zamin di hai to thoDa sa aasman bhi de

By

zamin di hai to thoda sa aasman bhi de
mere khuda mere hone ka kuchh guman bhi de
bana ke but mujhe binai ka azab na de
ye hi azab hai qismat to phir zaban bhi de
ye kaenat ka phailaw to bahut kam hai
jahan sama sake tanhai wo makan bhi de
main apne aap se kab tak kiya karun baaten
meri zaban ko bhi koi tarjuman bhi de
falak ko chand-sitare nawazne wale
mujhe charagh jalane ko saeban bhi de

ye na puchho ki waqia kya hai

By

ye na puchho ki waqia kya hai
kis ki nazron ka zawiya kya hai
sab hain masruf kaun batlae
aadmi ka ata-pata kya
chalta jata hai karwan-e-hayat
ibtida kya hai intiha kya hai
jo kitabon mein hai wo sab ka hai
tu bata tera tajraba kya hai
kaun rukhsat hua khudai se
har taraf ye khuda khuda kya hai

ye kaisi kashmakash hai zindagi mein

By

ye kaisi kashmakash hai zindagi mein
kisi ko dhundte hain hum kisi mein
jo kho jata hai mil kar zindagi mein
ghazal hai nam us ka shaeri mein
nikal aate hain aansu hanste hanste
ye kis gham ki kasak hai har khushi mein
kahin chehra kahin aankhen kahin lab
hamesha ek milta hai kai mein
chamakti hai andheron mein khamoshi
sitare tutte hain raat hi mein
sulagti ret mein pani kahan tha
koi baadal chhupa tha tishnagi mein
bahut mushkil hai banjara-mizaji
saliqa chahiye aawargi mein

wo KHush-libas bhi KHush-dil bhi KHush-ada bhi hai

By

wo khush-libas bhi khush-dil bhi khush-ada bhi hai
magar wo ek hai kyun us se ye gila bhi hai
hamesha mandir-o-masjid mein wo nahin rahta
suna hai bachchon mein chhup kar wo khelta bhi hai
na jaane ek mein us jaise aur kitne hain
wo jitna pas hai utna hi wo juda bhi hai
wahi amir jo rozi-rasan hai aalam ka
faqir ban ke kabhi bhik mangta bhi hai
akela hota to kuchh aur faisla hota
meri shikast mein shamil meri dua bhi hai

wahi hamesha ka aalam hai kya kiya jae

By

wahi hamesha ka aalam hai kya kiya jae
jahan se dekhiye kuchh kam hai kya kiya jae
guzarte waqt ne dhundla diye sabhi chehre
khushi khushi hai na gham gham hai kya kiya jae
bhatak raha hun liye tishnagi samundar ki
magar nasib mein shabnam hai kya kiya jae
mili hai zakhmon ki saughat jis ki mahfil se
usi ke hath mein marham hai kya kiya jae
wo ek shakhs jo kal tak tha dusron se khafa
ab apne aap se barham hai kya kiya jae

uTh ke kapDe badal ghar se bahar nikal jo hua so hua

By

uth ke kapde badal ghar se bahar nikal jo hua so hua
raat ke baad din aaj ke baad kal jo hua so hua
jab talak sans hai bhuk hai pyas hai ye hi itihas hai
rakh ke kandhe pe hal khet ki or chal jo hua so hua
khun se tar-ba-tar kar ke har rahguzar thak chuke jaanwar
lakdiyon ki tarah phir se chulhe mein jal jo hua so hua
jo mara kyun mara jo luta kyun luta jo jala kyun jala
muddaton se hain gham in sawalon ke hal jo hua so hua
mandiron mein bhajan masjidon mein azan aadmi hai kahan
aadmi ke liye ek taza ghazal jo hua so hua