humne khulne na diya be-sar-o-samani ko

hum ne khulne na diya be-sar-o-samani ko
kahan le jaen magar shahr ki virani ko
sirf guftar se zakhmon ka rafu chahte hain
ye siyasat hai to phir kya kahin nadani ko
koi taqsim nai kar ke chala jata hai
jo bhi aata hai mere ghar ki nigahbani ko
ab kahan jaun ki ghar mein bhi hun dushman apna
aur bahar mera dushman hai nigahbani ko
be-hisi wo hai ki karta nahin insan mahsus
apni hi ruh mein aai hui tughyani ko
aaj bhi us ko faraaz aaj bhi aali hai wahi
wahi sajda jo kare waqt ki sultani ko
aaj yusuf pe agar waqt ye lae ho to kya
kal tumhin takht bhi doge isi zindani ko
subh khalne ki ho ya sham bikhar jaane ki
hum ne khushbu hi kiya apni pareshani ko
wo bhi har-an naya meri mohabbat bhi nai
jalwa-e-husn kashish hai meri hairani ko
kuza-e-harf mein laya hun tumhaari khatir
ruh par utre hue ek ajab pani ko

yaad

By

kabhi kabhi koi yaad
koi bahut purani yaad
dil ke darwaze par
aise dastak deti hai
sham ko jaise tara nikle
subh ko jaise phul
jaise dhire dhire zamin par
raushniyon ka nuzul
jaise ruh ki pyas bujhane
utre koi rasul
jaise rote rote achanak
hans de koi malul
kabhi kabhi koi yaad koi bahut purani yaad
dil ke darwaze par aise dastak deti hai

visaliya

By

sab barishen ho ke tham chuki thin
ruhon mein dhanak utar rahi thi
main khwab mein baat kar raha tha
wo nind mein pyar kar rahi thi
ahwal hi aur ho rahe the
lazzat mein visal ro rahe the
boson mein dhule-dhulae donon
nashshe mein lipat ke so rahe the
chhota sa hasin sa wo kamra
ek aalam-e-khwab ho raha tha
khushbu se gulab ho raha tha
masti se sharab ho raha tha
wo chhanw sa chandni sa bistar
hum rang naha rahe the jis par
yun tha ki hum apni zat ke andar
the apna hi ek aur manzar
sairab mohabbaton ke dhaare
baham the wajud ke kinare
mauzu-e-sukhan, sukhan the sare
aalam hi ajib the hamare
jage wo lahu mein silsile phir
tan man ke wahi the zaiqe phir
tham tham ke baras baras gae phir
patal tak ho gae hare phir
jari tha wo raqs-e-ham-kinari
nikli nai subh ki sawari
aisa laga kaenat sari
is aan to hai faqat hamari
jab chand mera naha ke nikla
main dil ko diya bana ke nikla
kashkol-e-dua utha ke nikla
shaer tha sada laga ke nikla
dariya wo samundaron se gahre
wo khwab gulab aise chehre
sab zawiyon ho gae sunahre
aainon mein jab wo aa ke thahre

sachcha jhuT

By

main bhi jhuta tum bhi jhute
aao chalo tanha ho jaen
kaun mariz aur kaun masiha
is dukh se chhutkara paen
aankhen apni khwab bhi apne
apne khwab kise dikhlaen
apni apni ruhon mein sab
apne apne kodh sajaen
apne apne kandhon par sab
apni apni lash uthaen
baith ke apne apne ghar mein
apna apna jashn manaen
shayad lamha-e-ainda mein
log hamein sachcha thahraen

sathi se

By

main khud hi apni bahaar se ruthne lagun gar
to tum mujhe ruthne na dena
jo war lamhe ka ho wo sahna
ye soch lena
ki ek lamha gurez ka
kaise
mohabbaton ki ek umr pamal kar ke guzar raha hai

numu

By

main wo shajar tha
ki mere sae mein baithne aur shakhon pe jhulne ki hazaron jismon ko aarzu thi
zamin ki aankhen daraazi-e-umar ki duaon mein ro rahi thin
aur suraj ke hath thakte nahin the mujh ko sanwarne mein
ki main ek aawaz ka safar tha
ajab shajar tha
ki us musafir ka muntazir tha
jo mere sae mein aa ke baithe to phir na utthe
jo meri shakhon pe aae jhule to sare mausam yahin guzare
magar wo pagal hawa ka jhonka magar wo pagal hawa ka jhonka
ajab musafir tha rahguzar ka
jo chhod aaya tha kitni shakhen
magar laga yun ki jaise ab wo shikasta-tar hai
wo mere khwabon ka ham-safar hai
so main ne sae bichha diye the
tamam jhule hila diye the
magar wo pagal hawa ka jhonka magar wo pagal hawa ka jhonka
ajab musafir tha rahguzar tha
ki lamhe bhar mein guzar chuka tha
main be-numu aur be-samar tha
magar main aawaz ka safar tha
so meri aawaz ka ajar tha
ajab shajar tha
ajab shajar hun
ki aane wale sah kah raha hun
ai mere dil mein utarne wale
ai mujh ko shadab karne wale
tujhe meri raushni mubarak
tujhe meri zindagi mubarak