zindagi se Darte ho

By

zindagi se darte ho!
zindagi to tum bhi ho zindagi to hum bhi hain!
zindagi se darte ho?
aadmi se darte ho?
aadmi to tum bhi ho aadmi to hum bhi hain
aadmi zaban bhi hai aadmi bayan bhi hai
us se tum nahin darte!
harf aur mani ke rishta-ha-e-ahan se aadmi hai wabasta
aadmi ke daman se zindagi hai wabasta
us se tum nahin darte
an-kahi se darte ho
jo abhi nahin aai us ghadi se darte ho
us ghadi ki aamad ki aagahi se darte ho
pahle bhi to guzre hain
daur na-rasai ke be-riya khudai ke
phir bhi ye samajhte ho hech aarzu-mandi
ye shab-e-zaban-bandi hai rah-e-khuda-wandi
tum magar ye kya jaano
lab agar nahin hilte hath jag uthte hain
hath jag uthte hain rah ka nishan ban kar
nur ki zaban ban kar
hath bol uthte hain subh ki azan ban kar
raushni se darte ho
raushni to tum bhi ho raushni to hum bhi hain
raushni se darte ho
shahr ki fasilon par
dew ka jo saya tha pak ho gaya aakhir
raat ka libaada bhi
chaak ho gaya aakhir khak ho gaya aakhir
izhdiham-e-insan se fard ki nawa aai
zat ki sada aai
rah-e-shauq mein jaise rah-rau ka khun lapke
ek naya junun lapke
aadmi chhalak utthe
aadmi hanse dekho shahr phir base dekho
tum abhi se darte ho?
han abhi to tum bhi ho
han abhi to hum bhi hain
tum abhi se darte ho

zamana KHuda hai

By

zamana khuda hai use tum bura mat kaho
magar tum nahin dekhte zamana faqat resman-e-khayal
subuk-maya, nazuk, tawil
judai ki arzan sabil!
wo subhen jo lakhon baras pesh-tar thin,
wo shamen jo lakhon baras baad hongi,
unhen tum nahin dekhte, dekh sakte nahin
ke maujud hain ab bhi, maujud hain wo kahin
magar ye nigahon ke aage jo rassi tani hai
use dekh sakte ho, aur dekhte ho
ke ye wo adam hai
jise hast hone mein muddat lagegi
sitaron ke lamhe, sitaron ke sal!
mere sehan mein ek kam-sin banafshe ka pauda hai
tayyara koi kabhi us ke sar par se guzre
to wo muskuraata hai aur lahlahata hai
goya wo tayyara, us ki mohabbat mein
ahd-e-wafa ke kisi jabr-e-taqat-ruba hi se guzra!
wo khush-emtimadi se kahta hai
lo dekho, kaise isi ek rassi ke donon kinaron
se hum tum bandhe hain!
ye rassi na ho to kahan hum mein tum mein
ho paida ye rah-e-visal?
magar hijr ke in wasilon ko wo dekh sakta nahin
jo sarasar azal se abad tak tane hain!
jahan ye zamana hanuz-e-zamana
faqat ek girah hai!

ye KHala pur na hua

By

zehan khali hai
khala nur se ya naghme se
ya nikhat-e-gum-rah se bhi
pur na hua
zehan khali hi raha
ye khala harf-e-tasalli se
tabassum se
kisi aah se pur na hua
ek nafi larzish-e-paiham mein sahi
johd-e-be-kar ke matam mein sahi
hum jo naras bhi hain gham-dida bhi hain
is khala ko
(isi dahliz pe soe hue
sarmast gada ke manind)
kasi minar ki taswir se
ya rang ki jhankar se
ya khwabon ki khushbuon se
pur kyun na karen?
ki ajal hum se bahut dur
bahut dur rahe?
nahin hum jaante hain
hum jo naras bhi hain gham-dida bhi hain
jaante hain ki khala hai wo jise maut nahin
kas liye nur se ya naghme se
ya harf-e-tasalli se ise jism banaen
aur phir maut ki warafta pazirai karen?
nae hangamon ki tajlil ka dar baz karen
subh-e-takmil ka aaghaz karen?

wo harf-e-tanha

By

hamare aaza jo aasman ki taraf dua ke liye uthe hain
(tum aasman ki taraf na dekho!)
maqam-e-nazuk pe zarb-e-kari se jaan bachane ka hai wasila
ki apni mahrumiyon se chhupne ka ek hila?
buzurg-o-bartar khuda kabhi to (bahisht-e-bar-haq)
hamein khuda se najat dega
ki hum hain is sarzamin pe jaise wo harf-e-tanha
(magar wo aisa jahan na hoga) khamosh o goya
jo aarzu-e-visal-e-mani mein ji raha ho
jo harf-e-mani ki yak-dili ko taras gaya ho
hamein muarra ke khwab de do
(ki sab ko bakhshen ba-qadr-e-zauq-e-nigah tabassum)
hamein muarra ki ruh ka iztirab de do
(jahan gunahon ke hausle se mile taqaddus ke dukh ka marham)
ki us ki be-nur-o-tar aanhken
darun-e-adam ki tera raaton
ko chhedti thin
usi jahan mein firaq-e-jaan-kah-e-harf-o-mani
ko dekhti thin
bahisht us ke liye wo masum sada-lauhon ki aafiyat tha
jahan wo nange badan pe jabir ke taziyanon se bach ke
rah-e-farar paen
wo kafsh-e-pa tha ki jis se ghurbat ki reg-e-baryan
se roz-e-fursat qarar paen
ki sulb-e-adam ki rahm-e-hawwa ki uzlaton mein
nihayat-e-intizar paen!
(bahisht sifr-e-azim lekin hamein wo gum-gashta hindse hain
baghair jin ke koi musawat kya banegi
visal-e-mani se harf ki baat kya banegi?)
hum is zamin par azal se pirana-sar hain mana
magar abhi tak hain dil tawana
aur apni zulida-kariyon ke tufail dana
hamein muarra ke khwab de do
(bahisht mein bhi nashat yak-rang ho to gham hai
ho ek sa jam-e-shahd sab ke liye to sam hai)
ki hum abhi tak hain is jahan mein wo harf-e-tanha
(bahisht rakh lo hamein khud apna jawab de do!)
jise tamanna-e-wasl-e-mana

wazire chunin

By

to jab sat sau aathwin raat aai
to kahne lagi shaharzad:
ai jawan-bakht
shiraaz mein ek rahta tha nai
wo nai to tha hi
magar us ko bakhsha tha qudrat ne
ek aur nadir giran-tar hunar bhi
ki jab bhi
kisi mard-e-dana ka zehn-e-rasa
zang-aluda hone ko aata
to nai ko ja kar dikhata
ki nai dimaghon ka mashhur mahir tha
wo kasa-e-sar se un ko alag kar ke
in ki sab aalaishen pak kar ke
phir apni jagah par lagane ke fan mein tha kaamil
khuda ka ye karna hua
ek din
is ki dukan se
iran ka ek wazir-e-kuhan-sal guzra
aur is ne chaha
ki wo bhi zara
apne uljhe hue zehn ki
az sar-e-nau safai kara le
kiya kasa-e-sar ko nai ne khali
abhi wo use saf karne laga tha
ki nagah aa kar kaha ek khwaja-sara ne:
main bheja gaya hun janab-e-wazarat-e-panah ko bulane
aur is par
sarasima ho kar jo uttha wazir ek dam
rah gaya pas dallak ke maghz us ka
wo be-maghz sar le ke darbar-e-sultan mein pahuncha
magar dusre roz is ne
jo nai se aa kar taqaza kiya
to wo kahne laga:
haif
kal shab padosi ki billi
kisi rauzan-e-dar se ghus kar
janab-e-wazarat-e-panah ke
dimagh-e-falak-taz ko kha gai hai
aur ab hukm-e-sarkar ho to
kisi aur haiwan ka maghz le kar laga dun
to dallak ne rakh diya
daniyal-e-zamana ke sar mein
kisi bail ka maghz le kar
to logon ne dekha
janab-e-wazarat-e-panah ab
farasat mein
danish mein
aur karobar-e-wazarat mein
pahle se bhi chaq-o-chauband-tar ho gae hain

wadi-e-pinhan

By

waqt ke dariya mein utthi thi abhi pahli hi lahr
chand insanon ne li ek wadi-e-pinhan ki rah
mil gai un ko wahan
aaghosh-e-rahat mein panah
kar liya tamir ek mausiqi o ishrat ka shahr
mashriq-o-maghrib ke par
zindagi aur maut ki farsuda shah-rahon se dur
jis jagah se aasman ka qafila leta hai nur
jis jagah har subh ko milta hai ima-e-zuhur
aur bune jate hain raaton ke liye khwab ke jal
sikhti hai jis jagah parwaz hur
aur farishton ko jahan malta hai aahang-e-surur
gham-nasib ahrimanon ko girya-e-ah-o-fughan
kash batla de koi
mujh ko bhi is wadi-e-pinhan ki rah
mujh ko ab tak justuju hai
zindagi ke taza jaulan-gah ki
kaisi be-zari si hai
zindagi ke kohna aahang-e-musalsal se mujhe
sar-zamin-e-zist ki afsurda mahfil se mujhe
dekh le ek bar kash
us jahan ka manzar-e-rangin nigah
jis jagah hai qahqahon ka ek darakhshanda wafur
jis jagah se aasman ka qafila leta hai nur
jis ki rifat dekh kar khud himmat-e-yazdan hai chur
jis jagah hai waqt ek taza surur
jis jagah ahrimanon ka bhi nahin kuchh ikhtiyar
mashriq-o-maghrib ke par