yun bhi ek bazm-e-sada humne sajai pahron

yun bhi ek bazm-e-sada hum ne sajai pahron
kan bajte rahe aawaz na aai pahron
ek tera nam tha ubhra jo fasil-e-lab par
warna sakte mein rahi sari khudai pahron
lamha-bhar ke liye barsi teri yaadon ki ghata
hum ne bhigi hui chilman na uthai pahron
wo to phir ghair tha ghairon se shikayat kya ho
nabz apni bhi mere hath na aai pahron
aankh jhapki to rawan thi wo hawa ke rukh par
hum ne jo ret ki diwar banai pahron
par samete hue yun chupke se lamha guzra
shab ki dahliz pe di hum ne duhai pahron
laut kar aae na bhatke hue rahi dil mein
aag is dasht mein hum ne to jalai pahron
phir bhi le de ke wahi rog purana nikla
hum ne modi hai khayalon ki kalai pahron
wo hayule the ki sae the sar-e-raqs 'rashid'
jism ki ek bhi jhankar na aai pahron

ye kaun sa suraj mere pahlu mein khaDa hai

ye kaun sa suraj mere pahlu mein khada hai
mujh se to 'rashid' ab mera saya bhi bada hai
tu jis pe khafa hai mere andar ka ye insan
us baat pe mujh se bhi kai bar lada hai
dekha jo palat kar to mere sae mein gum tha
wo shakhs jo mujh se qad-o-qamat mein bada hai
sadiyon use pala hai samundar ne sadaf mein
pal-bhar ke liye jo meri palkon mein jada hai
khurshid ke chehre pe lakiren hain lahu ki
khanjar sa koi raat ke sine mein gada hai
ek lafz jo nikla tha safen dil ki ulat kar
muddat se mere lab pe wo be-jaan pada hai
takra ke palatta hun lagatar udhar se
ye sang-sifat kaun sar-e-rah khada hai

tujhse bhi hasin hai tere afkar ka rishta

tujh se bhi hasin hai tere afkar ka rishta
tu mang le mujh se mere ashaar ka rishta
wo dhup mein nikhra hua billor sa paikar
chandi sa chamakta hua didar ka rishta
tanhai mein pahunche to sabhi the tahi-daman
bazar mein chhod aae the bazar ka rishta
ek aur girah sans ki dori mein padegi
yaad aaya mujhe bhula hua pyar ka rishta
afkar ke jangal mein khada soch raha hun
kis tarah maani se ho izhaar ka rishta
kyun yaad dilate ho 'rashid' un ko ye bandhan
ab kaun nibhata hai ye bekar ka rishta

sahra sahra baat chali hai nagri nagri charcha hai

sahra sahra baat chali hai nagri nagri charcha hai
raat ke gham mein suraj sain baadal odhe phirta hai
jhonka jhonka teri khushbu mujh se lipat kar guzri hai
reza reza teri khatir main ne jism ganwaya hai
din-bhar baadal chham-chham barsa sham ko matla saf hua
tab ja kar ek qaus-e-quzah par tera paikar ubhra hai
tu ne jis ki jholi mein do phul bhi hans kar dal diye
sari umr wo kaghaz par khushbu ki lakiren khinchta hai
tum kyun tez nokile neze tan ke mujh par jhapte ho
mera muqaddar tund bagulo yun bhi to bujh jaana hai
main ne apne gird bana li zakhmon ki diwar nai
ek purana gham lekin rah rah kar mujh par hansta hai
jalte jalte main bujh jaun ya tu agni-rup mein aa
tera mera mel ho kaise main suraj tu saya hai
sab kohsar samundar sahra ghumen us ke gird 'rashid'
wo ek shakhs jo duniya-bhar mein tanha tanha rahta hai

sadiyon se main is aankh ki putli mein chhupa tha

sadiyon se main is aankh ki putli mein chhupa tha
palkon pe agar mujh ko saja lete to kya tha
tu phail gaya ta-ba-ufuq mujh se bichhad kar
main jism ke zindan mein tujhe dhundh raha tha
han mujh ko tere surkh kajawe ki qasam hai
is rah mein pahle koi ghunghru na baja tha
guzre the mere samne tum dosh-e-hawa par
main dur kahin ret ke tile pe khada tha
sine mein ubharte hue suraj ka talatum
aankhon mein teri dubti raaton ka nasha tha
guzra na idhar se koi patthar ka pujari
muddat se main is rah ke mathe pe saja tha
jab waqt ki dahliz pe shab kanp rahi thi
shoala sa mere jism ke aangan se utha tha
ab jaaniye kya naqsh hawaon ne banae
us ret pe main ne to tera nam likha tha
ai dida-e-hairan to zara aur qarib aa
ai dhundne wale main tujhe dhundh raha tha

pani ki tarah ret ke sine mein utar ja

pani ki tarah ret ke sine mein utar ja
ya phir se dhuan ban ke khalaon mein bikhar ja
lahra kisi chhitnar pe o mit hawa ke
sukhe hue patton se dabe panw guzar ja
chadhti hui is dhup mein saya to dhalega
ehsan koi ret ki diwar pe dhar ja
bujhti hui ek shab ka tamashai hun main bhi
ai subh ke tare meri palkon pe thahar ja
lahraega aakash pe sadiyon tera paikar
ek bar meri ruh ke sanche mein utar ja
is ban mein raha karti hai parchhain sada ki
ai raat ke rahi tu zara tez guzar ja
us par chala hai to 'rashid' apna asasa
behtar hai kisi aankh ki dahliz pe dhar ja