wo ek ik baat pe rone laga tha

By

wo ek ek baat pe rone laga tha
samundar aabru khone laga tha
lage rahte the sab darwaze phir bhi
main aankhen khol kar sone laga tha
churaata hun ab aankhen aainon se
khuda ka samna hone laga tha
wo ab aaine dhota phir raha hai
use chehre pe shak hone laga tha
mujhe ab dekh kar hansti hai duniya
main sab ke samne rone laga tha

teri har baat mohabbat mein gawara kar ke

By

teri har baat mohabbat mein gawara kar ke
dil ke bazar mein baithe hain khasara kar ke
ek chingari nazar aai thi basti mein use
wo alag hat gaya aandhi ko ishaara kar ke
aasmanon ki taraf phenk diya hai main ne
chand mitti ke charaghon ko sitara kar ke
main wo dariya hun ki har bund bhanwar hai jis ki
tum ne achchha hi kiya mujh se kinara kar ke
muntazir hun ki sitaron ki zara aankh lage
chand ko chhat pur bula lunga ishaara kar ke

sisakti rut ko mahakta gulab kar dunga

By

sisakti rut ko mahakta gulab kar dunga
main is bahaar mein sab ka hisab kar dunga
main intizar mein hun tu koi sawal to kar
yaqin rakh main tujhe la-jawab kar dunga
hazar pardon mein khud ko chhupa ke baith magar
tujhe kabhi na kabhi be-naqab kar dunga
mujhe bharosa hai apne lahu ke qatron par
main neze neze ko shakh-e-gulab kar dunga
mujhe yaqin ki mahfil ki raushni hun main
use ye khauf ki mahfil kharab kar dunga
mujhe gilas ke andar hi qaid rakh warna
main sare shahr ka pani sharab kar dunga
mahajanon se kaho thoda intizar karen
sharab-khane se aa kar hisab kar dunga

sawal ghar nahin buniyaad par uThaya hai

By

sawal ghar nahin buniyaad par uthaya hai
hamare panw ki mitti ne sar uthaya hai
hamesha sar pe rahi ek chatan rishton ki
ye bojh wo hai jise umr-bhar uthaya hai
meri ghulail ke patthar ka kar-nama tha
magar ye kaun hai jis ne samar uthaya hai
yahi zamin mein dabaega ek din hum ko
ye aasman jise dosh par uthaya hai
bulandiyon ko pata chal gaya ki phir main ne
hawa ka tuta hua ek par uthaya hai
maha-bali se baghawat bahut zaruri hai
qadam ye hum ne samajh soch kar uthaya hai

sath manzil thi magar KHauf-o-KHatar aisa tha

By

sath manzil thi magar khauf-o-khatar aisa tha
umr-bhar chalte rahe log safar aisa tha
jab wo aae to main khush bhi hua sharminda bhi
meri taqdir thi aisi mera ghar aisa tha
hifz thin mujh ko bhi chehron ki kitaben kya kya
dil shikasta tha magar tez nazar aisa tha
aag odhe tha magar bant raha tha saya
dhup ke shahr mein ek tanha shajar aisa tha
log khud apne charaghon ko bujha kar soe
shahr mein tez hawaon ka asar aisa tha

sabab wo puchh rahe hain udas hone ka

By

sabab wo puchh rahe hain udas hone ka
mera mizaj nahin be-libas hone ka
naya bahana hai har pal udas hone ka
ye faeda hai tere ghar ke pas hone ka
mahakti raat ke lamho nazar rakho mujh par
bahana dhund raha hun udas hone ka
main tere pas bata kis gharaz se aaya hun
subut de mujhe chehra-shanas hone ka
meri ghazal se bana zehn mein koi taswir
sabab na puchh mere dewdas hone ka
kahan ho aao meri bhuli-bisri yaado aao
khush-amdid hai mausam udas hone ka
kai dinon se tabiat meri udas na thi
yahi jawaz bahut hai udas hone ka
main ahmiyat bhi samajhta hun qahqahon ki magar
maza kuchh apna alag hai udas hone ka
mere labon se tabassum mazaq karne laga
main likh raha tha qasida udas hone ka
pata nahin ye parinde kahan se aa pahunche
abhi zamana kahan tha udas hone ka
main kah raha hun ki ai dil idhar-udhar na bhatak
guzar na jae zamana udas hone ka