tawahhum

By

un ke lahje mein wo kuchh loch wo jhankar wo ras
ek be-qasd tarannum ke siwa kuchh bhi na tha
kanpte honton mein uljhe hue mubham fiqre
wo bhi andaz-e-takallum ke siwa kuchh bhi na tha
saikdon tisen nazar aati thin jis mein mujh ko
wo bhi ek sada tabassum ke siwa kuchh bhi na tha
sard o tabinda si peshani wo machle hue ashk
din mein nur-e-mah-o-anjum ke siwa kuchh bhi na tha
tund aahon ke dabane mein wo sine ka ubhaar
ek yunhi se talatum ke siwa kuchh bhi na tha
main ne jo dekha tha, jo socha tha, jo samjha tha
hae 'jazbi' wo tawahhum ke siwa kuchh bhi na tha

tawaif

By

apni fitrat ki bulandi pe mujhe naz hai kab
han teri past-nigahi se gila hai mujh ko
tu gira degi mujhe apni nazar se warna
tere qadmon pe to sajda bhi rawa hai mujh ko
tu ne har aan badalti hui is duniya mein
meri paindagi-e-gham ko to dekha hota
kaliyan be-zar hain shabnam ke talawwun se magar
tu ne is dida-e-pur-nam ko to dekha hota
hae jalti hui hasrat ye teri aankhon mein
kahin mil jae mohabbat ka sahaara tujh ko
apni pasti ka bhi ehsas phir itna ehsas
ki nahin meri mohabbat bhi gawara tujh ko
aur ye zard se rukhsar ye ashkon ki qatar
mujh se be-zar meri arz-e-wafa se be-zar

mutraba

By

naghma-e-pur-kaif lab par dast-e-nazuk saz par
mutriba qurban ho jaun main is andaz par
gate gate ek ada ke sath ruk jaana tera
phir usi lai main usi andaz se gana tera
ruth kar man kar laja kar muskura kar naz se
khinch di taswir har jazbe ki sau andaz se
chitwanon se gah barsa din bala ki shokhiyan
gah bhar lin mast aankhon mein haya ki bijliyan
gah abru khanjar-e-saffak ho kar rah gae
gah aariz ashk se namnak ho kar rah gae