ummid

thahro zara main aati hun
suraj se nur ki kirnen le kar
kisi masum tifl ke labon se hansi le kar
kisi khushbu bhare jangal se
titliyan pakad kar lati hun
tum thahro
main aati hun
sham ke dhalte manzar-name se
main to jugnu pakadne
hamesha tanha hi jati hun
raat aae to mat darna
sitaron se raste puchh kar
tum ko batati hun
khwab bhari un aankhon ke waste
nind bhi lati hun
tum thahro
main aati hun

octopus

mazhab ka octopus
pakad leta hai fard ko
us ke bazu phail jate hain
har masam har uzw par
ye hawi ho jata hai
har har sans par
ifrit ban kar nigal leta hai
jazbaat ke reshmi thanon ko
masal kar rakh deta hai
dil-sokhta ki har khwahish ko
silen rakh deta hai dil-e-nazuk par
upar se niche tak
be-shumar be-hisab
jo machle shikar us ka
aur sakht ho jati hai
giraft us ki
zara si kushadgi bhi nahin bhati us ko
mohabbat ki sadgi
kahan pasand aati hai us ko
us ki qumchi har waqt barasne ko tayyar hai
jazbaat ke khel mein
fard ka ehsas
kyun hai qabil-e-etiraaz

bandiyan

mere malik
kya hum bandiyan hain
jo aag mein jala kar mar di jaen
hum wo jawaniyan hain
mohabbat ke nam par jo masal di jaen
hum wo kaliyan hain
hawas ka nishana bana kar
jin ke par noch liye jaen
hum wo titliyan hain
jo maslahat ke nam par
qurban kar di jaen hum wo betiyan hain
jo sharai jaedad se mahrum kar di jaen hum wo bahnen hain
mere malik
kyun hum bandiyan hain

wo ghar tinkon se banwaya gaya hai

wo ghar tinkon se banwaya gaya hai
wahan har khwab dafnaya gaya hai
meri ulfat ko kya samjhega koi
sabaq nafrat ka dohraya gaya hai
mere andar ka chehra mukhtalif hai
badan pe aur kuchh paya gaya hai
hui hai zindagi uftad aise
hawas mein har maza paya gaya hai
kahi aisi hai 'amabar' us ki har baat
shikasta-dil ko tadpaya gaya hai

mujh mein soe hue mahtab se kam waqif hai

mujh mein soe hue mahtab se kam waqif hai
tu meri aankh ke talab se kam waqif hai
bughz-e-ada khu-e-ahbab se kam waqif hai
jo mere halqa-e-arbab se kam waqif hai
satwat-e-qasr-e-shahi dhoke mein rakhta hai ki jo
azmat-e-gumbad-o-mehrab se kam waqif hai
ishq ki chahiye talim abhi aur use
jo mohabbat adab aadab se kam waqif hai
zist karne ko bahut chashm-e-fusun-kar mujhe
wo mere ishq ke zartab se kam waqif hai
manawi taur par us pe main mukammal na khuli
wo meri zat ke erab se kam waqif hai
tujh pe main kholungi ek din sabhi auraq-e-jamal
tu abhi husn ke abwab se kam waqif hai
kya banega jo na tal pai bala-e-furqat
hijr to wasl ke asbab se kam waqif hai
ek hi shakhs ka karti hai adab dhadkan bhi
dil to duniya tere aadab se kam waqif hai
itna poshida use rakkha hai 'amabar' sab se
aankh apni bhi mere khwab se kam waqif hai

kyun main bar-e-digar jaun

kyun main bar-e-digar jaun
phir se us ke dar jaun
tujh aankhon se jahan dekhun
be-rangi se dar jaun
tu chahe to ji utthun
tu chahe to mar jaun
main be-ant samundar hun
kaise dariya mein utar jaun
chadar-e-shab hun main teri
tu odhe to sanwar jaun
khwab na dekhun to 'amabar'
shayad main bhi mar jaun