aankhen hain surKH honT siyah rang zard hai

By

aankhen hain surkh hont siyah rang zard hai
har shakhs jaise mere qabile ka fard hai
jab main na tha to meri zamane mein gunj thi
ab main hun aur sare zamane ka dard hai
suraj mein aaj jitni tapish hai kabhi na thi
kya kijiye ki khun hi rag o pai mein sard hai
hum kis safar pe nikle ki shaklen badal gain
chehre pe jis ke dekho masafat ki gard hai
chalta rahe jo aabla-pai ke bawajud
manzil ka mustahiq wahi sahra-naward hai
aisa na ho sahar meri binai chhin le
bedariyon se ab meri aankhon mein dard hai
bikhra hua hun khwahish-o-hasrat ke darmiyan
jaise mera wajud abhi fard fard hai

hamare qaul o amal mein tazad kitna hai

By

hamare qaul o amal mein tazad kitna hai
magar ye dil hai ki khush-e'tiqad kitna hai
ki jaise rang hi le aaega lahu apna
wafa pe apni hamein e'timad kitna hai
ye jaanta hai ki wada-shikan hai wo phir bhi
dil us ke wada-e-farda pe shad kitna hai
wo jis ne mujh ko faramosh kar diya yaksar
wo shakhs mujh ko magar ab bhi yaad kitna hai
hai ab to sare marasim ka inhisar us par
kisi ki zat se hum ko mafad kitna hai
har ek soch hai aaluda-e-hawas yaro
ragon mein qatra-e-khun ka fasad kitna hai
hai yun to mere raqibon mein ikhtilaf bahut
mere khilaf magar ittihad kitna hai

ham-zamiron se jo bhaTkae wo eazaz na de

By

ham-zamiron se jo bhatkae wo eazaz na de
shauq se tu mujhe ab quwwat-e-pardaz na de
daere tut na jaen mere khwabon ke kahin
so gaya hun mujhe ab koi bhi aawaz na de
tujh ko dena hai agar talkhi-e-anjam ka zahr
dene wale mujhe khush-fahmi-e-aghaz na de
raaz-daron ka kaha man ke ye haal hua
mashwara koi mujhe ab mera hamraaz na de
ya fazaon ko muhit-e-mah-o-khurshid na kar
ya meri fikr ko tu jurat-e-parwaz na de
ya zamane ko tu mahrum-e-samaat kar de
ya mujhe dard mein dubi hui aawaz na de