KHayal-o-KHwab hua barg-o-bar ka mausam

By

khayal-o-khwab hua barg-o-bar ka mausam
bichhad gaya teri surat bahaar ka mausam
kai ruton se mere nim-wa darichon mein
thahar gaya hai tere intizar ka mausam
wo narm lahje mein kuchh to kahe ki laut aae
samaaton ki zamin par phuwar ka mausam
payam aaya hai phir ek sarw-qamat ka
mere wajud ko khinche hai dar ka mausam
wo aag hai ki meri por por jalti hai
mere badan ko mila hai chinar ka mausam
rafaqaton ke nae khwab khushnuma hain magar
guzar chuka hai tere eatibar ka mausam
hawa chali to nai barishen bhi sath aain
zamin ke chehre pe aaya nikhaar ka mausam
wo mera nam liye jae aur main us ka nam
lahu mein gunj raha hai pukar ka mausam
qadam rakhe meri khushbu ki ghar ko laut aae
koi batae mujhe ku-e-yar ka mausam
wo rose aa ke mujhe apna pyar pahnae
mera ghurur hai bele ke haar ka mausam
tere tariq-e-mohabbat pe barha socha
ye jabr tha ki tere ikhtiyar ka mausam

kya kare meri masihai bhi karne wala

By

kya kare meri masihai bhi karne wala
zakhm hi ye mujhe lagta nahin bharne wala
zindagi se kisi samjhaute ke ba-wasf ab tak
yaad aata hai koi marne marne wala
us ko bhi hum tere kuche mein guzar aae hain
zindagi mein wo jo lamha tha sanwarne wala
sham hone ko hai aur aankh mein ek khwab nahin
koi is ghar mein nahin raushni karne wala
dastaras mein hain anasir ke irade kis ke
so bikhar ke hi raha koi bikharne wala
us ka andaz-e-sukhan sab se juda tha shayad
baat lagti hui lahja wo mukarne wala
isi ummid par har sham bujhae hain charagh
ek taza hai sar-e-baam ubharne wala

bab-e-hairat se mujhe izn-e-safar hone ko hai

By

bab-e-hairat se mujhe izn-e-safar hone ko hai
tahniyat ai dil ki ab diwar dar hone ko hai
khol den zanjir-e-dar aur hauz ko khali karen
zindagi ke bagh mein ab sah-pahar hone ko hai
maut ki aahat sunai de rahi hai dil mein kyun
kya mohabbat se bahut khali ye ghar hone ko hai
gard-e-rah ban kar koi hasil safar ka ho gaya
khak mein mil kar koi lal-o-guhar hone ko hai
ek chamak si to nazar aai hai apni khak mein
mujh pe bhi shayad tawajjoh ki nazar hone ko hai
gum-shuda basti musafir laut kar aate nahin
moajaza aisa magar bar-e-digar hone ko hai
raunaq-e-bazar-o-mahfil kam nahin hai aaj bhi
saneha is shahr mein koi magar hone ko hai
ghar ka sara rasta is sarkhushi mein kat gaya
is se agle mod koi ham-safar hone ko hai

humne hi lauTne ka irada nahin kiya

By

hum ne hi lautne ka irada nahin kiya
us ne bhi bhul jaane ka wada nahin kiya
dukh odhte nahin kabhi jashn-e-tarab mein hum
malbus-e-dil ko tan ka labaada nahin kiya
jo gham mila hai bojh uthaya hai us ka khud
sar zer-e-bar-e-saghar-o-baada nahin kiya
kar-e-jahan hamein bhi bahut the safar ki sham
us ne bhi iltifat ziyaada nahin kiya
aamad pe teri itr o charagh o subu na hon
itna bhi bud-o-bash ko sada nahin kiya

gunge labon pe harf-e-tamanna kiya mujhe

By

gunge labon pe harf-e-tamanna kiya mujhe
kis kor-chashm-shab mein sitara kiya mujhe
zakhm-e-hunar ko samjhe hue hai gul-e-hunar
kis shahr-e-na-sipas mein paida kiya mujhe
jab harf-na-shanas yahan lafz-fahm hain
kyun zauq-e-sher de ke tamasha kiya mujhe
khushbu hai chandni hai lab-e-ju hai aur main
kis be-panah raat mein tanha kiya mujhe
di tishnagi khuda ne to chashme bhi de diye
sine mein dasht aankhon mein dariya kiya mujhe
main yun sambhal gai ki teri bewafai ne
be-e'tibariyon se shanasa kiya mujhe
wo apni ek zat mein kul kaenat tha
duniya ke har fareb se milwa diya mujhe
auron ke sath mera taaruf bhi jab hua
hathon mein hath le ke wo socha kiya mujhe
bite dinon ka aks na aainda ka khayal
bas khali khali aankhon se dekha kiya mujhe

gulab hath mein ho aankh mein sitara ho

By

gulab hath mein ho aankh mein sitara ho
koi wajud mohabbat ka istiara ho
main gahre pani ki is rau ke sath bahti rahun
jazira ho ki muqabil koi kinara ho
kabhi-kabhaar use dekh len kahin mil len
ye kab kaha tha ki wo khush-badan hamara ho
qusur ho to hamare hisab mein likh jae
mohabbaton mein jo ehsan ho tumhaara ho
ye itni raat gae kaun dastaken dega
kahin hawa ka hi us ne na rup dhaara ho
ufuq to kya hai dar-e-kahkashan bhi chhu aaen
musafiron ko agar chand ka ishaara ho
main apne hisse ke sukh jis ke nam kar dalun
koi to ho jo mujhe is tarah ka pyara ho
agar wajud mein aahang hai to wasl bhi hai
wo chahe nazm ka tukda ki nasr-para ho