wo ranjishen wo marasim ka silsila hi nahin

By

wo ranjishen wo marasim ka silsila hi nahin
yahan kisi mein wo pahla sa rabta hi nahin
main khushbuon ke taaqub mein aa gaya hun wahan
jahan se laut ke jaane ka rasta hi nahin
ye khud-sari ya shararat usi ka hissa hai
wo koi khel mohabbat mein haarta hi nahin
ye e'tiraf bhi ghabra ke kar liya main ne
main chahta hun tujhe sirf sochta hi nahin
uda ke le gaya raaton ki nind aankhon se
wo kam-sukhan jo kabhi mujh se bolta hi nahin
pukarta hun main us ko usi ki chaukhat se
kiwad jism ke jo mujh pe kholta hi nahin
tabah ho gae khuddariyon mein donon 'rais'
wo khud ko saunp de lekin main mangta hi nahin

tamam phul se chehron ki surKHiyan uD jaen

By

tamam phul se chehron ki surkhiyan ud jaen
agar chaman se ye khush-rang titliyan ud jaen
wo bewafa bhi hai maghrur bhi hai patthar bhi
use tarashne baithun to chheniyan ud jaen
ye hausla hai hamara ki ab bhi raushan hain
hawa ki zad pe raho tum to topiyan ud jaen
bhara hua hai wo barud mere sine mein
agar koi mujhe chhu le to dhajjiyan ud jaen

nind aankhon mein jo aati to jagane lagte

By

nind aankhon mein jo aati to jagane lagte
khwab bachchon ki tarah shor machane lagte
raat ko ghar nahin aata to mere ghar wale
subh ke waqt meri khair manane lagte
tere aa jaane se phir aa gai zakhmon pe bahaar
tu nahin aata to sab zakhm purane lagte
wo hamein dhundh ke ek raat mein ghar le aaya
hum use dhundne jate to zamane lagte
qais jangal ko agar chhod ke aa jata 'rais'
to mere shahr ke ladke bhi satane lagte

koi daraKHt koi saeban rahe na rahe

By

koi darakht koi saeban rahe na rahe
buzurg zinda rahen aasman rahe na rahe
koi to dega sada harf-e-haq ki duniya mein
hamare munh mein hamari zaban rahe na rahe
hamein to padhna hai maidan-e-jang mein bhi namaz
muazzinon ke labon par azan rahe na rahe
hamein to ladna hai duniya mein zalimon ke khilaf
qalam rahe koi tir-o-kaman rahe na rahe
ye eqtidar ke bhuke ye rishwaton ke wazir
bala se un ka ye hindostan rahe na rahe
khuda karega samundar mein rahnumai bhi
ye naw baqi rahe baadban rahe na rahe

jo dekhe the wo sare KHwab ruKHsat ho gae hain

By

jo dekhe the wo sare khwab rukhsat ho gae hain
hamare sab adab aadab rukhsat ho gae hain
ye duniya jis gharane ke sabab tu ne banai
teri duniya se wo be-ab rukhsat ho gae hain
nigahban the jo sahil par hamari kashtiyon ke
wo sab ke sab sar-e-girdab rukhsat ho gae hain
pada hai jab qabile par hamare waqt koi
hamare mo'atabar ahbab rukhsat ho gae hain
tulu-e-subh ki afwah par mahfil se us ki
hazaron anjum-o-mahtab rukhsat ho gae hain

ek muddat se tujhe dil mein basa rakkha hai

By

ek muddat se tujhe dil mein basa rakkha hai
main tujhe yaad-dahani se alag rakhta hun
wo sunega to chhalak utthengi aankhen us ki
is liye khud ko kahani se alag rakhta hun
wo jo bachpan mein tere sath padha karta tha
un kitabon ko nishani se alag rakhta hun
tazkira us ka ghazal mein nahin karta hun 'rais'
main use lafz-o-maani se alag rakhta hun