satata wo agar fitrat se haT ke

By

satata wo agar fitrat se hat ke
to patthar marta main bhi palat ke
jo main ne intizar-e-yar khincha
mera ghar ban gai duniya simat ke
bahut kuchh hai nafas ki anjuman mein
magar main ji raha hun sab se hat ke
main un khamoshiyon mein rah raha hun
jahan aati hain aawazen palat ke
diye ki lau zara jo dagmagai
zamin par aasman aaya jhapat ke
ye sach hai main wahi hun tu wahi hai
magar ab sans le kuchh dur hat ke
guzara din mashaqqat karte karte
guzari raat patthar se lipat ke
tere bare mein soche ja raha hun
magar ab lag rahe hain dil ko jhatke

wo hai aag wo pani hai

By

wo hai aag wo pani hai
sab ki ek kahani hai
un khandaraat ke niche bhi
jari naql-e-makani hai
koi meri umr batae
bachpan hai ki jawani hai
aaine hain gard-alud
aur khitta barani hai
ghar ka naqsha hai tayar
ab zanjir banani hai
hath hamare zakhmi hain
aur chattan girani hai
koi sapna bhi dekho
virani virani hai
mere ghar ka sannata
meri hi be-dhyani hai
hijr ko hijr na kahna bhi
'mohsin' be-imani hai

tere gham ka tadaruk kiya to hamein sharm aa jaegi aur mar jaenge

By

tere gham ka tadaruk kiya to hamein sharm aa jaegi aur mar jaenge
khwab-awar dawa hum ne le li to phir nind ke kizb se zakhm bhar jaenge
saaten be-sabaati ki aulad hain aur sayyaad hain is liye aao hum
waqt ko tod den warna sab kaam ki raaten dhal jaengi din guzar jaenge
tum yunhi ishq ke zor par khud ko rakkhe raho aur hanste sanwarte raho
dekhna ek din hum kisi mod par apne ham-zad ko zer kar jaenge
ranjishen dil mein rakhna buri baat hai kyun na phir ibtida se mohabbat karen
aao pahle sanwaren shab-e-gham ko hum waqt hoga to khud bhi sanwar jaenge
ye koi baat hai utni phaili hui zindagi mein faqat ek tera intizar
muntazir to tere hum rahenge magar kaise kaise hamare safar jaenge
ajnabi-pan ki lau se nikalti hui aashnai ki larzan tapish aur hum
aisa lagta hai goya jhijhakte hue dusre khwab mein phir utar jaenge
kar-e-duniya karen kuchh adawat to ho tuk tabiat badalne ki surat to ho
hum agar khud se ladte-jhagadte rahe zindagi ke anasir bikhar jaenge
pahle to shahr mein itne raste na the itni galiyan na thin mod itne na the
hum akele khade hain pareshan hain aur aage badhe to kidhar jaenge
phir achanak hi hum umr ke na-tawan hath mein aaina dekh kar ro pade
aaj tak bas yahi soch kar khush rahe wo bulaega hum us ke ghar jaenge

sar uThaya ishq ne to choT ek bhaari paDi

By

sar uthaya ishq ne to chot ek bhaari padi
ja ke is ke paon 'mohsin' apni khuddari padi
ab jo dekha donon hi na-qabil-e-tafsir the
raat ke jage huon par raushni bhaari padi
chahne walon ko hi hona pada hai sangsar
zinda rahne walon par hi zindagi bhaari padi
mere dukh ko ek hi pahlu ki lazzat thi aziz
ab jo karwat li to mujh pe aa ke bedari padi
wo samundar wo hawaen wo tazabzub aur wo aankh
jaan se jaane gae the aur gale yari padi
aashna hone se pahle ajnabi-pan kha gaya
ghar se pahle raste mein ghar ki rahdari padi
in dinon shayad main apni dastaras se dur hun
aaj to us ki nazar dil par mere kari padi

sailabon ke baad hum aise diwane ho jate hain

By

sailabon ke baad hum aise diwane ho jate hain
apne ghar se us ke ghar tak pahron daud lagate hain
hum ne apne hath zamin mein dab rakhe hain is dar se
dast-e-talab phailane wale diwane kahlate hain
un aankhon ki sewa kar ke hum ne jadu sikh liya
jab bhi tabiat ghabraati hai patthar ke ho jate hain
apne hijr ki baat alag hai apna ishq musalsal hai
khud se bichhadne lagte hain to us ke ghar ho aate hain
aadhi raat ko hasti ka mafhum samajh mein aata hai
baam-o-dar ke sannate jab aapas mein takraate hain
jaane kitni gard jami ho khadd-o-khal pe raston ki
is dar se hum apne ghar mein dastak de kar jate hain
ab us par ilzam rakhe ye khalq-e-khuda to kya kahiye
hum to us ki baaten kar ke apna dil bahlate hain
jis din us ki yaad aati hai jit si apni hoti hai
rasta rasta kucha kucha parcham se lahraate hain
pahle purwai se dil mein ek kasak si uthti thi
ab ye mausam kuchh nahin karte lekin khwab dikhate hain
main ne apne josh mein aa kar raqs kiya tha khud 'mohsin'
lekin meri basti wale us ka nam batate hain