andheri raat hai rasta sujhai de to chalen

By

andheri raat hai rasta sujhai de to chalen
sar-e-falak koi tara dikhai de to chalen
ruke hain yun ki salasil pade hain panw mein
zamin band-e-wafa se rihai de to chalen
kisi taraf se to koi bulawa aa jae
koi sada sar-e-mahshar sunai de to chalen
safar pe niklen magar samt ki khabar to mile
koi kiran koi jugnu dikhai de to chalen
abhi to sar pe kadi dopahar ka pahra hai
shafaq zamin ko rang-e-hinai de to chalen

bala ki dhup thi sari faza dahakti rahi

By

bala ki dhup thi sari faza dahakti rahi
magar wafa ki kali shakh par chatakti rahi
bichhadte waqt mein us ko dilasa deta raha
wo be-zaban thi mujhe bebasi se takti rahi
use khabar thi ki hum ahl-e-dasht pyase hain
jabhi to mauj kinaron se sar patakti rahi
alam-nasib to ro ro ke so gae aakhir
magar malul hua raat bhar sisakti rahi
dam-e-judai wo maryam salib ki manind
mere gale se badi der tak latakti rahi
main aisi rah pe nikla ki meri khush-bakhti
tamam umr meri khoj mein bhatakti rahi