aage kuchh uske zikr-e-dil-e-zar mat karo

aage kuchh us ke zikr-e-dil-e-zar mat karo
sab khairiyat hai us se kuchh izhaar mat karo
jaane do jo nasib mein hona tha so hua
yaro khuda ke waste takrar mat karo
aaina le ke pahle tanik saj to dekh lo
milne ka ghair ke abhi inkar mat karo
sar chadh raha hai kal yunhi aashiqon ke yan
patti se tum ye baal numudar mat karo
ai aah-o-nala chhup ke main aaya hun is jagah
aalam ko shor kar ke khabar-dar mat karo
apni bisat mein to yahi jins-e-dil hai yan
go ab pasand is ko kharidar mat karo
pyare kamar kahan hai tumhaare yunhi ba-zan
sun kar kisi se jhut par israr mat karo
'qaem' wo tab kahe tha shab ahwal-e-khalq dekh
mujh sa to haq kisi ko trahdar mat karo

aaj aap mere haal pe karte hain tassuf

aaj aap mere haal pe karte hain tassuf
ashfaq inayat karam mehr talattuf
ai girya pas-e-qafila dil nam hai ek yar
ye khasta bhi nibh jae jo yak dam ho tawaqquf
hai dol to nala ka wahi dil bhi wahi lek
tasir na ab is mein hai na is mein tasarruf
sufi hai wo be-ilm ho jo hasti se apni
kis kaam padha tu ne jo yun ilm-e-tasawwuf
khamoshi bhi kuchh turfa latifa hai ki 'qaem'
karna pade jis mein na tasanno na takalluf

aaj ji mein hai ki khul kar mai-parasti kijiye

aaj ji mein hai ki khul kar mai-parasti kijiye
khub si mai pijie aur der masti kijiye
zohd-e-khushk aakhir kahan tak maya-e-tar-damani
gharq lae mai bhi chande rakht-e-hasti kijiye
tang-tar hai dast-e-hajat se dil abna-e-dahr
kis ke aage zahir apni tang-dasti kijiye
darpae-virani-e-dil hai jo basta hai yahan
kis tarah ya-rab is ujad ghar ko basti kijiye
lab pe fawware ke jari hai ye misra dam-ba-dam
de agar khaliq bulandi mail-e-pasti kijiye
muft tak dun hun main dil tis par koi leta nahin
han magar is se bhi kuchh ye jins sasti kijiye
tuk gareban aaj phat kar dhajjiyen ho le to phir
chaak par sine ke 'qaem' pesh-dasti kijiye

aao kuchh shaghl karen baiThe hain uryan itne

aao kuchh shaghl karen baithe hain uryan itne
phaden sina hi go hath aae gareban itne
aah koi jo use aan ke samjhata ho
dekhte hain khade hindu o musalman itne
sach kah ai baad-e-saba hai kisi gul par ye bahaar
tu ne dekhe hain zamane ke gulistan itne
shor mahshar ka rahe kyun na tere kuche mein
jis jagah howen ikatthe dil-e-nalan itne
hum se wamandon ko allah nibahe to nibhen
tan so ye khasta o darpesh bayaban itne
dam bhi kuchh chiz hai jab chuk gaya baat tamam
kaun si zist pe tu karta hai saman itne
tujh ko 'qaem' rakhe allah bahut sa ai amir
mujtama sae mein hain jis ke sukhan-dan itne