jahan jahan bhi hawas ka ye jaanwar jae

By

jahan jahan bhi hawas ka ye jaanwar jae
dilon se mehr-o-mohabbat ki fasl char jae
wahin se hun main jahan se dikhai deta hun
wahin talak hun jahan tak meri nazar jae
hudud-e-zat se aage khudaon ki had hai
main sochta hun agar zehn kaam kar jae
bhari padi hai ufunat se inch inch zamin
us ek phul se khushbu kidhar kidhar jae
wo baad-e-tund hai har ped ki ye koshish hai
hawa ke sath koi dusra shajar jae
'nasim' ganw ki masjid mein raat katega
ek ajnabi sa musafir hai kis ke ghar jae

itna na ghum raat ko phulon ki bas mein

By

itna na ghum raat ko phulon ki bas mein
soe pade hain chaaron taraf sanp ghas mein
har samt us ne aatishi shishe laga diye
sadkon pe log aae the kale libas mein
gardish mein zindagi rahi afwah ki tarah
umren guzar di gain khauf-o-hiras mein
agla nisab nur-e-basirat se padh liya
aankhen to chhod aae the pahli class mein
ye aur baat zer-e-zamin dafan ho gain
warna jadon ka khun hai phal ki mithas mein
ab bar bar us ki taraf dekhte ho kiya
ab sirf meri tishna-labi hai gilas mein
manzar kisi tilism ki zad mein na ho 'nasim'
sarson ka rang daud raha hai kapas mein

chhoTe baDe bure bhale din raat ke liye

By

chhote bade bure bhale din raat ke liye
har shai hai sirf surat-e-haalat ke liye
maujud hain is aaina-khana mein har taraf
mere hi aks meri mulaqat ke liye
jo baat sochne ki hai kab sochta hun mein
kab sochta hai koi meri zat ke liye
phirti hain dil mein suraten qurb-o-jawar ki
aabaad hai ye shahr mazafat ke liye
chhote se ped ki jaden jati hain dur dur
sahra mein rizq dhundne har pat ke liye
main ruk gaya chadhi hui naddi ke samne
kuchh waqt mere pas tha barsat ke liye
hum log hain salet pe likkhe hue 'nasim'
mitna padega agle sawalat ke liye

dost ban kar bhi kahin ghat laga sakti hai

By

dost ban kar bhi kahin ghat laga sakti hai
maut ka kya hai kisi rup mein aa sakti hai
in makanon mein ye dhadka sa laga rahta hai
agli barish dar-o-diwar gira sakti hai
tera din ho ki meri raat nahin ruk sakte
apne mehwar pe zamin khud ko ghuma sakti hai
aisi tartib se raushan hain teri mahfil mein
ek hi phunk charaghon ko bujha sakti hai
mera fan mere khad-o-khal pe taqsim hua
meri bini meri taswir bana sakti hai
fitratan us ki mahak chaaron taraf phailegi
phul se mauj-e-saba shart laga sakti hai
khush na ho itna ki yun raushaniyan phut paden
is chaka-chaund mein binai bhi ja sakti hai
gudgudahat mein 'nasim' us ne nahin socha tha
ye hansi tut ke bachche ko rula sakti hai

badan ka kaam thoDa hai magar mohlat ziyaada hai

By

badan ka kaam thoda hai magar mohlat ziyaada hai
so jo ghaflat ziyaada thi wahi ghaflat ziyaada hai
hamein is aalam-e-hijran mein bhi ruk ruk ke chalna hai
unhen jaane diya jae jinhen ujlat ziyaada hai
na jaane kab kisi chilman ka hum nuqsan kar baithen
hamein chehra-kushai ki zara rukhsat ziyaada hai
kabhi main khud ziyaada hun tan-e-tanha ki wahdat mein
kabhi meri zarurat se meri wahdat ziyaada hai
tujhe halqa-ba-halqa khinchte phirte hain duniya mein
so ai zanjir-e-pa yun bhi teri shohrat ziyaada hai
ye dil bahar dhadakta hai ye aankh andar ko khulti hai
hum aise marhale mein hain jahan zahmat ziyaada hai
main qarnon ki tarah bikhra pada hun donon waqton mein
meri jalwat ziyaada hai meri khalwat ziyaada hai
so hum fariyaadiyon ki ek apni saf alag se ho
hamara masala ye hai hamein hairat ziyaada hai