tirgi bala ki hai main koi sada lagaun

tirgi bala ki hai main koi sada lagaun
ek shakhs sath tha us ka kuchh pata lagaun
bahte jaane ke siwa bas mein kuchh nahin to kya
dushmanon ke ghat hain naw kaise ja lagaun
wo tamam rang hai us se baat kya karun
wo tamam khwab hai us ko hath kya lagaun
kuchh na ban pade to phir ek ek dost par
baat baat shak karun tohmaten juda lagaun
manzar aas-pas ka dubta dikhai de
main kabhi jo dur ki baat ka pata lagaun
aisi teri bazm kya aisa zabt-o-nazm kya
mere ji mein aai hai aaj qahqaha lagaun
ye hai kya jagah miyan kah rahe hain sab ki yan
kuchh kashan kashan rahun dil zara zara lagaun

sarsabz mausamon ka nasha bhi mere liye

sarsabz mausamon ka nasha bhi mere liye
talwar ki tarah hai hawa bhi mere liye
mere liye hain manzar-o-mani hazar rang
lafzon ke darmiyan hai khala bhi mere liye
shamil hun qafile mein magar sar mein dhund hai
shayad hai koi rah juda bhi mere liye
main khush hua ki muzhda safar ka mujhe mila
phaila hua hai dasht-e-saza bhi mere liye
dekhun main aaina to dhuan phail phail jae
bolun to ajnabi hai sada bhi mere liye
mere liye tamam aziyyat tamam qahr
aur phul se labon pe dua bhi mere liye
'bani' ajab tarah se khuli khush-muqaddari
barg-e-shafaq bhi barg-e-hina bhi mere liye

na harifana mere samne aa main kya hun

na harifana mere samne aa main kya hun
tera hi jhonka hun ai tez hawa main kya hun
raqs yak qatra-e-khun aap kashish aap junun
ai ram-e-raushni-e-harf-o-sada main kya hun
ek bikharti hui tartib-e-badan ho tum bhi
rakh hote hue manzar ke siwa main kya hun
ek tahni ka yahan apna muqaddar kaisa
ped ka ped hi girta hai juda main kya hun
tu bhi zanjir-ba-zanjir badha hai meri samt
sath mere bhi riwayat hai naya main kya hun
kaun hai jis ke sabab tujh mein mohabbat jagi
mujh mein kya tujh ko nazar aaya bata main kya hun
abhi hona hai mujhe aur kahin ja ke tulua
dubte mehr ke hamrah bujha main kya hun

guzar raha hun siyah andhe faslon se main

guzar raha hun siyah andhe faslon se main
na ab hun rah se ibarat na manzilon se main
kahan kahan se alag kar sakoge tum mujh ko
juda hua hun yahan lakh silsilon se main
qadam milane mein sab kar rahe the quwwaten sarf
mila hun rah mein kitne hi qafilon se main
main us ke panw ki zanjir dekhta tha bahut
kuchh aashna na tha apni hi mushkilon se main
ajib log hain kuchh kah do man lete hain
hua hun zer bahut zud qatilon se main
kaho to sath baha le chalun ye dukh bhare shahr
guzar raha hun ajab khasta sahilon se main
main kyun burai sunun doston ki ai 'bani'
alag nahin unhin khote khare dilon se main

chamakti aankh mein sahra dikhai saf deta hai

chamakti aankh mein sahra dikhai saf deta hai
mere lahje mein sannata sunai saf deta hai
main ek asrar-e-matam lakh khud mein gum hua jaun
magar sina kisi shai ki duhai saf deta hai
wo kya kya baat karta hai na ek pal bhi bichhadne ki
magar lahja ki ehsas-e-judai saf deta hai
safen yun to muqabil dushmanon ki hain magar un mein
ajab ek mehrban chehra dikhai saf deta hai
main aa pahuncha hun ai 'bani' ajab andhi jagah mana
hai ab bhi ek rasta jo sujhai saf deta hai

raqs

nach han nach ki har shorish-o-hangama par
phail jae teri jhan-jhan ka hasin pairahan
nach han nach ki sine mein tere
ek moti ki tarah raaz zamane ka simat kar rah jae
bazuon ko kabhi hone de daraaz
jama karne de khad-o-khal kabhi apni hasin aankhon ko
farsh-e-awaz pe rakh apne pur-asrar qadam
aur chamakte hue sangit ka jadu pi ja
nach sad-nashsha-o-shadabi se
nachti ja isi masti mein ki tu ek kanwal ban jae
aur tujh ko kisi talab ke sine mein utar aaen hum
bhut aa kar teri rangat mein basera kar len
aur hum
budhe darakhton ki kuhan-sal latakti hui shakhon
se lipat kar roen
sal-ha-sal lipat kar roen