tinkon ke arman labbaik labbaik

By

tinkon ke arman labbaik labbaik
tufan tufan labbaik labbaik
be-dast-o-pa main be-dast-o-pa tu
jangal bayaban labbaik labbaik
wahshat ki basti kotah-dasti
mera gareban labbaik labbaik
aazad-dida mardum-guzida
aaina hairan labbaik labbaik
titli shagufe jugnu sitare
sab teri pahchan labbaik labbaik
uncha hua sar neza-ba-neza
yaron ka ehsan labbaik labbaik

sukha banjh mahina maula pani de

By

sukha banjh mahina maula pani de
sawan pite sina maula pani de
sari jhilen dhul udane walon ki
andha har aaina maula pani de
dariya neki sukhi kheti khud-gharzi
bhuka pet kamina maula pani de
faslen aate jate lashkar katega
apne bhag pasina maula pani de
machhli hanp rahi hai sansen lene ko
kichad mein kya jina maula pani de
mitti par bauchhaar 'muzaffar' sheron ki
dana mul nagina maula pani de

shamiyane meri ghibat mein hawa tanti hai

By

shamiyane meri ghibat mein hawa tanti hai
ganw mein mere na hone se badi shanti hai
wo bagula hai ki udne pe sada aamada
main jo mitti hun to mitti bhi kahan manti hai
dekhna kaise humakne lage sare patthar
meri wahshat ko tumhaari gali pahchanti hai
phul banti hai kali hanste-hansate lekin
us ke dil pe jo guzarti hai wahi jaanti hai
meri koshish hai ki duniya ko bana dun firdaus
aur duniya mujhe nakaron mein gardanti hai
hum ko ek haal mein qismat nahin rahne deti
kabhi mitti mein milati hai kabhi chhanti hai

laiq-e-did wo nazara tha

By

laiq-e-did wo nazara tha
lakh neze the sar hamara tha
ek aandhi si kyun badan mein hai
us ne shayad hamein pukara tha
shukriya reshmi dilase ka
tir to aap ne bhi mara tha
baadban se ulajh gaya langar
aur do hath par kinara tha
sahibo baat dastaras ki thi
ek jugnu tha ek sitara tha
aasman bojh hi kuchh aisa hai
sar jhukana kise gawara tha
ab namak tak nahin hai zakhmon par
doston se bada sahaara tha

basaraton pe bhanwar inkishaf karta hai

By

basaraton pe bhanwar inkishaf karta hai
ki bulbule ka samundar tawaf karta hai
ajib bhul-bhulayyan hai justuju khud ki
har ek naqsh-e-qadam inhiraf karta hai
maza to jab hai ki hum us ko na khuda kar len
hawa ka rukh jo hamare khilaf karta hai
jise gunah ki taufiq hi na ho ta-umr
use khuda na zamana muaf karta hai
lahu ki mar se bachiye ki josh mein aae
to qatra qatra badan mein shigaf karta hai
bala se rang-e-taghazzul meri ghazal mein nahin
nukila lahja ghutan ko to saf karta hai

bane hue hain fasil-e-nazar dar-o-diwar

By

bane hue hain fasil-e-nazar dar-o-diwar
har ek taraf dar-o-diwar par dar-o-diwar
mujhe bhi dar-ba-dari mein hi lutf aata hai
meri bala se faraham na kar dar-o-diwar
hamare ghar mein to minar ban gai har int
chhaton ki had mein uthate hain sar dar-o-diwar
ghata ka kya hai baras kar nikal gai aage
yahan sisakte rahe raat bhar dar-o-diwar
hamare raaz mein shamil rahe padosi bhi
isi liye to hain diwar-o-dar dar-o-diwar
khabar na phailne pae ki ja raha hai koi
nahin to sar pe utha lenge ghar dar-o-diwar
tera badan to salamat hai ai 'muzaffar' phir
ye kis ke khun se hain tar-ba-tar dar-o-diwar