sitare

ye hamari qismat ke
jitne bhi sitare hain
qudrat-e-ilahi ne
be-murad raston par bandh kar utare hain
jin ki apni manzil hi be-nishan raste hon
raushni jo ghairon se mustaar lete hon
kaise main yaqin kar lun
meri manzilon ke wo
mo'atabar ishaare hain
ye hamari qismat ke
jitne bhi sitare hain
sirf istiare hain

mohabbat mein KHuda bhi mubtala hai

mohabbat zindagi hai
mohabbat dil ki tera saaton mein raushni hai
ye viranon mein khud-raw naghmagi hai
mohabbat jurat-e-izhaar hai kirdar hai
mohabbat dida-e-bedar hai pindar hai
isar hai
mohabbat jaan deti hai
mohabbat man deti hai
mohabbat be-nishan rishton ko bhi pahchan deti hai
mohabbat aql bhi hai
mohabbat mawara-e-aql bhi hai
mohabbat hijr bhi hai wasl bhi hai
mohabbat pesh-raft-e-nasl bhi hai
mohabbat zakhm par marham
mohabbat sar-basar tarahhum
mohabbat mohtaram sach ka ilm zor-e-qalam
mohabbat kawish-e-paiham
mohabbat raaz yazdan kholti hai
mohabbat zarf-e-adam tolti hai
mohabbat khamushi mein bolti hai
mohabbat aarzu hai justuju hai rang-o-bu hai
mohabbat jit kar mitne ki khu hai
mohabbat haar kar bhi surkh-ru hai
mohabbat ibtida hai intiha hai
mohabbat bais-e-arz-o-sama hai
mohabbat mein khuda bhi mubtala hai

man

jin bachchon ko
apna sara jiwan de kar
pala posa
wo bachche jab dur gae hon
un ki rah takti rahti hai
un ki yaad mein kho jati hai
chupke chupke roti hai
rote rote so jati hai
man jab budhi ho jati hai