zindagi ke gham lakhon aur chashm-e-nam tanha

By

zindagi ke gham lakhon aur chashm-e-nam tanha
hasraton ki mayyat par ro rahe hain hum tanha
mil saka na koi bhi ham-safar zamane mein
katte rahe barson jada-e-alam tanha
khel to nahin yaro raste ki tanhai
koi hum ko dikhlae chal ke do-qadam tanha
dil ko chhedti hogi yaad-e-raftagan akasr
lakh ji ko bahlaen shaikh-e-mohtaram tanha
masjiden tarasti hain us taraf azanon ko
is taraf shiwalon mein rah gae sanam tanha
is bhari khudai mein wo bhi aaj akele hain
khalwaton mein rah kar bhi jo rahe the kam tanha
thi 'qatil' chahat mein un ki bhi raza shamil
phir bhi hum hi thahre hain morid-e-sitam tanha

zikr mera aur tere lab par yaad meri aur tere dil mein

By

zikr mera aur tere lab par yaad meri aur tere dil mein
jhuti aas dilane wale aag na bhadka mere dil mein
mujh se aankhen pher ke tu ne ye mushkil bhi aasan kar di
warna tere gham ke badle leta kaun basere dil mein
pyar-bhari ummidon par aghyar ki wo zar-posh nigahen
kanton ke paiwand laga kar tu ne phul bikhere dil mein
puchh rahi hai duniya mujh se wo harjai chand kahan hai
dil kahta hai ghair ke bas mein main kahta hun mere dil mein
kash kabhi saffak zamana mera sina chir ke dekhe
chain ke badle dard ne ab to dal diye hain dere dil mein
darte darte soch raha hun wo mere hain ab bhi shayad
warna kaun kiya karta hai yun pheron par phere dil mein
pyar ki pahli manzil par anjaan musafir dekh raha hai
aankhon mein sangin ujale aur sayyal andhere dil mein
ujdi yaado tute sapno shayad kuchh malum ho tum ko
kaun uthata hai rah rah kar tisen sham-sawere dil mein

ye baat phir mujhe suraj batane aaya hai

By

ye baat phir mujhe suraj batane aaya hai
azal se mere taaqub mein mera saya hai
buland hoti chali ja rahi hain diwaren
asir-e-dar hai wo jis ne mujhe bulaya hai
main la-zawal tha mit mit ke phir ubharta raha
ganwa ganwa ke mujhe zindagi ne paya hai
wo jis ke nain hain gahre samundaron jaise
wo apni zat mein mujh ko dubone aaya hai
mili hai us ko bhi shohrat 'qatil' meri tarah
jab us ne apne labon par mujhe sajaya hai