tere KHaton ki KHushbu

By

tere khaton ki khushbu
hathon mein bas gai hai sanson mein rach rahi hai
khwabon ki wusaton mein ek dhum mach rahi hai
jazbaat ke gulistan mahka rahi hai har su
tere khaton ki khushbu
tere khaton ki mujh par kya kya inayaten hain
be-muddaa karam hai beja shikayaten hain
apne hi qahqahon par barsa rahi hai aansu
tere khaton ki khushbu
teri zaban ban kar aksar mujhe sunae
baaten bani banai jumle rate-ratae
mujh par bhi kar chuki hai apni wafa ka jadu
tere khaton ki khushbu
samjhe hain kuchh usi ne aadab chahaton ke
sab ke liye wahi hain alqab chahaton ke
sab ke liye barabar phaila rahi hai bazu
tere khaton ki khushbu
apne siwa kisi ko main jaanta nahin tha
sunta tha lakh baaten aur manta nahin tha
ab khud nikal lai beganagi ke pahlu
tere khaton ki khushbu
kya jaane kis taraf ko chupke se mud chuki hai
gulshan ke par laga kar sahra ko ud chali hai
roka hazar main ne aai magar na qabu
tere khaton ki khushbu

sattarahwan singar

By

tod ke ghunghru
chhod ke mahfil
chup ka baran kyun pahna hai
pet pe khujli
munh par dane
wah tera kya kahna hai
kyun sharmae
kyun ghabrae
ye dukh hans kar sahna hai
pyari beta
yahi maraz to
is peshe ka gahna hai

sanwli

sanwle jism ki har qaus mein lahraata hai
muskuraati hui shamon ka salona jadu
raqs karti hai tere husn ki ranai mein
wadi-e-najd ke jhonkon ki lajili khushbu
ye tere dosh pe bal kha ke bikharti zulfen
jaise mabad mein sulagte hue sandal ka dhuan
jaise maghmum musawwir ke siyah-posh khayal
jaise mauhum jaziron ki chhabeli pariyan
tu wo barsat ki ghanghor ghata hai jis mein
ek kaifiyat naghmat chhupi baithi hai
dudhiya husn se ukta ke meri nazron ne
jab bhi dekha hai tere rang ka bharpur nikhaar
gunj uthi zehn mein udte hue bhanwaron ki sada
rach gai ruh mein gati hui koyal ki pukar
kaun hai jis ne tera zikr na chheda ho kabhi
ab to har bazm ka hai ek hi mauzu-e-sukhan
koi deta hai laqab laila-e-be-mahmil ka
koi kahta hai tujhe pyar se kali nagin
kaun sa lafz tere waste ijad karun
sochta hun tujhe kis nam se main yaad karun

diwali

By

dar-o-diwar par chhai hai udasi gham ki
mahw-e-hairat hai khushi dida-e-hairan ki tarah
koi jhonka koi aahat koi aawaz nahin
raat viran hai kisi shahr-e-khamoshan ki tarah
din dhale dekh liya tha koi udta baadal
kunmunati hai faza mausam-e-baran ki tarah
dur pardes ki rahon mein bhatakte rahi
dil mein phir yaad teri aai hai mehman ki tarah
wo sar-e-sham dar-o-baam pe jalte dipak
kya meri tarah tujhe yaad nahin aate hain
raushni mein wo nahae hue ujle manzar
kya nigahon mein teri aaj bhi lahraate hain
kya wo bite hue pur-nur chahakte lamhe
aaj bhi dil mein tere git koi gate hain
kya tere khwab gham-e-haal ke virane mein
ab bhi mazi ka fasana koi dohraate hain
wo ujale jo teri tarah mujhe bhul gae
dur se ab meri fariyaad nahin sun sakte
dil ke taron ko bahut jama kiya hai main ne
wo magar naghma-e-ehsas nahin ban sakte
meri aawaz ko jazbaat ki diwar ke par
sun to sakte hain magar sar ko nahin dhun sakte
main jo roun bhi to ye waqt ke andhe sathi
kisi bikhre hue moti ko nahin chun sakte
dip-mala ki ye bechain bilakti hui raat
us ke daman mein mere ashk-e-rawan palte hain
ham-safar koi nahin hai meri tanhai ka
chand sae hain jo hamrah mere chalte hain
dabdabai hui aankhon mein hai sawan ki jhadi
aur dil mein mere yaadon ke shajar palte hain
dekh main ne bhi manai hai yahan diwali
meri palkon pe bhi ashkon ke diye julte hain