sari daulat tere qadmon mein paDi lagti hai

By

sari daulat tere qadmon mein padi lagti hai
tu jahan hota hai qismat bhi gadi lagti hai
aise roya tha bichhadte hue wo shakhs kabhi
jaise sawan ke mahine mein jhadi lagti hai
hum bhi apne ko badal dalenge rafta rafta
abhi duniya hamein jannat se badi lagti hai
khushnuma lagte hain dil par tere zakhmon ke nishan
beach diwar mein jis tarah ghadi lagti hai
tu mere sath agar hai to andhera kaisa
raat khud chand sitaron se jadi lagti hai
main rahun ya na rahun nam rahega mera
zindagi umr mein kuchh mujh se badi lagti hai

phir se badal ke miTTi ki surat karo mujhe

By

phir se badal ke mitti ki surat karo mujhe
izzat ke sath duniya se rukhsat karo mujhe
main ne to tum se ki hi nahin koi aarzu
pani ne kab kaha tha ki sharbat karo mujhe
kuchh bhi ho mujh ko ek nai shakl chahiye
diwar par bichhao mujhe chhat karo mujhe
jannat pukarti hai ki main hun tere liye
duniya ba-zid hai mujh se ki jannat karo mujhe

mahfil mein aaj marsiya-KHwani hi kyun na ho

By

mahfil mein aaj marsiya-khwani hi kyun na ho
aankhon se bahne dijiye pani hi kyun na ho
nashshe ka ehtimam se rishta nahin koi
paigham us ka aae zabani hi kyun na ho
aise ye gham ki raat guzarna muhaal hai
kuchh bhi suna mujhe wo kahani hi kyun na ho
koi bhi sath deta nahin umr-bhar yahan
kuchh din rahegi sath jawani hi kyun na ho
is tishnagi ki qaid se jaise bhi ho nikal
pine ko kuchh bhi chahiye pani hi kyun na ho
duniya bhi jaise tash ke patton ka khel hai
joker ke sath rahti hai rani hi kyun na ho
taswir us ki chahiye har haal mein mujhe
pagal ho sar-phiri ho diwani hi kyun na ho
sona to yar sona hai chahe jahan rahe
biwi hai phir bhi biwi purani hi kyun na ho
ab apne ghar mein rahne na denge kisi ko hum
dil se nikal denge nishani hi kyun na ho

kisi gharib ki barson ki aarzu ho jaun

By

kisi gharib ki barson ki aarzu ho jaun
main is surang se niklun tu aab-ju ho jaun
bada hasin taqaddus hai us ke chehre par
main us ki aankhon mein jhankun to ba-wazu ho jaun
mujhe pata to chale mujh mein aib hain kya kya
wo aaina hai to main us ke ru-ba-ru ho jaun
kisi tarah bhi ye viraniyan hon khatm meri
sharab-khane ke andar ki haw-hu jaun
meri hatheli pe honton se aisi mohr laga
ki umr-bhar ke liye main bhi surkh-ru ho jaun
kami zara si bhi mujh mein na koi rah jae
agar main zakhm ki surat hun to rafu ho jaun
nae mizaj ke shahron mein ji nahin lagta
purane waqton ka phir se main lucknow ho jaun