naseh-e-mushfiq ye mashq-e-taza farmane lage

By

naseh-e-mushfiq ye mashq-e-taza farmane lage
din to tha ab raat ko bhi aa ke samjhane lage
hazrat-e-wais kahin daulat-sara ko jaiye
aate hi saman-e-mahshar aap dikhlane lage
aa gae jab yaad kuchh us rabt baham ke maze
dil bhar aaya dida-e-tar ashk barsane lage
phir subu undle bhare shishe hue labrez jam
laghzish-e-pa apni apni mast dikhlane lage
baghban hushiyar ho mushtaq-e-rukhsat hai bahaar
rang badla gulistan ka phul murjhane lage
jalwa-ha-e-husn chamke uth gae munh se naqab
turra-e-gesu ke baham sanp lahrane lage
hath utha ai chaaragar darman-e-be-tasir se
ja-e-ashk aankhon se ab lakht-e-jigar aane lage
khub roe dekh kar hum zewar-e-diwangi
jab ahibba panw mein zanjir pahnane lage
bhtiyan raushan huin chamki dukan-e-mai-farosh
rukhsat-e-tauba hui zuhhad ghabrane lage
fasl-e-gul aai badhe josh-e-junun ke walwale
di sada zanjir ne phir panw khujlane lage
mane-e-matlab hui wo sharam baham ai 'nasim'
wo ruke apni taraf hum aap sharmane lage

matam bahut raha mujhe ashk-e-chakida ka

By

matam bahut raha mujhe ashk-e-chakida ka
aakhir ko pas aa hi gaya nur dida ka
nam-firaq phir na liya main ne umr-bhar
tha zaiqa zaban pe azab-e-chashida ka
ab wo maza nahin lab-e-shirin ke qand mein
chusa hua hai ye kisi khidmat-rasida ka
ai charkh-e-pir-zor jawani se dar-guzar
ab pas chahiye tujhe pusht-e-khamida ka
abru mein kham jabin mein shikan aankh mein ghazab
kya muddaa hai qatil-e-khanjar-kashida ka
daulat gharaz na thi jo dua se hui husul
tha aur muddaa mere dast-e-kashida ka
ai sakinan-e-charkh-e-mualla bacho bacho
tufan hua buland mere aab-dida ka
wo na-tawaniyan hain ki jism-e-zaif par
jama hai ankabut ke dam-e-tanida ka
be-did did mein nahin aate kisi tarah
gham aashiyan hai tair-e-rang-parida ka
udte hain hosh koi bhala kis tarah sune
afsana tere wahshi-e-az-khud-ramida ka
o gul khayal hai araq-e-jism ka tere
shisha hai dil hamara gulab-e-chakida ka
yaad-e-nigah-e-mast se hai dil ko intishaar
paimana hai kharab sharab-e-chakida ka
qatil khuda se dar hawas-e-zabh ta-kuja
nala na sun kisi ke gulu-e-burida ka
masti ke walwalon ka jawani mein lutf hai
piri mein dhyan chahiye qadd-khamida ka
jalwe dikha raha hai ye farsh-e-zamurradin
sabza mazar par hai giyah-e-damida ka
chadhti hai roz chadar-e-gul jalte hain charagh
ye dher hai zarur kisi barguzida ka
baalon ko ai 'nasim' rangoge khizab se
sak ko asa banaoge pusht-e-khamida ka

lo zoaf se ab ye haal-e-tan hai

By

lo zoaf se ab ye haal-e-tan hai
saya mutajassis-e-badan hai
yahan tan hi nahin hai laghari se
hum ko kya hajat-e-kafan hai
misl-e-nikhat hain jama kaisa
apna to badan hi pairahan hai
hun bulbul-e-bostan-e-taswir
be-khauf-e-khizan mera chaman hai
hun kushta-e-tegh-e-sharm-e-jaanan
har zakhm ka be-zaban dhan hai
la-raib 'nasim'-dehlawi to
ustad-e-nazakat-e-sukhan hai

kahte hain sun ke tazkire mujh gham-rasida ke

By

kahte hain sun ke tazkire mujh gham-rasida ke
afsane kaun sunta hai haal-e-shunida ke
kya apni musht-e-khak ki hum justuju karen
milte nahin nishan ghubar-e-parida ke
main khak bhi hua na gai par kashidgi
ghusse wahi rahe mere daman-kashida ke
jo tum mein baat hai wo kisi aur mein kahan
jalwe kuchh aur hi hain gul-e-nau-damida ke
sailab-e-chashm-e-tar se zamana kharab hai
shikwe kahan kahan hain mere aab-dida ke
kuchh intiha nahin hai kahan tak sunaiye
qisse daraaz hain dil-e-na-armida ke
qatre mile jo tere pasine ke gul-badan
khwahan rahe na log gulab-e-chakida ke
aahon ki dhum hai kahin nalon ke gulgule
saman nae hain rose tere gham-kashida ke
aaram-gah-e-ashk hai viran ai junun
daman hain tar tar qaba-e-darida ke
o mast-e-naz kaif ye tere sukhan mein hai
dhoke kalam par hain sharab-e-chakida ke
lo aashiyan-e-tan ki taraf mel tak nahin
dekho mizaj tair-e-rang-parida ke
diwan mein wasf hai araq-e-jism-e-yar ka
mazmun kahan kahan hain gulab-e-chakida ke
mizhgan se bach 'nasim' ki abru ke pas hain
ye tir-e-be-khata hain kaman-e-kashida ke

hathon mein aaj ki shab mehndi lagaiyega

By

hathon mein aaj ki shab mehndi lagaiyega
samjhe ye rang hum bhi kuchh rang laiyega
ye shokhiyan tumhaari likkhi hui hain dil par
aakhir kabhi to mere qabu mein aaiyega
phir main bhi kuchh kahunga dekho zaban roko
phir munh chhupa ke mujh se aansu bahaiyega
zat-e-sharif ho tum main khub jaanta hun
tufan aur koi mujh par uthaiyega
han shama ka main gul hun naseh ki guftugu hun
badh jaunga jahan tak mujh ko ghataiyega
ummid-war baqi kuchh aur rah gae hain
phir bhi naqab-e-gesu munh se hataiyega
be-wajh ye nahin hai andaz guftugu ka
phir kal ki tarah ai jaan baaten sunaiyega
main hun mizaj-qatil lazim hai khauf mujh se
jhuti qasam nahin hun har-dam jo khaiyega
ye kyun hai na-umidi dargah-e-kibriya se
jo kuchh ki aarzu hai waisa hi paiyega
mushtaq ne to jaan di gul-gu libas kyun ho
ye rang-e-nau-arusi kis ko dikhaiyega
dekho raqib aae dekho raqib aae
kya munh ab aap ka hai jo munh chhupaiyegaga
hum khub jaante hain ustadiyan tumhaari
mahfil mein baithe baithe aankhen milaiyega
aakhir kuchh intiha bhi be-rahmiyon ki sahab
kahiye to aashiqon ko kab tak sataiyega
mumkin nahin jo niyyat badle tumhaari ai jaan
kya qahr aaj ki shab hum par na laiyega
kuchh lahza aur thahro ta-ruh tan se nikle
aaegi aur aafat gar aap jaiyega
samjhe hue hain jo kuchh dil mein bhare hue hai
kahe ko aaiyega kahe ko aaiyega
aao to jald aao dam-bhar ke baad ai jaan
mujh ko na paiyega mujh ko na paiyega
sun lijiyega jo kuchh muddat se aarzu hai
fursat ho gar mayassar dam-bhar ko aaiyega
kuchh dur main nahin hun lazim hai yaad karni
manind-e-dil mujhe bhi pahlu mein paiyega
thandi kabhi na hongi kya garmiyan tumhaari
aakhir 'nasim' ka dil kab tak jalaiyega

haqiqat se zaban aagah kar le

By

haqiqat se zaban aagah kar le
ye ism-e-allah bismillah kar le
dhun se dur kar qufl dui ko
zaban miftah-e-il-lallah kar le
kudurat dil se kho lahw-o-lab ki
saadat se safa hai rah kar le
mubarakbaad aish-o-jah-o-daulat
hazuz-e-umr khatir-khwah kar le
kahan fursat zaman-e-kashmakash mein
munasib hai abhi kuchh rah kar le
jise dekha na dekh us ko kabhi tu
na dekha jis ko us ki chah kar le
sakha himmat murawwat hain tere pas
koi hamrah tu hamrah kar le
bhulawa hai tilism-e-zindagani
wida-e-hubb-e-uzw-e-jah kar le
'nasim'-dehlawi ye aarzu hai
kahin apna mujhe allah kar le