zarurat kuchh ziyaada ho na jae

By

zarurat kuchh ziyaada ho na jae
samundar aur gahra ho na jae
ye dhun ye mauj le dube na mujh ko
bagula gharq-e-sahra ho na jae
hawaen sar-barahna phir rahi hain
qaba-e-gul tamasha ho na jae
abhi kuchh tir tarkash mein bhi honge
purana zakhm achchha ho na jae
qayamat ki ghadi hai aaj suraj
sawa neze se uncha ho na jae
wahi imkan jis se dar rahe hain
wahi imkan paida ho na jae
meri har baat sachchi ho rahi hai
'najib' ek hashr barpa ho na jae

zard patton ko daraKHton se juda hona hi tha

By

zard patton ko darakhton se juda hona hi tha
hum ki dariya hain samundar ki ghiza hona hi tha
aur kab tak be-samar rakhti khizan pedon ke hath
rut badal jaana thi ye jangal hara hona hi tha
rokne se kab hawa ke narm jhonke ruk sake
band darwazon ko ek din nim-wa hona hi tha
dhul kab tak jhonke ek dusre ki aankh mein
ek din to jhut sach ka faisla hona hi tha
tez dhaaron se bichhad kar un kinaron par 'najib'
mauj-e-dariya ki tarah be-dast-o-pa hona hi tha

yaqin ne mujhko asir-e-guman na rahne diya

By

yaqin ne mujh ko asir-e-guman na rahne diya
ki us ne rabt koi darmiyan na rahne diya
meri nazar hi samundar ki aakhiri had thi
meri thakan ne mujhe par-fishan na rahne diya
kisi ne kashti utari to thi samundar mein
magar hawa ne koi baadban na rahne diya
koi to barf-ba-kaf dasht ki taraf aaya
kisi ne bahr mein pani rawan na rahne diya
har ek lafz mein yun kar diya lahu shamil
ki dastan ko faqat dastan na rahne diya
'najib' kis tarah jagen ki in andheron ne
sahar ka tara sar-e-asman na rahne diya

shab ke KHilaf barsar-e-paikar kab hue

By

shab ke khilaf barsar-e-paikar kab hue
hum log raushni ke talabgar kab hue
khushbu ki ghat mein hain shikari hawaon ke
jhonke magar kisi se giraftar kab hue
tabir ki ruton ne badan zard kar diye
phir bhi ye log khwab se bedar kab hue
tale laga liye hain khud apni zaban par
kya baat hai tum itne samajhdar kab hue
ye ahd apni ruh mein ahd-e-firaq hai
hum matla-e-sukhan pe numudar kab hue
khilat wasul karte hue sar utha liya
ruswa 'najib' hum sar-e-darbar kab hue

shab bhali thi na din bura tha koi

By

shab bhali thi na din bura tha koi
jaisa ji ko tere laga tha koi
ashk the kirchiyan thin aankhen thin
aaine se umand pada tha koi
tut kar kis ne kis ko chaha tha
kis ka malba utha raha tha koi
lakh aanchal hawa ke hath mein the
sar-barahna magar khada tha koi
apne hi sar mein dalne ke liye
khak apni uda raha tha koi
apni marzi se kaun qatl hua
apni marzi se kab jiya tha koi
hashr barpa tha mere dil mein 'najib'
khidkiyan kholne laga tha koi

ki KHud insan Dhalta ja raha hai

By

ki khud insan dhalta ja raha hai
khalandara sa koi bachcha hai dariya
samundar tak uchhalta ja raha hai
na kuchh kahta na kuchh sunta hai koi
faqat pahlu badalta ja raha hai
idhar milti nahin sanson se sansen
zamana hai ki chalta ja raha hai
nahin us ko khilaunon ki zarurat
wo ab khud hi bahalta ja raha hai
makanon mein nae rauzan bana lo
hawa ka rukh badalta ja raha hai
'najib' ab to sharar-e-be-hisi se
tera chehra pighalta ja raha hai