kahan jate hain aage shahr-e-jaan se

By

kahan jate hain aage shahr-e-jaan se
ye bal khate hue raste yahan se
wahan ab khwab-gahen ban gai hain
uthe the aab-dida hum jahan se
zamin apni kahani kah rahi hai
alag andesha-e-sud-o-ziyan se
inhin bante-bigadte daeron mein
wo chehra kho gaya hai darmiyan se
utha laya hun sare khwab apne
teri yaadon ke bosida makan se
main apne ghar ki chhat par so raha hun
ki baaten kar raha hun aasman se
wo in aankhon ki mehrabon mein har shab
sitare tank jata hai kahan se
'rasa' is aabna-e-roz-o-shab mein
damakte hain kanwal fanus-e-jaan se

apni be-chehragi mein patthar tha

By

apni be-chehragi mein patthar tha
aaina bakht mein samundar tha
sarguzisht-e-hawa mein likha hai
aasman ret ka samundar tha
kis ki tasnif hai kitab-e-dil
kaun talif par muqarrar tha
kuchh to wazeh na tha teri surat
aur kuchh aaina mukaddar tha
wo nazar khizr-e-rah maqtal thi
us se aage mera muqaddar tha
raat aaghosh-e-dida-e-tar mein
aks-e-aghosh-e-dida-e-tar tha
ye qadam is gali ke lagte hain
jis gali mein kabhi mera ghar tha

dil ne apni zaban ka pas kiya

By

dil ne apni zaban ka pas kiya
aankh ne jaane kya qayas kiya
kya kaha baad-e-subh-gahi ne
kya charaghon ne iltimas kiya
kuchh ajab taur zindagani ki
ghar se nikle na ghar ka pas kiya
ishq ji jaan se kiya hum ne
aur be-khauf-o-be-hiras kiya
raat aai udhar sitaron ne
shabnami pairahan libas kiya
saya-e-gul to main nahin jis ne
gul ko dekha na gul ko bas kiya
baal to dhup mein safed kiye
zard kis chhanw mein libas kiya
kya tera e'tibar tha tu ne
kya ghazab shahr-e-nasapas kiya
kya bataun sabab udasi ka
be-sabab main use udas kiya
zindagi ek kitab hai jis se
jis ne jitna bhi iqtibas kiya
jab bhi zikr-e-ghazal chhida us ne
zikr mera ba-taur-e-khas kiya