sair ke qabil hai dil-sad-para us naKHchir ka

By

sair ke qabil hai dil-sad-para us nakhchir ka
jis ke har tukde mein ho paiwast paikan tir ka
sab khula bagh-e-jahan illa ye hairan-o-khafa
jis ko dil samjhe the hum so ghuncha tha taswir ka
bu-e-khun se ji ruka jata hai ai baad-e-bahaar
ho gaya hai chaak dil shayad kaso dil-gir ka
kyunke naqqash-e-azal ne naqsh abru ka kiya
kaam hai ek tere munh par khinchna shamshir ka
rahguzar sail-e-hawadis ka hai be-buniyaad-e-dahr
is kharabe mein na karna qasd tum tamir ka
bas tabib uth ja meri baalin se mat de dard-e-sar
kaam yan aakhir hua ab faeda tadbir ka
nala-kash hain ahd-e-piri mein bhi tere dar pe hum
qadd-e-kham-gashta hamara halqa hai zanjir ka
jo tere kuche mein aaya phir wahin gada use
tishna-e-khun mein to hun us khak-e-daman-gir ka
khun se mere hui yak-dam khushi tum ko to lek
muft mein jata raha ji ek be-taqsir ka
lakht-e-dil se jun chhidi phulon ki gundhi hai wale
faeda kuchh ai jigar is aah-e-be-tasir ka
gor-e-majanun se na jawenge kahin hum be-nawa
aib hai hum mein jo chhoden dher apne pir ka
kis tarah se maniye yaro ki ye aashiq nahin
rang uda jata hai tak chehra to dekho 'mir' ka

raat se aansu meri aankhon mein phir aane laga

By

raat se aansu meri aankhon mein phir aane laga
yak ramaq ji tha badan mein so bhi ghabrane laga
wo ladakpan se nikal kar tegh chamkane laga
khun karne ka khayal ab kuchh use aane laga
lal-e-jaan-bakhsh us ke the poshida jun aab-e-hayat
ab to koi koi in honthon pe mar jaane laga
haif main us ke sukhan par tuk na rakkha gosh ko
yun to naseh ne kaha tha dil na diwane laga
habs-e-dam ke mo'taqid tum hoge shaikh-e-shahr ke
ye to albatta ki sun kar lan dam khane laga
garm milna us gul-e-nazuk-tabiat se na ho
chandni mein raat baitha tha sau murjhane laga
aashiqon ki paemali mein use israr hai
yani wo mahshar-khiram ab panw phailane laga
chashmak us mah ki si dilkash did mein aai nahin
go sitara subah ka bhi aankh jhapkane laga
kyunkar us aaina-ru se 'mir' maliye be-hijab
wo to apne aks se bhi dekho sharmane laga

mujh sa betab howe jab koi

By

mujh sa betab howe jab koi
be-qarari ko jaane tab koi
han khuda maghfirat kare us ko
sabr marhum tha ajab koi
jaan de go masih par us se
baat kahte hain tere lab koi
baad mere hi ho gaya sunsan
sone paya tha warna kab koi
us ke kuche mein hashr the mujh tak
aah-o-nala kare na ab koi
ek gham mein hun main hi aalam mein
yun to shadan hai aur sab koi
na-samajh yun khafa bhi hota hai
mujh se mukhlis se be-sabab koi
aur mahzun bhi hum sune the wale
'mir' sa ho sake hai kab koi
ki talaffuz tarab ka sun ke kahe
shakhs hoga kahin tarab koi

mashhur chaman mein teri gul pairahani hai

By

mashhur chaman mein teri gul pairahani hai
qurban tere har uzw pe nazuk-badani hai
uryani-e-ashufta kahan jae pas-az-marg
kushta hai tera aur yahi be-kafni hai
samjhe hai na parwana na thame hai zaban shama
wo sokhtani hai to ye gardan-zadani hai
leta hi nikalta hai mera lakht-e-jigar ashk
aansu nahin goya ki ye hire ki kani hai
bulbul ki kaf-e-khak bhi ab hogi pareshan
jame ka tere rang sitamgar chimani hai
kuchh to ubhar ai surat-e-shirin ki dikhaun
farhad ke zimme bhi ajab koh-kani hai
hon garm-e-safar sham-e-ghariban se khushi hon
ai subh-e-watan tu to mujhe be-watani hai
har-chand gada hun main tere ishq mein lekin
in bul-hawason mein koi mujh sa bhi ghani hai
har ashk mera hai dur-e-shahwar se behtar
har lakht-e-jigar rashk-e-aqiq-e-yamani hai
bigdi hai nipat 'mir' tapish aur jigar mein
shayad ki mere ji hi par ab aan bani hai

laKHt-e-jigar to apne yak-laKHt ro chuka tha

By

lakht-e-jigar to apne yak-lakht ro chuka tha
ashk-e-faqat ka jhamka aankhon se lag raha tha
daman mein aaj dekha phir lakht main le aaya
tukda koi jigar ka palkon mein rah gaya tha
us qaid-e-jeb se main chhota junun ki daulat
warna gala ye mera jun tauq mein phansa tha
musht-e-namak ki khatir is waste hun hairan
kal zakhm-e-dil nihayat dil ko mere laga tha
ai gard-baad mat de har aan arz-e-wahshat
main bhi kasu zamane is kaam mein bala tha
bin kuchh kahe suna hai aalam se main ne kya kya
par tu ne yun na jaana ai bewafa ki kya tha
roti hai shama itna har shab ki kuchh na puchho
main soz-e-dil ko apne majlis mein kyun kaha tha
shab zakhm-e-sina upar chhidka tha main namak ko
nasur to kahan tha zalim bada maza tha
sar mar kar hua tha main khak us gali mein
sine pe mujh ko us ka mazkur naqsh-e-pa tha
so bakht-e-tira se hun pamali-e-saba mein
us din ke waste main kya khak mein mila tha
ye sar-guzasht meri afsana jo hui hai
mazkur us ka us ke kuche mein ja-ba-ja tha
sun kar kisi se wo bhi kahne laga tha kuchh kuchh
be-dard kitne bole han us ko kya hua tha
kahne laga ki jaane meri bala azizan
ahwal tha kisi ka kuchh main bhi sun liya tha
aankhen meri khulin jab ji 'mir' ka gaya tab
dekhe se us ko warna mera bhi ji jala tha

kiya maine ro kar fishaar-e-gareban

By

kiya main ne ro kar fishaar-e-gareban
rag-e-abr tha tar-tar-e-gareban
kahin dast-e-chaalak nakhun na lage
ki sina hai qurb-o-jawar-e-gareban
nishan ashk-e-khunin ke udte chale hain
khizan ho chali hai bahaar-e-gareban
junun teri minnat hai mujh par ki tu ne
na rakkha mere sar pe bar-e-gareban
ziyarat karun dil se khasta-jigar ki
kahan hogi yarab mazar-e-gareban
kahin jae ye daur-e-daman bhi jaldi
ki aakhir hua rozgar-e-gareban
phirun 'mir' uryan na daman ka gham ho
na baqi rahe khar-khar-e-gareban