zud-pashiman

By

gahri bhuri aaankhon wala ek shahzada
dur des se
chamkile mushki ghode par hawa se baaten karta
jigar jigar karti talwar se jangal katta aaya
darwazon se lipti belen pare hatata
jangal ki banhon mein jakde mahl ke hath chhudata
jab andar aaya to dekha
shahzadi ke jism ki sari suiyan zang-aluda thin
rasta dekhne wali aanhken
sare shikwe bhula chuki thin!

wo bagh mein mera muntazir tha

By

wo bagh mein mera muntazir tha
aur chand tulua ho raha tha
zulf-e-shab-e-wasl khul rahi thi
khushbu sanson mein ghul rahi thi
aai thi main apne pi se milne
jaise koi gul hawa se khilne
ek umr ke baad main hansi thi
khud par kitni tawajjoh di thi!
pahna gahra basanti joda
aur itr-e-suhag mein basaya
aaine mein khud ko phir kai bar
us ki nazron se main ne dekha
sandal se chamak raha tha matha
chandan se badan mahak raha tha
honton pe bahut sharir lali
galon pe gulal khelta tha
baalon mein piroe itne moti
taron ka guman ho raha tha
afshan ki lakir mang mein thi
kajal aankhon mein hans raha tha
kanon mein machal rahi thi baali
banhon se lipat raha tha gajra
aur sare badan se phutta tha
us ke liye git jo likha tha!
hathon mein liye diye ki thaali
us ke qadmon mein ja ke baithi
aai thi ki aarti utarun
sare jiwan ko dan kar dun!
dekha mere dewta ne mujh ko
baad is ke zara sa muskuraya
phir mere sunahre thaal par hath
rakkha bhi to ek diya uthaya
aur meri tamam zindagi se
mangi bhi to ek sham mangi

wahima

By

tumhaara kahna hai
tum mujhe be-panah shiddat se chahte ho
tumhaari chahat
visal ki aakhiri hadon tak
mere faqat mere nam hogi
mujhe yaqin hai mujhe yaqin hai
magar qasam khane wale ladke!
tumhaari aankhon mein ek til hai!

taj-mahal

By

sang-e-marmar ki khunuk banhon mein
husn-e-khwabida ke aage meri aankhen shal hain
gung sadiyon ke tanazur mein koi bolta hai
waqt jazbe ke taraazu pe zar-o-sim-o-jawahir ki tadap taulta hai!
har nae chand pe patthar wahi sach kahte hain
usi lamhe se damak uthte mein un ke chehre
jis ki lau umr gae ek dil-e-shab-zad ko mahtab bana aai thi!
usi mahtab ki ek narm kiran
sancha-e-sang mein dhal pai to
ishq rang-e-abadiyyat se sar-afraaz hua
kya ajab nind hai
jis ko chhu kar
jo bhi aata hai khuli aankh liye aata hai
so chuke khwab-e-abad dekhne wale kab ke
aur zamana hai ki us khwab ki tabir liye jag raha hai ab tak!

sirf ek laDki

By

apne sard kamre mein
main udas baithi hun
nim-wa darichon se
nam hawaen aati hain
mere jism ko chhu kar
aag si lagati hain
tera nam le le kar
mujh ko gudgudati hain
kash mere par hote
tere pas ud aati
kash main hawa hoti
tujh ko chhu ke laut aati
main nahin magar kuchh bhi
sang dil riwajon ke
aahani hisaron mein
umr-qaid ki mulzim
sirf ek ladki hun!