sath manzil thi magar KHauf-o-KHatar aisa tha

By

sath manzil thi magar khauf-o-khatar aisa tha
umr-bhar chalte rahe log safar aisa tha
jab wo aae to main khush bhi hua sharminda bhi
meri taqdir thi aisi mera ghar aisa tha
hifz thin mujh ko bhi chehron ki kitaben kya kya
dil shikasta tha magar tez nazar aisa tha
aag odhe tha magar bant raha tha saya
dhup ke shahr mein ek tanha shajar aisa tha
log khud apne charaghon ko bujha kar soe
shahr mein tez hawaon ka asar aisa tha

sabab wo puchh rahe hain udas hone ka

By

sabab wo puchh rahe hain udas hone ka
mera mizaj nahin be-libas hone ka
naya bahana hai har pal udas hone ka
ye faeda hai tere ghar ke pas hone ka
mahakti raat ke lamho nazar rakho mujh par
bahana dhund raha hun udas hone ka
main tere pas bata kis gharaz se aaya hun
subut de mujhe chehra-shanas hone ka
meri ghazal se bana zehn mein koi taswir
sabab na puchh mere dewdas hone ka
kahan ho aao meri bhuli-bisri yaado aao
khush-amdid hai mausam udas hone ka
kai dinon se tabiat meri udas na thi
yahi jawaz bahut hai udas hone ka
main ahmiyat bhi samajhta hun qahqahon ki magar
maza kuchh apna alag hai udas hone ka
mere labon se tabassum mazaq karne laga
main likh raha tha qasida udas hone ka
pata nahin ye parinde kahan se aa pahunche
abhi zamana kahan tha udas hone ka
main kah raha hun ki ai dil idhar-udhar na bhatak
guzar na jae zamana udas hone ka

mohabbaton ke safar par nikal ke dekhunga

By

mohabbaton ke safar par nikal ke dekhunga
ye pul-siraat agar hai to chal ke dekhunga
sawal ye hai ki raftar kis ki kitni hai
main aaftab se aage nikal ke dekhunga
mazaq achchha rahega ye chand-taron se
main aaj sham se pahle hi dhal ke dekhunga
wo mere hukm ko fariyaad jaan leta hai
agar ye sach hai to lahja badal ke dekhunga
ujale bantne walon pe kya guzarti hai
kisi charagh ki manind jal ke dekhunga
ajab nahin ki wahi raushni mujh mil jae
main apne ghar se kisi din nikal ke dekhunga

log har moD pe ruk ruk ke sambhalte kyun hain

By

log har mod pe ruk ruk ke sambhalte kyun hain
itna darte hain to phir ghar se nikalte kyun hain
mai-kada zarf ke mear ka paimana hai
khali shishon ki tarah log uchhalte kyun hain
mod hota hai jawani ka sambhalne ke liye
aur sab log yahin aa ke phisalte kyun hain
nind se mera talluq hi nahin barson se
khwab aa aa ke meri chhat pe tahalte kyun hain
main na jugnu hun diya hun na koi tara hun
raushni wale mere nam se jalte kyun hain

kali raaton ko bhi rangin kaha hai maine

By

kali raaton ko bhi rangin kaha hai main ne
teri har baat pe aamin kaha hai main ne
teri dastar pe tanqid ki himmat to nahin
apni pa-posh ko qalin kaha hai main ne
maslahat kahiye use ya ki siyasat kahiye
chil kawwon ko bhi shahin kaha hai main ne
zaiqe barha aankhon mein maza dete hain
baz chehron ko bhi namkin kaha hai main ne
tu ne fan ki nahin shajre ki himayat ki hai
tere eazaz ko tauhin kaha hai main ne

kabhi dimagh kabhi dil kabhi nazar mein raho

By

kabhi dimagh kabhi dil kabhi nazar mein raho
ye sab tumhaare hi ghar hain kisi bhi ghar mein raho
jala na lo kahin hamdardiyon mein apna wajud
gali mein aag lagi ho to apne ghar mein raho
tumhein pata ye chale ghar ki rahaten kya hain
hamari tarah agar chaar din safar mein raho
hai ab ye haal ki dar dar bhatakte phirte hain
ghamon se main ne kaha tha ki mere ghar mein raho
kisi ko zakhm diye hain kisi ko phul diye
buri ho chahe bhali ho magar khabar mein raho