insan ke kitne rup hain ru-e-ana se puchh

insan ke kitne rup hain ru-e-ana se puchh
saz-e-gharaz se maslahat-e-khushnuma se puchh
tere safar ki rah mein kitne sarab hain
meri nigah se puchh mere naqsh-e-pa se puchh
kitne hain sanp hujra-e-ikhlas mein na gin
maili rida se puchh darida qaba se puchh
ek sirf tere qasr pe bijli giri thi kyun
mat puchh us ke adl se apni khata se puchh
kya kya mila hai zindagi-e-be-sabaat se
kaliyon se puchh ghuncha-e-rangin-ada se puchh
aasi ki kya shanakht hai masum ki hai kya
ye baat bargah-e-saza-o-jaza se puchh
itni kadi thi dhup tere raste mein kyun
'hadi' ye aaj khaliq-e-karbobala se puchh

chhuT ke ye qaid-e-makan se la-makan tak jaegi

chhut ke ye qaid-e-makan se la-makan tak jaegi
bahr-e-dil ki mauj bahr-e-be-karan tak jaegi
ek zara mahmez kar phir dekh is ke baal-o-par
fikr ki parwaz baam-e-asman tak jaegi
chupke chupke hi bhadak uthenge jab andoh-e-gham
chupke chupke aanch bhi qalb-e-tapan tak jaegi
tum jalao to sahi rasikh yaqin ki mishalen
jurat-e-dil wadi-e-azm-e-jawan tak jaegi
puchhta phirta hun main har rah se diwana-war
zist aai hai kahan se aur kahan tak jaegi
main khulus-e-dil se 'hadi' jab pukarunga use
har sada-e-na-tawan us ke makan tak jaegi

charcha is ek baat ka dasht-o-daman mein tha

charcha is ek baat ka dasht-o-daman mein tha
kis ka latif hath zuhur-e-chaman mein tha
kanta tha husn-e-zat ka karta na kyun khalish
yak-guna haz-o-lutf bhi lekin chubhan mein tha
us shakhs ke zamir ne kar li thi khud-kushi
pauda hawas ka jis ki tamanna ke ban mein tha
sayyara-e-gunah ka saya jidhar pada
tare siyah-posh the suraj gahan mein tha
yalghaar kar rahi thi mozahim pe dam-ba-dam
kis darja garm khun ana ke badan mein tha
go meri baat par use 'hadi' yaqin to tha
shak-o-guman ka rang bhi us ke chalan mein tha