bakhsh bahaaron ko nind aati hai
abhi chaman ka muqaddar chamak nahin sakta
abhi chaman ki bahaaron ko nind aati hai
janaza ashkon ka palkon ke dosh par hai abhi
isi liye to nazaron ko nind aati hai
nizam-e-bazm-e-gulistan badal gaya shayad
chaman ki god mein kharon ko nind aati hai
ab inqilab-e-zamana ki fikr kaun kare
teri nigah ke maron ko nind aati hai
na dub jae kahin nabz-e-zindagi 'maikash'
sahar ka waqt hai taron ko nind aati hai

meri har KHushi KHushi thi teri har KHushi se pahle

meri har khushi khushi thi teri har khushi se pahle
mujhe koi gham nahin tha gham-e-ashiqi se pahle
koi kashmakash nahin thi gham-e-dushmani se pahle
mujhe khauf hi kahan tha teri dosti se pahle
na bahaar-e-mai-kada thi na surur-bakhsh naghme
tere mai-kade mein kya tha meri mai-kashi se pahle
main duaen chahta hun main dua ka mustahiq hun
tumhein kaun jaanta tha meri dosti se pahle
hui sham-e-husn raushan to main ban gaya patanga
teri bandagi thi suni meri zindagi se pahle
kahin tirgi thi 'maikash' kahin tirgi ke dere
kahin raushni nahin thi meri raushni se pahle

mera diwangi par is qadar maghrur ho jaana

mera diwangi par is qadar maghrur ho jaana
ki rafta rafta hadd-e-agahi se dur ho jaana
pata deta hai gumrahi-e-rahgir-e-mohabbat ka
bichhadna aur bichhad kar qafile se dur ho jaana
kahin duniya-e-ulfat ko tah-o-baala na kar dale
ghurur-e-husn ke aain ka dastur ho jaana
azal se tira-bakht-e-ishq ke hisse mein aaya hai
shab-e-gham-e-dil ka jal jal kar charagh-e-tur ho jaana
meri danist-e-naqis mein kamal-e-khud-numai hai
zamin se aasman tak aap ka mashhur ho jaana
kisi ka jashn-e-azadi manana hai bahut aasan
magar dushwar hai ghaarat-gar-e-jamhur ho jaana
ragon ka khun rafta rafta thanda ho chala 'maikash'
mere dard-e-jigar ko aa gaya kafur ho jaana

mera dil chaak hua chaak-e-gareban ki tarah

mera dil chaak hua chaak-e-gareban ki tarah
ab gulistan nazar aata hai bayaban ki tarah
mere sine mein munawwar hue yaadon ke charagh
bazm-e-khuban ki tarah shahr-e-nigaran ki tarah
koi monis koi hamdam koi sathi na mila
main pareshan hi raha zulf-e-pareshan ki tarah
khatm ho jaegi har raushni duniya ki magar
tum chamakte hi rahoge mah-e-taban ki tarah
main ne chaha ki sambhal jae tabiat meri
dil tapakta hi raha dida-e-giryan ki tarah
chashm-e-ulfat se na dekha kabhi duniya ne mujhe
main khatakta hi raha khar-e-mughilan ki tarah
mere saqi tere andaz-e-karam ke sadqe
ab to 'maikash' bhi nazar aata hai insan ki tarah