shab-e-hijr sahra-e-zulmat nikli

shab-e-hijr sahra-e-zulmat nikli
main jab aankh kholi bahut raat nikli
mujhe galiyan de gaya wo sarihan
mere munh se hargiz na kuchh baat nikli
hua wadi-e-qatl sahra-e-mahshar
meri nash jab roz-e-miqat nikli
kami kar gaya naz-e-pinhan ka khanjar
na jaan tere bismil ki haihat nikli
tu ai 'mushafi' ab to garm-e-sukhan ho
shab aai daraaz aur barsat nikli

kis rah gaya laila ka mahmil nahin malum

kis rah gaya laila ka mahmil nahin malum
hai baadiya reg aur hamein manzil nahin malum
main hashr ke din dawa khun kis se karunga
wo kushta hun jis kushta ka qatil nahin malum
niklen hain mere dil ke tadapne mein adaen
hai kis ki nigahon ka ye bismil nahin malum
tha ru-e-dil-e-khasta to shab meri taraf ko
kab ho gaya mizhgan ke muqabil nahin malum
wo bahr hai dariya-e-sarishk apna ki jis ka
pahna hi nazar aawe hai sahil nahin malum
mar jaun ki jita rahun main hijr mein tere
kis chiz ka khwahan hai mera dil nahin malum
aankhon se guzara hai jo yun lakht jigar ka
aate hain chale kis ke ye ghael nahin malum
kya jaaniye kya us mein teri aankhon ne dekha
kyun ho gain aaine ki mail nahin malum
ai 'mushafi' afsos ki is hasti pe hum ko
tahsil-e-wafadari ka hasil nahin malum

in aankhon se aab kuchh na nikla

in aankhon se aab kuchh na nikla
ghair-az khun-nab kuchh na nikla
bose ka kya sawal lekin
us munh se jawab kuchh na nikla
baham hui yun to did-wa-did
par dil ka hijab kuchh na nikla
juz teri hawa ke apne sar mein
manind-e-habab kuchh na nikla
karta tha bahut sa mujh pe dawa
par waqt-e-hisab kuchh na nikla
sine mein jo dil ki ki tafahhus
juz dud-e-kabab kuchh na nikla
hum samajhte the jis ko 'mushafi' yar
wo khana-kharab kuchh na nikla

dekh usko ek aah humne kar li

dekh us ko ek aah hum ne kar li
hasrat se nigah hum ne kar li
kya jaane koi ki ghar mein baithe
us shokh se rah hum ne kar li
bande pe na kar karam ziyaada
bas bas teri chah hum ne kar li
jab us ne chalai tegh hum par
hathon ki panah hum ne kar li
nakhwat se jo koi pesh aaya
kaj apni kulah hum ne kar li
zulf-o-rukh-e-mahwashan ki daulat
sair-e-shab-e-mah hum ne kar li
kya der hai phir ye abr-e-rahmat
takhti to siyah hum ne kar li
di zabt mein jab ki 'mushafi' jaan
sharm us ki gawah hum ne kar li