ghar ki jab yaad sada de to palaT kar aa jaen

By

ghar ki jab yaad sada de to palat kar aa jaen
kash hum apni hi khwahish ko mayassar aa jaen
hai karamat mere dil ki tere nawak mein nahin
war ho ek magar zakhm bahattar aa jaen
guftugu aaj to do tok karega suraj
zill-e-subhani shabistan se bahar aa jaen
shab ko yalghaar-e-tafakkur se jo bach niklun main
subh-dam taza khayalat ke lashkar aa jaen
itni saffak samaat bhi ghazab hai ki jahan
baat puri bhi na ho hathon mein patthar aa jaen

gham se bahal rahe hain aap aap bahut ajib hain

By

gham se bahal rahe hain aap aap bahut ajib hain
dard mein dhal rahe hain aap aap bahut ajib hain
saya-e-wasl kab se hai aap ka muntazir magar
hijr mein jal rahe hain aap aap bahut ajib hain
apne khilaf faisla khud hi likha hai aap ne
hath bhi mal rahe hain aap aap bahut ajib hain
waqt ne aarzu ki lau der hui bujha bhi di
ab bhi pighal rahe hain aap aap bahut ajib hain
daera-war hi to hain ishq ke raste tamam
rah badal rahe hain aap aap bahut ajib hain
apni talash ka safar khatm bhi kijiye kabhi
khwab mein chal rahe hain aap aap bahut ajib hain

ek se silsile hain sab hijr ki rut bata gai

By

ek se silsile hain sab hijr ki rut bata gai
phir wahi subh aaegi phir wahi sham aa gai
mere lahu mein jal uthe utne hi taza-dam charagh
waqt ki sazishi hawa jitne diye bujha gai
main bhi ba-pas-e-dostan apne khilaf ho gaya
ab yahi rasm-e-dosti mujh ko bhi ras aa gai
tund hawa ke jashn mein log gae to the magar
tan se koi qaba chhini sar se koi rida gai
dil-zadagan ke qafile dur nikal chuke tamam
un ki talash mein nigah ab jo gai to kya gai
aakhir-e-shab ki dastan aur karen bhi kya bayan
ek hi aah-e-sard thi sare diye bujha gai

dil agar kuchh mang lene ki ijazat mangta

By

dil agar kuchh mang lene ki ijazat mangta
ye mohabbat-zad tajdid-e-mohabbat mangta
waqt khud na-paedari ke liye mashhur hai
aise be-taufiq se main khak shohrat mangta
main ne sahra se tahayyur-khez hairat mang li
khak ho jata agar tahzib-e-wahshat mangta
dil ko khush aai nahin ye daulat-e-asudgi
aur kuchh mil jati to ye kuchh aur zahmat mangta
hain khudawandan-e-duniya hum tahi-daston se hech
dil ko hasrat thi to hum jaison se khilat mangta
ho gaya hota giran-goshon se gar maghlub main
kyun sukhan aaghaz karta kyun samaat mangta
kya tajjub tha ki is sauda-gari ke daur mein
khwab bhi tabir ho jaane ki qimat mangta

charagh hun kab se jal raha hun mujhe duaon mein yaad rakhiye

By

charagh hun kab se jal raha hun mujhe duaon mein yaad rakhiye
jo bujh gaya to sahar-numa hun mujhe duaon mein yaad rakhiye
wo baat jo aap kah na pae meri ghazal mein bayan hui hai
main aap ka harf-e-muddaa hun mujhe duaon mein yaad rakhiye
ghubar hun aap chahe ghaza banaen ya zer-e-pa bichha len
main kab se raqsan hun thak chuka hun mujhe duaon mein yaad rakhiye
bahut hi shaistagi se har lamha dubti ek sada ki surat
main khalwat-e-jaan mein bujh raha hun mujhe duaon mein yaad rakhiye
bala se ye rah-e-shauq meri na ho saki par tumhaari khatir
misal-e-naqsh-e-qadam bichha hun mujhe duaon mein yaad rakhiye

ayan hum par na hone ki KHushi hone lagi hai

By

ayan hum par na hone ki khushi hone lagi hai
diye mein ek nai si raushni hone lagi hai
nai kuchh hasraten dil mein basera kar rahi hain
bahut aabaad ab dil ki gali hone lagi hai
so tai paya masaib zindagi ke kam na honge
magar kam zindagi se zindagi hone lagi hai
udhar tar-e-nafas se aa mili hai raunaq-e-zist
idhar kam mohlati mein bhi kami hone lagi hai
sar-e-aghaz dil ki dastan mein wo nahin tha
magar mahsus ab us ki kami hone lagi hai
hamari dosti ka dam bharen aise kahan hain
zamane sab se teri dosti hone lagi hai