qurban ho rahi hai meri jaan idhar-udhar

By

qurban ho rahi hai meri jaan idhar-udhar
wan rah pe hai jo zulf-e-pareshan idhar-udhar
jate hain jab wo su-e-chaman sair ke liye
hote hain sath aashiq-e-nalan idhar-udhar
hain lakht-e-dil kahin to kahin para-e-jigar
rahte hain pesh-e-chashm-e-gulistan idhar-udhar
hangama-e-junun se jo donon hue hain chaak
daman idhar-udhar hai gareban idhar-udhar
zulfen chhuti hui hain jo chehre pe do taraf
lahra rahe hain afi-e-pechan idhar-udhar
dekha unhon ne murda mujhe main ne ashk-bar
aae nazar hain khwab-e-pareshan idhar-udhar
ya dushmanon se qata ho ya mujh se tark-e-rabt
kyun dil ko kar rahe ho meri jaan idhar-udhar
mutrib wahan hain jama nawa-saz us taraf
hote hain kal se aish ke saman idhar-udhar
kyun kar karun main baat chap-o-rast-e-yar ki
rahte hain sath sath nigahban idhar-udhar
wo apni hat pe hain mujhe apne kahe ki zid
samjha rahe hain donon ko insan idhar-udhar
aankhon pe saeban hain maze did ke hon kya
phaile hue hain daman-e-mizhgan idhar-udhar
wo but hai main hun sahib-e-din bahr-e-faisla
hote hain jama gabr-o-musalman idhar-udhar
wo chahte hain aaen main kahta hun aap jaun
kis lutf par hai raghbat-e-ehsan idhar-udhar
nalan wo aqraba se main hun mukhbiron se tang
kis kis tarah ke dil mein hain arman idhar-udhar
harjai un ko kahte hain be-sharm mujh ko log
uthte hain raat-din yahi tufan idhar-udhar
manzur hai jo ranjish-e-sabiq ka faisla
har rose jama hote hain mehman idhar-udhar
hain pahluon mein dagh jo donon taraf 'nasim'
jalwa dikha rahe hain gulistan idhar-udhar

phir uske phande mein ja rahe hain ki jis ke phande mein ja chuke the

By

phir us ke phande mein ja rahe hain ki jis ke phande mein ja chuke the
wahi musibat utha rahe hain ki jo musibat utha chuke the
kaho jo beja baja hai mujh ko saza hai jo na-saza hai mujh ko
ki un ka rona pada hai mujh ko jo muddaton tak rula chuke the
jo un ki khu thi so un ki khu hai jo guftugu thi so guftugu hai
phir un pe mitne ki aarzu hai jo har tarah se mita chuke the
adu ka main hun adu muqarrar barabar aa ke hue barabar
bhala badalta na rang kyun kar wo rang apne jama chuke the
kisi se koi na dil lagae 'nasim' kya kaifiyat batae
wahi ab aansu bahane aae lahu jo mera baha chuke the

pak hai lazzat-e-ishrat se zaban-e-waiz

By

pak hai lazzat-e-ishrat se zaban-e-waiz
jo bala aae ilahi so ba-jaan-e-waiz
ham-nafas bagh-e-jinan ghar hai gunahgaron ka
dhundh dozakh mein kahin ja ke makan-e-waiz
khidmat-e-rind qadah-nosh mein ye be-adabi
ji mein hai katiye danton se zaban-e-waiz
khud-faramosh hai kya aur ko samjhaega
rast-bazon se kaji par hai guman-e-waiz
kyun na ho tir-e-ishaaraat se aalam majruh
qadd-e-kham-gashta hai goya ki kaman-e-waiz

naseh-e-mushfiq ye mashq-e-taza farmane lage

By

naseh-e-mushfiq ye mashq-e-taza farmane lage
din to tha ab raat ko bhi aa ke samjhane lage
hazrat-e-wais kahin daulat-sara ko jaiye
aate hi saman-e-mahshar aap dikhlane lage
aa gae jab yaad kuchh us rabt baham ke maze
dil bhar aaya dida-e-tar ashk barsane lage
phir subu undle bhare shishe hue labrez jam
laghzish-e-pa apni apni mast dikhlane lage
baghban hushiyar ho mushtaq-e-rukhsat hai bahaar
rang badla gulistan ka phul murjhane lage
jalwa-ha-e-husn chamke uth gae munh se naqab
turra-e-gesu ke baham sanp lahrane lage
hath utha ai chaaragar darman-e-be-tasir se
ja-e-ashk aankhon se ab lakht-e-jigar aane lage
khub roe dekh kar hum zewar-e-diwangi
jab ahibba panw mein zanjir pahnane lage
bhtiyan raushan huin chamki dukan-e-mai-farosh
rukhsat-e-tauba hui zuhhad ghabrane lage
fasl-e-gul aai badhe josh-e-junun ke walwale
di sada zanjir ne phir panw khujlane lage
mane-e-matlab hui wo sharam baham ai 'nasim'
wo ruke apni taraf hum aap sharmane lage

matam bahut raha mujhe ashk-e-chakida ka

By

matam bahut raha mujhe ashk-e-chakida ka
aakhir ko pas aa hi gaya nur dida ka
nam-firaq phir na liya main ne umr-bhar
tha zaiqa zaban pe azab-e-chashida ka
ab wo maza nahin lab-e-shirin ke qand mein
chusa hua hai ye kisi khidmat-rasida ka
ai charkh-e-pir-zor jawani se dar-guzar
ab pas chahiye tujhe pusht-e-khamida ka
abru mein kham jabin mein shikan aankh mein ghazab
kya muddaa hai qatil-e-khanjar-kashida ka
daulat gharaz na thi jo dua se hui husul
tha aur muddaa mere dast-e-kashida ka
ai sakinan-e-charkh-e-mualla bacho bacho
tufan hua buland mere aab-dida ka
wo na-tawaniyan hain ki jism-e-zaif par
jama hai ankabut ke dam-e-tanida ka
be-did did mein nahin aate kisi tarah
gham aashiyan hai tair-e-rang-parida ka
udte hain hosh koi bhala kis tarah sune
afsana tere wahshi-e-az-khud-ramida ka
o gul khayal hai araq-e-jism ka tere
shisha hai dil hamara gulab-e-chakida ka
yaad-e-nigah-e-mast se hai dil ko intishaar
paimana hai kharab sharab-e-chakida ka
qatil khuda se dar hawas-e-zabh ta-kuja
nala na sun kisi ke gulu-e-burida ka
masti ke walwalon ka jawani mein lutf hai
piri mein dhyan chahiye qadd-khamida ka
jalwe dikha raha hai ye farsh-e-zamurradin
sabza mazar par hai giyah-e-damida ka
chadhti hai roz chadar-e-gul jalte hain charagh
ye dher hai zarur kisi barguzida ka
baalon ko ai 'nasim' rangoge khizab se
sak ko asa banaoge pusht-e-khamida ka

lo zoaf se ab ye haal-e-tan hai

By

lo zoaf se ab ye haal-e-tan hai
saya mutajassis-e-badan hai
yahan tan hi nahin hai laghari se
hum ko kya hajat-e-kafan hai
misl-e-nikhat hain jama kaisa
apna to badan hi pairahan hai
hun bulbul-e-bostan-e-taswir
be-khauf-e-khizan mera chaman hai
hun kushta-e-tegh-e-sharm-e-jaanan
har zakhm ka be-zaban dhan hai
la-raib 'nasim'-dehlawi to
ustad-e-nazakat-e-sukhan hai