aashiyan DhunDhti hai

By

thaki haari chidiyon ke
ek ghol ki tarah
jab sham utri
ghane bargadon par
meri kalpanaon ke panchhi
liye apni chonchon mein tinke
ude un pur-asrar
andhi
dishaon ki jaanib
jahan aag ke jangalon mein
meri aatma
kitni sadiyon se byakul
koi aashiyan dhundhti hai

zindagani hans ke tai apna safar kar jaegi

By

zindagani hans ke tai apna safar kar jaegi
yun ajal ka moajiza ek roz sar kar jaegi
kya khabar thi chah us ki dil mein ghar kar jaegi
mujh ko khud mere hi andar dar-ba-dar kar jaegi
pahle apna khun to bhar dun zindagi ki mang mein
jab use jaana hi thahra ban sanwar kar jaegi
phul le jaegi sare tod kar khwabon ke wo
meri shakh-e-zindagi ko be-samar kar jaegi
aaegi ek roz wo shab ki siyahi odh kar
meri subh-e-zist ko raushan sahar kar jaegi
rok lo is dard ki dewi se hain sab raunaqen
ye gai gar ruth kar dil ko khandar kar jaegi
log kahte hain ki wo ladki saliqa-mand hai
aa gai is ghar mein to is ghar ko ghar kar jaegi

in pattharon ke shahr mein dil ka guzar kahan

By

in pattharon ke shahr mein dil ka guzar kahan
le jaen hum utha ke ye shishe ka ghar kahan
hum apna nam le ke khud apne hi shahr mein
ghar ghar pukar aae khula koi dar kahan
jaise har ek dar pe khamoshi ka qufl ho
ab gunjti hai shahr mein zanjir-e-dar kahan
har waqt samne tha samundar khulus ka
lekin kisi ne dekha kabhi dub kar kahan
jo chaho bhi to jism se nikaloge kis tarah
mahbas mein sans ke koi diwar-o-dar kahan
is sakht dopahar mein kahan ja ke baithiye
rahon mein dur tak 'saba' koi shajar kahan

chakkhoge agar pyas baDha dega ye pani

By

chakkhoge agar pyas badha dega ye pani
pani tumhein hargiz na 'saba' dega ye pani
ek roz dubo dega mere jism ki kashti
mujh se mujhe aazad kara dega ye pani
pahunchega sarabon ka wahan bhes badal kar
sahra mein bhi har lamha sada dega ye pani
barsega to khushbu yahan mitti se udegi
sine mein mere aag laga dega ye pani
patthar se kisi roz mita kar 'saba' tum ko
pani pe hi ek naqsh bana dega ye pani

qatra qatra tishnagi

By

kunware khet meri khwahishon ke
tishnagi ki dhup mein
jalte hain
sim aur thur mayusi ke
kale qahr ki surat
lahu ka ek ek qatra
ragon se chuste jate hain
pile mausamon ki chup
bani hai bhag ki rekha
ki sadiyon se pada hai qaht giton ka
jo fasl katte waqt gati hain
thirakti nachti
basti ki baalaen
yahan sadiyon se barkha-rut ko
jiwan ka har ek lamha
tarasta hai
yahan kheton ke lab ki papdiyon par
tishnagi ka
qatra qatra bas tapakta hai

ek mashwara

By

mere gird
ab lal pili dawaon ki
in shishiyon se
na diwar chunne ki
koshish karo
tum hisar-e-dua mein
mujhe qaid karne ki zid chhod do
ab mere zakhm-khurda badan ki
na tum suiyon se
tabibon ki
paiwand-kari karo
apni pahchan ki shakl
bigdi hui lag rahi ho
to meri
ek achchhi si taswir
kamre mein tum tang lo
mujh ko ghar ke
kisi andhe kone mein ab dal do