wo aaghaz-e-mohabbat ka zamana

By

wo aaghaz-e-mohabbat ka zamana
zara si baat banti thi fasana
qafas ko kyun samajh lun aashiyana
abhi to karwaten lega zamana
ye kah kar sabr karte hain sitam par
hamara bhi kabhi hoga zamana
qafas se bhi nikala ja raha hun
kahan le jae dekho aab-o-dana
ghurur itna na kar tir-e-sitam par
ki aksar chuk jata hai nishana
agar bijli ka dar hoga to un ko
bulandi par hai jin ka aashiyana
kahani dard-e-dil ki sun ke puchha
'qamar' sach kah ye kis ka hai fasana

shaiKH aaKHir ye surahi hai koi KHum to nahin

By

shaikh aakhir ye surahi hai koi khum to nahin
aur bhi baithe hain mahfil mein hamin tum to nahin
na-khuda hosh mein aa hosh tere gham to nahin
ye to sahil ke hain aasar-e-talatum to nahin
naz-o-andaz-o-ada honton pe halki si hansi
teri taswir mein sab kuchh hai takallum to nahin
dekh anjam mohabbat ka bura hota hai
mujh se duniya yahi kahti hai bas ek tum to nahin
muskuraate hain saliqe se chaman mein ghunche
tum se sikha hua andaz-e-tabassum to nahin
ab ye mansur ko di jati hai nahaq suli
haq ki puchho to wo andaz-e-takallum to nahin
chandni-raat ka kya lutf 'qamar' ko aae
lakh taron ki bahaaren hain magar tum to nahin

KHatm shab qissa-e-muKHtasar na hui

By

khatm shab qissa-e-mukhtasar na hui
shama gul ho gai sahar na hui
ru-e-shabnam jala jo ghar mera
phul ki kam hansi magar na hui
hashr mein bhi wo kya milenge hamein
jab mulaqat umr-bhar na hui
aaina dekh kar ye kijiye shukr
aap ko aap ki nazar na hui
sab the mahfil mein un ki mahw-e-jamal
ek ko ek ki khabar na hui
sainkadon raat ke kiye wade
un ki raat aaj tak 'qamar' na hui

isMein koi fareb to ai aasman nahin

By

is mein koi fareb to ai aasman nahin
bijli wahan giri hai jahan aashiyan nahin
sayyaad main asir kahun kis se haal-e-dil
sirf ek tu hai wo bhi mera ham-zaban nahin
tum ne diya hamari wafaon ka kya jawab
ye hum wahan bataenge tum ko yahan nahin
sajde jo but-kade mein kiye meri kya khata
tum ne kabhi kaha ye mera aastan nahin
gum-karda rah ki kahin mitti na ho kharab
gard us taraf udi hai jidhar karwan nahin
kyun sham-e-intizar bujhate ho ai 'qamar'
nale hain ye kisi ke sahar ki azan nahin

bagh-e-alam mein rahe shadi-o-matam ki tarah

By

bagh-e-alam mein rahe shadi-o-matam ki tarah
phul ki tarah hanse ro diye shabnam ki tarah
shikwa karte ho khushi tum se manai na gai
hum se gham bhi to manaya na gaya gham ki tarah
rose mahfil se uthate ho to dil dukhta hai
ab nikalwao to phir hazrat-e-adam ki tarah
lakh hum rind sahi hazrat-e-waiz lekin
aaj tak hum ne na pi qibla-e-alam ki tarah
tere andaz-e-jarahat ke nisar ai qatil
khun zakhmon pe nazar aata hai marham ki tarah
khauf dil se na gaya subh ke hone ka 'qamar'
wasl ki raat guzari hai shab-e-gham ki tarah

chhoD kar ghar-bar apna hasrat-e-didar mein

By

chhod kar ghar-bar apna hasrat-e-didar mein
ek tamasha ban ke aa baitha hun ku-e-yar mein
dam nikal jaega hasrat se na dekh ai nakhuda
ab meri qismat pe kashti chhod de manjdhaar mein
dekh bhi aa baat kahne ke liye ho jaegi
sirf ginti ki hain sansen ab tere bimar mein
fasl-e-gul mein kis qadar manhus hai rona mera
main ne jab nale kiye bijli giri gulzar mein
jal gaya mera nasheman ye to main ne sun liya
baghban to khairiyat se hai saba gulzar mein