aah ko samjhe ho kya dil se agar ho jaegi

aah ko samjhe ho kya dil se agar ho jaegi
wo to wo un ke farishton ko khabar ho jaegi
puri kya musa tamanna tur par ho jaegi
tum agar upar gae nichi nazar ho jaegi
kya in aahon se shab-e-gham mukhtasar ho jaegi
ye sahar hone ki baaten hain sahar ho jaegi
aa to jaenge wo meri aah-e-pur-tasir se
mahfil-e-dushman mein ruswai magar ho jaegi
kis se puchhenge wo mere raat ke marne ka haal
tu bhi ab khamosh ai sham-e-sahar ho jaegi
ye bahut achchha hua aaenge wo pichhle pahar
chandni bhi khatm jab tak ai 'qamar' ho jaegi

ab mujhe gulshan se kya jab zer-e-dam aa hi gaya

ab mujhe gulshan se kya jab zer-e-dam aa hi gaya
ek nasheman tha so wo bijli ke kaam aa hi gaya
sun maal-e-soz-e-ulfat jab ye nam aa hi gaya
shama aakhir jal-bujhi parwana kaam aa hi gaya
talib-e-didar ka israr kaam aa hi gaya
samne koi ba-husn-e-intizam aa hi gaya
koshish-e-manzil se to achchhi rahi diwangi
chalte-phirte un se milne ka maqam aa hi gaya
raaz-e-ulfat marne wale ne chhupaya to bahut
dam nikalte waqt lab par un ka nam aa hi gaya
kar diya mashhur parde mein tujhe zahmat na di
aaj ko hona hamara tere kaam aa hi gaya
jab utha saqi to waiz ki na kuchh bhi chal saki
meri qismat ki tarah gardish mein jam aa hi gaya
husn ko bhi ishq ki zid rakhni padti hai kabhi
tur par musa se milne ka payam aa hi gaya
der tak bab-e-haram par ruk ke ek majbur-e-ishq
su-e-but-khana khuda ka le ke nam aa hi gaya
raat bhar mangi dua un ke na jaane ki 'qamar'
subh ka tara magar le kar payam aa hi gaya

ab to munh se bol mujhko dekh din bhar ho gaya

ab to munh se bol mujh ko dekh din bhar ho gaya
ai but-e-khamosh kya sach-much ka patthar ho gaya
ab to chup ho bagh mein nalon se mahshar ho gaya
ye bhi ai bulbul koi sayyaad ka ghar ho gaya
iltimas-e-qatl par kahte ho fursat hi nahin
ab tumhein itna ghurur allahu-akbar ho gaya
mahfil-e-dushman mein jo guzri wo mere dil se puchh
har ishaara jumbish-e-abru ka khanjar ho gaya
aashiyane ka bataen kya pata khana-ba-dosh
chaar tinke rakh liye jis shakh par ghar ho gaya
hirs to dekho falak bhi mujh pe karta hai sitam
koi puchhe to bhi kya un ke barabar ho gaya
sokhta dil mein na milta tir ko khun ai 'qamar'
ye bhi kuchh mehman ki qismat se mayassar ho gaya