aap wo sab ki jaan lete hain

aap wo sab ki jaan lete hain
maut ko muft san lene hain
dil bhala aashiqon ke pas kahan
aap hi chhin-chhan lete hain
kya kahun kaun jaan leta hai
wo mere mehrban lete hain
mai-kade ke qarib hum waiz
teri zid se makan lete hain
ab to ye haal hai 'nasim' un ka
jo main kahna hun man lete hain

bahaar aai hai phir wahshat ke saman hote jate hain

bahaar aai hai phir wahshat ke saman hote jate hain
mere sine mein daghon ke gulistan hote jate hain
mujhe bachpan kar ke dil-dahi bhi hoti jati hai
jafaen karte jate hain pasheman hote jate hain
kahan jata hai ai dil shikwa-e-mehr-o-wafa karne
wahan be-dad karne ke bhi ehsan hote jate hain
'nasim'-e-zinda-dil marne lage hain khub-ruyon par
ghazab hai aise danish-mand nadan hote jate hain

ghair ke ghar ban ke Dali jaegi

ghair ke ghar ban ke dali jaegi
kyun-kar un ki id khali jaegi
aap ne bandhi hai kyun talwar aaj
kya meri hasrat nikali jaegi
phans chuka dil ho chuki aashuftagi
ab tabiat kya sambhaali jaegi
jaan ka dena mujhe manzur hai
un ki farmaish na tali jaegi
un pe zahir ho na ai dil shauq-e-marg
tegh gardan se utha li jaegi
dil ko wapas tum se kya mangenge hum
de chuke jo shai wo kya li jaegi
kyun na wo bechain hoenge 'nasim'
sayyadon ki aah khali jaegi

ghair ke ghar hain wo mehman baDi mushkil hai

ghair ke ghar hain wo mehman badi mushkil hai
jaan jaane ke hain saman badi mushkil hai
kahte hain aap hain jis baat ke talib hum se
hai wahi ghair ko arman badi mushkil hai
aur phir kis se kahun haal-e-pareshani-e-dil
tum to hote ho pareshan badi mushkil hai
be-mile kaam bhi chalta nahin milna bhi zarur
ghair se jaan na pahchan badi mushkil hai
us ne li jaan hazaron ki ye dam de de kar
hum pe marna nahin aasan badi mushkil hai
wo utha lete hain ye rakh rakh ke chhuri gardan par
kaam hota nahin aasan badi mushkil hai
raaz-e-dil us but-e-bad-khu se kahun ya na kahun
baat nazuk hai wo nadan badi mushkil hai
roz kahte ho ki tu kis ke liye hai betab
jaan kar bante ho anjaan badi mushkil hai
dosti sahal nahin us but-e-bad-khu se 'nasim'
zid na kar dekh meri jaan badi mushkil hai