teri aawaz

rah mein chalte hue bhid se uktae hue
teri aawaz suni main ne kai sal ke baad
soch kar zehn pareshan raha der talak
shahr ke shor-e-khurafat ke hangamon mein
teri aawaz jo aai to kahan se aai
phir kisi wahm ke narghe mein to main aa na gaya
teri aawaz ka sargam kahin dhoka to nahin
der tak zehn sawalat mein uljha hi raha
koi ummid na jis baat ki thi kaise hui
kaise pathrai hui aankh mein aansu aae
kaise phir bhula hua qissa tujhe yaad aaya
rah mein chalte hue bhid se uktae hue
teri aawaz suni main ne kai sal ke baad
teri aawaz ka dhoka hai agar wahm mera
mujh ko rahna hai isi wahm ki sarshaari mein
teri aawaz ke dhoke se ye mahsus hua
koi khwahish ho tamanna ho bahakti hai zarur
ab bhi sine mein koi chiz dhadakti hai zarur

nadi ko dekh kar

nadi ke haal ko
ab dekh kar afsos hota hai
nadi ka ek mazi tha
na jaane kitni tarikhi kitabon mein
nadi ki ahmiyat ke
an-ginat abwab raushan hain
nadi tahzib ka maskan rahi hai
isi ki mauj ne
aaghaz mein insan ko
waqif karaya
irtiqai marhalon se
isi ke saf aur shaffaf pani ne
yugon tak
mukhtalif naslon ki
dil se aabiyari ki
isi ki chikhti chinghadti lahron pe
ghalba pa ke insan ne
taraqqi ki
magar andhi taraqqi ne
nadi ki shakl
itni maskh kar dali
ki aankhon ko kisi surat
yaqin aata nahin
jo kuchh nazar ke samne hai
wo haqiqat hai
gande badbu-dar nale ki tarah jo
bah rahi hai
yahi to wo nadi hai
tazkire jis ke kitabon mein bhare hain
kitni tahzibon ka jo maskan rahi hai
nadi ke haal ka jab jaeza
leti hain nazren
to bahut afsos hota hai

jangal ki lakDiyan

pahadi raston par
lakdiyon ki gathriyan sar par sambhaale
ja raha hai aadi-wasi auraton ka qafila
ye qafila kuchh dur ja kar
ganw ke bazar mein thahrega
aur phir lakdiyan sar se utari jaengi
khubsurat jangalon se kat kar
lai gai ye lakdiyan
bazar ki zinat banengi
lakdiyon ka bojh dho kar
lane wali aurten
khamosh rah kar
dil hi dil mein
apne hatte-katte mardon ki
jawan-mardi ke naghme gaengi
aur ganw ke bazar se kuchh dur
un ke mard
apni tez kulhadi se
jangal ka safaya karne mein
masruf honge
ye wahi jangal hai jis ka husn
qaem tha inhin shaidaiyon se
zarre zarre mein
isi jangal ke goshe goshe mein
shaidaiyon ki ruh basti thi
isi jangal mein un ka jism laghar ho chala hai
aur apni zindagi ko
baqi rakhne ka yahi ek rasta
in ko nazar aaya hai
jangal khatm kar ke khud wo jina chahte hain
hum taraqqi ke hazaron dawe
karne wale danish-mand
andar se bahut hi khokhle hain

zamana guzra hai lahron se jang karte hue

zamana guzra hai lahron se jang karte hue
kabhi to par lagun dubte ubharte hue
bade hi shauq se ek aashiyan banaya tha
main kaise dekhun use tutte bikharte hue
kabhi to zehn ke parde pe naqsh ubhrega
ye sochta hun tasawwur mein rang bharte hue
har ek maqam pe tufan ne daboch liya
jahan jahan bhi chhupa aandhiyon se darte hue
wo bund bund qayamat wo nur nur badan
kisi ne dekha hi kab hai use sanwarte hue
wo meri zat se ab bad-guman nahin shayad
tabhi to dekh nahin sakta mujh ko marte hue

yun na begana raho git sunati hai hawa

yun na begana raho git sunati hai hawa
dil ki sargoshi suno git sunati hai hawa
zindagi saz hai is saz pe naghme chhedo
tum bhi kuchh khwab buno git sunati hai hawa
raat ke pichhle pahar khwab-libaada taj kar
aaj tum khud se milo git sunati hai hawa
rah mein aaengi chattanen bahut si lekin
mauj ke sath baho git sunati hai hawa
shab ke sahil pe kai jugnu dikhai denge
koi ghamgin na ho git sunati hai hawa
aisi chahat mein nahin koi qabahat lekin
apna bhi dhyan rakho git sunati hai hawa
khushbuon ko koi taqsim kahan kar paya
sarhaden tod bhi do git sunati hai hawa
manzilen badh ke tere qadmon ka bosa lengi
ye safar tai to karo git sunati hai hawa
thak ke jo baithe to toli se bichhad jaoge
aage hi badhte chalo git sunati hai hawa